നിലമ്പൂർ പരാജയപ്പെടുത്തിയത് എന്ത്?

നിലമ്പൂർ ഉപതെരഞ്ഞെടുപ്പിൽ യു.ഡി.എഫ്​ മിന്നും വിജയം നേടിയിരിക്കുന്നു. എന്താണ്​ നിലമ്പൂരി​ലെ വിജയത്തിന്​ പിന്നിൽ? പി.വി. അൻവറി​ന്റെ സ്വാധീനം എന്തായിരുന്നു? എൽ.ഡി.എഫിന്​ ഇൗ തെരഞ്ഞെടുപ്പ്​ എന്ത് പാഠങ്ങളാണ്​ നൽകുന്നത്​? –മുതിർന്ന മാധ്യമപ്രവർത്തക​ന്റെ നിരീക്ഷണവും വിശകലനവും.

ഒരിക്കൽകൂടി നിലമ്പൂരിൽ പാർട്ടി ചിഹ്നം ഉപയോഗിച്ച്​ സി.പി.എം നടത്തിയ ‘രാഷ്​ട്രീയ പോരാട്ട’ പരീക്ഷണം പരാജയമായി. ഇടതു മുന്നണിയുടെ പരാജയത്തിനും ഐക്യ ജനാധിപത്യ മുന്നണിയുടെ വിജയത്തിനും മാനങ്ങളേറെയാണ്​. പ്രചാരണത്തിന്‍റെ അവസാന ഘട്ടത്തിൽ യു.ഡി.എഫ്​ നേതൃത്വം 10,000ത്തിനും 15,000ത്തിനും ഇടയിൽ ഭൂരിപക്ഷത്തോടെ വിജയം ഉറപ്പിച്ചു പറ​ഞ്ഞെങ്കിലും ഇടതു സ്​ഥാനാർഥിയും നേതൃത്വവും വിജയപ്രതീക്ഷ പ്രകടിപ്പിക്കുക മാത്രമാണ്​ ചെയ്​തത്​. അതുതന്നെയാണ്​ വോ​ട്ടെടുപ്പിൽ പ്രകടമായതും. യു.ഡി.എഫ്​ സ്​ഥാനാർഥി ആര്യാടൻ ഷൗക്കത്ത്​ 11,077 വോട്ടിന്‍റെ ഭൂരിപക്ഷത്തിന്​ വിജയിച്ചു.

ഭരണവിരുദ്ധ വികാരം വോ​ട്ടെടുപ്പിൽ ​പ്രതിഫലിച്ചില്ലെന്ന്​ ഇടതു നേതാക്കൾ ആവർത്തിക്കുന്നുണ്ടെങ്കിലും ആ വികാരം കോൺഗ്രസ്​ സ്​ഥാനാർഥി ഷൗക്കത്തിനും സ്വതന്ത്ര സ്​ഥാനാർഥി പി.വി. അൻവറിനുമായി വീതിക്കപ്പെ​ട്ടെന്നാണ്​ ​വോ​ട്ടെടുപ്പു കണക്കുകൾ വ്യക്തമാക്കുന്നത്​. വോ​ട്ടെടുപ്പ്​ കഴിഞ്ഞാൽ ആര്യാടൻ ഷൗക്കത്ത്​ സിനിമക്ക്​ കഥയെഴുതാനും ഇടതു സ്​ഥാനാർഥി എം. സ്വരാജ്​ സി.പി.എം സെക്രട്ടേറിയറ്റി​ലേക്കും താൻ 75,000 വോട്ടുമായി നിയമസഭയിലേക്കും പോകുമെന്ന്​ വീമ്പു പറഞ്ഞ പി.വി. അൻവർ 19,760 വോട്ടു പിടിച്ച്​ മൂന്ന്​ മുന്നണികളെയും ഞെട്ടിച്ചു. മൂന്നാം മുന്നണി ബി.ജെ.പി നേതൃത്വം നൽകുന്ന എൻ.ഡി.എ സ്​ഥാനാർഥി അഡ്വ. മോഹൻ ജോർജിനെ കെട്ടിവെച്ച കാശ്​ നഷ്​ടപ്പെടുത്തി നാലാം സ്​ഥാനത്തേക്ക്​ തള്ളിയതും അൻവറാണ്​. കേരള രാഷ്​ട്രീയത്തിൽ അൻവർ ചർച്ച തുടരുമെന്നു തന്നെയാണ്​ തെരഞ്ഞെടുപ്പ്​ ഫലം തെളിയിക്കുന്നത്​.

