അതുല്യയുടെ മരണം: ദുരൂഹത ആരോപിച്ച്​ ഭർത്താവ്​

ഷാർജ: കൊല്ലം സ്വദേശി അതുല്യ ശേഖറിന്‍റെ മരണത്തിൽ ദുരൂഹത ആരോപിച്ച്​ ഭർത്താവ്​ സതീഷ്​ ശങ്കർ. ഞായറാഴ്ചയാണ്​ സതീഷ്​ മാധ്യമങ്ങളോട്​ ഭാര്യയുടെ മരണത്തിൽ സംശയം പ്രകടിപ്പിച്ചത്​. അതുല്യ ആത്​മഹത്യ ചെയ്യുമെന്ന്​ വിശ്വസിക്കുന്നില്ലെന്ന്​ സതീഷ്​ പറഞ്ഞു. ഒന്നുകിൽ ആരോ അപായപ്പെടുത്തി. അല്ലെങ്കിൽ തന്നെ പേടിപ്പിക്കാനുള്ള ശ്രമത്തിൽ അബദ്ധം പറ്റി എന്നാണ് സതീഷ് പറയുന്നത്.

സംഭവ ദിവസം രാത്രി സുഹൃത്തുക്കൾക്കൊപ്പം അജ്​മാനിലായിരുന്നു. ഈ സമയം അതുല്യ ബോട്ടിമിൽ വീഡിയോ കോളിൽ വരികയും കഴുത്തിൽ കുരുക്കിട്ട്​ മരിക്കുമെന്ന്​ പറയുകയും ചെയ്​തു. തന്നെ പറ്റിക്കാനാണ്​ എന്നാണ്​ കരുതിയത്​. അൽപസമയത്തിന്​ ശേഷം ഫ്ലാറ്റിൽ തിരികെ എത്തിയപ്പോൾ വാതിൽ പൂട്ടിയിരുന്നില്ല. അകത്ത്​ കടന്നപ്പോഴാണ്​ അതുല്യ ഫാനിൽ തന്‍റെ കൈലിയിൽ തൂങ്ങിയ നിലയിൽ ​കണ്ടത്​. ഉടൻ രക്ഷപ്പെടുത്തുമ്പോൾ അവളിൽ ഹൃദയമിടിപ്പുണ്ടായിരുന്നു. ഉടൻ പൊലീസിനെ അറിയിച്ചു. പൊലീസ്​ എത്തുന്നത്​ വരെ പ്രഥമശുശ്രുഷ നൽകാനായിരുന്നു നിർദേശം. അതുപ്രകാരം അവളുടെ നെഞ്ചിൽ പലതവണ അമർത്തിയെങ്കിലും ശരീരം തണുത്ത നിലയിലായി. പൊലീസ്​ എത്തിയാണ്​ മരണം സ്ഥിരീകരിച്ചത്​.

പൊലീസിനോട്​ എല്ലാ തുറന്നുപറഞ്ഞിട്ടുണ്ട്​. ബെഡ്​റൂമിലെ ചില സാഹചര്യങ്ങളിൽ സംശയമുണ്ട്​. ഉപയോഗിക്കാത്ത ആറ്​ കറുത്ത നിലയിലുള്ള മാസ്ക്​ അവിടെ ഉണ്ടായിരുന്നു. ഒപ്പം ഒരു ബട്ടൻസും ക​ണ്ടെത്തിയിട്ടുണ്ട്​. ഭാരം കൂടിയ കട്ടിൽ മാറ്റിയിട്ട നിലയിലായിരുന്നുവെന്നും സതീഷ്​ ശങ്കർ പറഞ്ഞു. എന്താണ്​ സംഭവിച്ചതെന്ന്​ എനിക്കും അറിയണം. സി.സി.ടിവി ഉൾപ്പെടെ പരിശോധിച്ച്​ സത്യം കണ്ടെത്താൻ പൊലീസിനോട്​ അഭ്യർഥിച്ചിട്ടുണ്ട്​. ഇവിടത്തെ നിയമ സംവിധാനത്തിൽ വിശ്വാസമാണ്​. അതുല്യക്ക്​ തന്നെ സംശയമായിരുന്നു. ഇതു മൂലം മൂന്നുവർഷമായി സ്വന്തം അമ്മയെ പോലും വിളിക്കാനായിട്ടില്ല. മൂന്നു മാസത്തെ ഗർഭം അലസിപ്പിച്ചത്​ അവളുടെ നിർബന്ധത്തിന്​ വഴങ്ങിയാണ്​. എനിക്ക്​ അവളെ ഒഴിവാക്കണമെങ്കിൽ അത്​ നേരത്തെ ആവാമായിരുന്നു. അവളെ ഇല്ലാതാക്കേണ്ട ആവശ്യമില്ല. നാട്ടിൽ പൊലീസിന്‍റെ അന്വേഷണവുമായി സഹകരിക്കുമെന്നും സതീഷ്​ മാധ്യമങ്ങളോട്​ പറഞ്ഞു.

ശനിയാഴ്ച രാവിലെ ഷാർജ റോള പാർക്കിനു സമീപത്തെ ഫ്ലാറ്റിൽ ആണ്​ അതുല്യ (30)യെ തൂങ്ങിമരിച്ച നിലയിൽ കണ്ടെത്തുന്നത്​. അതുല്യയെ ഭർത്താവ്​ നിരന്തരം പീഡിപ്പിക്കാറുണ്ടെന്നാണ്​ ബന്ധുക്കളുടെ ആരോപണം. ഇതുമായി ബന്ധപ്പെട്ട്​ മുമ്പ്​ ഷാർജ പൊലീസിൽ പരാതിയിൽ നൽകിയിരുന്നു. മുൻ പ്രവാസിയായ ഓട്ടോ ഡ്രൈവർ രാജശേഖരൻ പിള്ളയുടെയും തുളസീഭായിയുടെയും മകളാണ്. ഏക മകൾ ആരാധ്യ (10) നാട്ടിൽ വിദ്യാർഥിയാണ്​. മൃതദേഹം പോസ്റ്റ്​മോർട്ടത്തിനായി ഷാർജ ആശുപത്രിയിലേക്ക്​ മാറ്റിയിരിക്കുകയാണ്​. തുടർ നടപടികൾക്ക്​ ശേഷം മൃതദേഹം നാട്ടിലേക്ക്​ കൊണ്ടുപോകുമോ എന്ന കാര്യത്തിൽ വ്യക്​തതവന്നിട്ടില്ല.