ഈത്തപ്പഴ കൃഷിയുടെ പൈതൃകം അടയാളപ്പെടുത്തി ലിവ ഫെസ്റ്റിവൽ

അബൂദബി: ഇമാറാത്തിന്‍റെ പൈതൃകത്തിന്‍റെയും പാരമ്പര്യത്തിന്‍റെയും ഭാഗമായ ഈത്തപ്പഴ കൃഷിയുടെ മേന്മയും സൗന്ദര്യവും പ്രദർശിപ്പിച്ച്​ ലിവ ഈത്തപ്പഴ മേള പുരോഗമിക്കുന്നു. ആഗോള തലത്തിൽ നിന്നുള്ള സന്ദർശകരെ ആകർഷിക്കുന്ന മേള അൽ ദഫ്​റയിലെ ലിവയിലാണ്​ അരങ്ങേറുന്നത്​. മേളയുടെ 21ാമത്​ എഡിഷനിൽ കർഷകർ, വിദഗ്ദർ, വ്യവസായ രംഗത്തെ പ്രമുഖർ, കമ്പനികൾ, ഗവേഷണ സ്ഥാപനങ്ങൾ എന്നിങ്ങനെ വ്യത്യസ്ത മേഖലകളിലുള്ളവർ പ​ങ്കെടുക്കുന്നുണ്ട്​.

യു.എ.ഇ വൈസ്​പ്രസിഡൻറും ഉപപ്രധാനമന്ത്രിയും പ്രസിഡൻഷയൽ കോർട്ട്​ ചെയർമാനുമായ ശൈഖ്​ മൻസൂർ ബിൻ സായിദ്​ ആൽ നഹ്​യാന്‍റെ മുഖ്യരക്ഷാധികാരത്തിൽ നടക്കുന്ന മേള, ഈത്തപ്പന കൃഷിയുടെ സാംസ്കാരികവും സാമ്പത്തികവുമായ പ്രാധാന്യം ആഘോഷിക്കുന്ന സുപ്രധാന പരിപാടിയാണ്​. പ്രാദേശിക ഉൽപന്നങ്ങളുടെ ഗുണനിലവാരം പ്രോത്സാഹിപ്പിക്കുന്നതിനുള്ള ഒരു പ്രധാന വേദിയായും മേള പ്രവർത്തിക്കുന്നു. ഈ വർഷത്തെ പതിപ്പിൽ ഏഴ് വിഭാഗങ്ങൾ ഉൾക്കൊള്ളുന്ന 12 ഈത്തപ്പഴ മത്സരങ്ങൾ നടക്കുന്നുണ്ട്​. ഈത്തപ്പനകളുടെയും ഈത്തപ്പഴത്തിന്‍റെയും പ്രാധാന്യം എടുത്തുകാണിക്കുന്നതാണ്​ മൽസരങ്ങൾ. അബൂദബി ഹെറിറ്റേജ്​ അതോറിറ്റി സംഘടിപ്പിക്കുന്ന 21ാമത്​ മേള ഈ മാസം 27വരെ തുടരും. ശൈഖ്​ മൻസൂർ ബിൻ സായിദ്​ ആൽ നഹ്​യാൻ, സഹിഷ്ണുത, സഹവർത്തിത്വ കാര്യ വകുപ്പ്​ മന്ത്രി ​ശൈഖ്​ നഹ്​യാൻ ബിൻ മുബാറക്​ ആൽ നഹ്​യാൻ തുടങ്ങി പ്രമുഖർ മേള വീക്ഷിക്കാൻ എത്തിച്ചേർന്നു.