പിണറായി സർക്കാറിന്‍റെ മൂന്നാമൂഴത്തിലേക്കുള്ള ചൂണ്ടുപലകയാവും നിലമ്പൂർ ഉപതെരഞ്ഞെടുപ്പെന്നാണ്​ ഇടതു മുന്നണി അവകാശപ്പെട്ടിരുന്നത്​. അതിന്​ തടയിടാനാണ്​ അഭിപ്രായ വ്യത്യാസങ്ങൾ അട്ടത്തുവെച്ച്​ യു.ഡി.എഫ്​ ഒറ്റ​ക്കെട്ടായി കച്ചകെട്ടിയിറങ്ങിയതും. അത്​ ഫലം കാണുകയും ചെയ്​തു. ഭരണമില്ലാതെ ഇനിയൊരഞ്ചു വർഷംകൂടി പിടിച്ചുനിൽക്കാനാവില്ലെന്ന തിരിച്ചറിവാണ്​ യു.ഡി.എഫിനെ വിജയപീഠത്തിലെത്തിച്ചതെന്നു പറയുന്നതാവും കൂടുതൽ ശരി. മാത്രമല്ല, പാർട്ടികളും മുന്നണികളും നടത്തുന്ന അവകാശവാദങ്ങളും നുണപ്രചാരണങ്ങളുമല്ല, നിത്യജീവിതത്തിലെ തങ്ങളുടെ ബോധ്യമാണ്​ വോട്ടാക്കി പെട്ടികളിൽ നിക്ഷേപിച്ചത്​ എന്ന്​ തെളിയിക്കാൻ നിലമ്പൂരിലെ വോട്ടർമാർക്കായി എന്നാണ്​ ഉപതെരഞ്ഞെടുപ്പ്​ ഫലം തെളിയിക്കുന്നത്​.

ഉപതെരഞ്ഞെടുപ്പിലെ യു.ഡി.എഫിന്‍റെ വിജയം എന്നതിലുപരി ഭരണമുന്നണിയുടെ പരാജയമാണ്​ വിലയിരുത്തപ്പെടേണ്ടത്. മുഖ്യമന്ത്രിയും പാർട്ടി സെക്രട്ടറിയടക്കം സർക്കാർ മെഷിനറിയും പാർട്ടി മെഷിനറിയും നിലമ്പൂരിൽ നാളുകൾ ക്യാമ്പു ചെയ്​ത്​ തന്ത്രങ്ങൾ ആവിഷ്​കരിച്ചിട്ടും പരാജയപ്പെട്ടത്​ എന്തുകൊണ്ടെന്ന്​ സി.പി.എമ്മിനും ഇടതു മുന്നണിക്കും ആഴത്തിൽ വിലയിരുത്തേണ്ടതായിട്ടു വരും. ഒമ്പതു വർഷത്തെ ഭരണനേട്ടങ്ങൾ കക്ഷത്തുവെച്ച്​ ബി.ജെ.പിയെപ്പോലും പിറകിലാക്കുന്ന രീതിയിൽ വർഗീയതയിലൂന്നിയുള്ള പ്രചാരണങ്ങളാണ്​ വോ​ട്ടെടുപ്പിന്‍റെ അവസാന ഘട്ടം വരെ സി.പി.എമ്മും മുന്നണിയും നടത്തിയതെന്ന്​ നിലമ്പൂർ ഉപതെരഞ്ഞെടുപ്പിൽ പകൽപോലെ വ്യക്തമായി. അത്തരം പ്രചാരണങ്ങളോട്​ എങ്ങനെയായിരിക്കും കേരളമനസ്സ്​ പ്രതികരിക്കുക എന്നതിനുള്ള മുന്നറിയിപ്പു കൂടിയാണ്​ ഉപതെരഞ്ഞെടുപ്പ്​ ഫലം സി.പി.എമ്മിനും മുന്നണിക്കും നൽകുന്നത്​.

മൂന്നാമതും കോൺഗ്രസ്​

നിലമ്പൂരിൽ നടന്ന മൂന്നാമത്​ ഉപതെരഞ്ഞെടുപ്പിലും കോൺഗ്രസ്​ വിജയം കൊയ്​തിരിക്കുകയാണ്​. നിലമ്പൂരിൽ കമ്യൂണിസ്റ്റ്​ പാർട്ടിയുടെ പ്രതിപുരുഷനായിരുന്ന കുഞ്ഞാലി കൊല്ലപ്പെട്ട ശേഷം ’69ൽ നടന്ന ഉപതെരഞ്ഞെടുപ്പിലും സി.പി.എം മുന്നണിയോടൊപ്പംനിന്ന്​ കോൺഗ്രസ്​-യു മത്സരിച്ച ’80ലെ ഉപതെരഞ്ഞെടുപ്പിലും കോൺഗ്രസ്​ സ്​ഥാനാർഥികൾക്കായിരുന്നു ജയം. കുഞ്ഞാലിക്കു ശേഷം പാർട്ടി സ്​ഥാനാർഥിയെ സ്വന്തം ചിഹ്​നത്തിൽ മത്സരിപ്പിച്ച്​ നിയമസഭയിലെത്തിക്കാൻ സി.പി.എമ്മിനാവുന്നില്ലെന്നാണ്​ ആറു പതിറ്റാണ്ട്​ പൂർത്തിയാക്കുന്ന നിലമ്പൂർ മണ്ഡലത്തിന്‍റെ തെരഞ്ഞെടുപ്പു ചിത്രം തെളിയിക്കുന്നത്​. അതുകൊണ്ടു തന്നെ നിലമ്പൂരിൽ തുടർന്നും ‘സ്വതന്ത്ര’ പരീക്ഷണവുമായി മുന്നോട്ടുപോകാൻ സി.പി.എമ്മിനെ നിർബന്ധിക്കുന്നതായിരിക്കും ഈ ഉപതെരഞ്ഞെടുപ്പു ഫലം.

’82ൽ കോൺഗ്രസ്​ -ഐയിലെ ഡി.സി.സി പ്രസിഡന്‍റ്​ ടി.കെ. ഹംസയെ അടർത്തിയെടുത്തായിരുന്നു സി.പി.എമ്മിന്‍റെ സ്വതന്ത്ര പരീക്ഷണം. അത്​ വിജയം കണ്ടു. തുടർന്നുവന്ന തെരഞ്ഞെടുപ്പിൽ (1987) പാർട്ടി സ്​ഥാനാർഥിയെ പരീക്ഷിച്ചു, കര ​തൊട്ടില്ല. തുടർന്നുവന്ന മൂന്ന്​ പൊതുതെരഞ്ഞെടുപ്പുകളിലും സ്വതന്ത്രനെ പരീക്ഷിച്ചിട്ടും ആര്യാടൻ മുഹമ്മദിനെ തോൽപിക്കാനായില്ല. 2006ൽ വീണ്ടും പാർട്ടി ചിഹ്നം പരീക്ഷിച്ചു നോക്കിയെങ്കിലും നിലമ്പൂരിലെ വോട്ടർമാർ വർധിതവീര്യത്തോടെ തിരസ്​കരിച്ചു. പിന്നീട്​ സ്വതന്ത്ര പരീക്ഷണം വിജയിപ്പിക്കാനായത്​ കോൺഗ്രസിൽനിന്നുള്ള പി.വി. അൻവറിനെ കിട്ടിയതോടെയാണ്. അൻവറിലൂടെ രണ്ടുതവണ മണ്ഡലത്തെ കൂടെ നിർത്താനായി. അൻവർ സർക്കാറിനും മുന്നണിക്കും വെല്ലുവിളി ഉയർത്തി പുറത്തുപോയതോടെയാണ്​ ഉപതെരഞ്ഞെടുപ്പു വന്നത്​. പാർട്ടി സ്​ഥാനാർഥിക്ക്​ ജയിച്ചുകയറുക എളുപ്പ​മല്ലെന്ന്​ മനസ്സിലാക്കിത്തന്നെയാണ്​ പത്രികാ സമർപ്പണത്തിനുള്ള സമയമടുക്കും വരെ സ്വതന്ത്ര സ്​ഥാനാർഥികൾക്കായി വലയെറിഞ്ഞു നോക്കിയത്​. ഇടതു മുന്നണിയിലെ ഈ അനിശ്ചിതത്വത്തിനിടയിലാണ്​ കോൺഗ്രസിലെ രാഹുൽ മാങ്കൂട്ടത്തിൽ, എം. സ്വരാജിനെ മത്സരിപ്പിക്കാൻ വെല്ലുവിളി നടത്തിയത്​. വെല്ലുവിളി സ്വീകരിച്ചുകൊണ്ടല്ല, നെടുപ്പമുള്ള മീനുക​ളൊന്നും വലയിൽ കയറാതിരുന്ന സാഹചര്യത്തിലാണ്​ പാർട്ടിയിലെയും മണ്ഡലത്തിലെയും കരുത്തനായ സെക്ര​ട്ടേറിയറ്റംഗത്തെ തന്നെ, അദ്ദേഹത്തിന്​ താൽപര്യമില്ലാതിരുന്നിട്ടു കൂടി മത്സരിപ്പിക്കാൻ സി.പി.എം നിർബന്ധിതമായത്​.

യു.ഡി.എഫിന്റേത്​ കൂട്ടായ്​മയുടെ വിജയം

തർക്കങ്ങൾക്കും അഭിപ്രായവ്യത്യാസങ്ങൾക്കും അവധി കൊടുത്ത്​ കൂട്ടിപ്പിടിച്ചാൽ​ കരുത്തു കാട്ടാനാവുമെന്ന പാഠമാണ്​ ഉപ തെരഞ്ഞെടുപ്പു ഫലം യു.ഡി.എഫിനു നൽകുന്നത്. ഇടതു മുന്നണിയെ അപേക്ഷിച്ച്​ സ്​ഥാനാർഥിയെ നേരത്തേ തീരുമാനിക്കാനായെങ്കിലും വലിയ പ്രതിസന്ധികൾക്ക്​ നടുവിലാണ്​ കോൺഗ്രസും യു.ഡി.എഫും​​ ​ഉപ തെരഞ്ഞെടുപ്പ്​ പ്രചാരണ രംഗത്തിറങ്ങുന്നത്​. അൻവറിനെ യു.ഡി.എഫിൽ എടുക്കുന്നത്​ സംബന്ധിച്ച്​ മുന്നണിയിലും കോൺഗ്രസിലുമുണ്ടായ അഭിപ്രായ വ്യത്യാസങ്ങൾ, ഷൗക്കത്തിനെ സ്​ഥാനാർഥിയാക്കുന്നതിനെതിരെ അൻവറിന്‍റെ ഭാഗത്തുനിന്നുള്ള സമ്മർദത്തിന്​ മലപ്പുറം ജില്ല കോൺഗ്രസ്​ നേതൃത്വത്തിൽനിന്നു തന്നെ ഉണ്ടായ പിന്തുണ, അൻവറിനു മുന്നിൽ വാതിൽ കൊട്ടിയടച്ചിട്ടും മുന്നണി ഘടകകക്ഷികളും കോൺ​ഗ്രസ്​ നേതാക്കൾതന്നെയും അൻവറുമായി ആശയവിനിമയം നടത്തിയത്​, ആര്യാടൻ മുഹമ്മദിനോടും അദ്ദേഹത്തിന്‍റെ മകനും സ്​ഥാനാർഥിയുമായ ഷൗക്കത്തിനോടും ഘടക കക്ഷിയായ മുസ്​ലിം ലീഗിനുള്ള വിരോധം തുടങ്ങിയ പ്രശ്​നങ്ങൾ കോൺഗ്രസിനും മുന്നണിക്കും കടുത്ത തലവേദന സൃഷ്​ടിച്ചിരുന്നു. ഇതെല്ലാം താൽക്കാലികമായെങ്കിലും പരിഹരിക്കാനായതാണ്​ മുന്നണിയെ വിജയത്തിലേക്കെത്തിച്ചത്​.

മുന്നണിക്കെന്നപോലെ മുസ്​ലിം ലീഗിനും നിലമ്പൂർ ഉപ തെരഞ്ഞെടുപ്പ്​ ജീവന്മരണ പോരാട്ടമായിരുന്നു. നിലമ്പൂരിൽ ജയിച്ചില്ലെങ്കിൽ അടുത്ത ഭരണവും മുന്നണിക്കില്ലെന്ന മുന്നറിയിപ്പ്​ പാണക്കാട്​ കുടുംബത്തിൽനിന്നുതന്നെ നിലമ്പൂരിലെ പാർട്ടിക്കാരിലേക്ക്​ പോയതോടെ അവർ കോൺഗ്രസുമായി കൈകോർത്ത്​ രംഗത്തിറങ്ങി. പ്രതിപക്ഷ നേതാവ്​ വി.ഡി. സതീശന്‍റെ നേതൃത്വത്തിൽ കോൺഗ്രസിലെയും ലീഗിലെയും യുവനേതൃത്വം നിലമ്പൂരിലെ വോട്ടുത്സവത്തിൽ കളംനിറഞ്ഞാടിയത്​ തെര​ഞ്ഞെടുപ്പ്​ അട്ടിമറിക്ക്​ ആക്കംകൂട്ടുക തന്നെ ചെയ്​തു. മണ്ഡലം വൻ ഭൂരിപക്ഷത്തിൽ അവർക്ക്​ തിരിച്ചുപിടിക്കാനുമായി.

വോട്ടുചോർച്ച മൂന്ന്​ മുന്നണികളിലും

അൻവറിനു മുന്നിൽ യു.ഡി.എഫിന്‍റെ വാതിൽ കൊട്ടിയടച്ചതോടെ മത്സരിക്കാൻ നിർബന്ധിതനായി തൃണമൂൽ കോൺഗ്രസ്​ നേതാവ്​ അൻവർ ഗോദയിലിറങ്ങിയത്​ ഇരു മുന്നണികളിലും അങ്കലാപ്പുയർത്തിയിരുന്നു. തങ്ങൾ സേഫ്​ സോണിലാണെന്നും അൻവർ പിടിക്കുക യു.ഡി.എഫിന്‍റെ വോട്ടായിരിക്കുമെന്നും കണക്കുകൂട്ടിയ സി.പി.എമ്മിന്​ പിഴച്ചു എന്നുതന്നെ പറയാം. തെരഞ്ഞെടുപ്പ് അവലോകനത്തിൽ ‘തങ്ങളുടെ കുറച്ചു വോട്ടും അൻവർ പിടിച്ചിട്ടുണ്ടെന്നും അത്​ പരിശോധിക്കുമെന്നും’ സി.പി.എം സംസ്​ഥാന സെക്രട്ടറി എം.വി. ഗോവിന്ദൻ സമ്മതിക്കുകയുംചെയ്​തിട്ടുണ്ട്​.

കഴിഞ്ഞ നിയമസഭ തെരഞ്ഞെടുപ്പിൽ മുന്നണിക്ക്​ മേൽക്കൈ ഉണ്ടായിരുന്ന എം. സ്വരാജിന്‍റെ പഞ്ചായത്തായ പോത്തുകല്ലിലും അമരമ്പലത്തും നിലമ്പൂർ നഗരസഭയിലും സ്വരാജ്​ പിറകിൽ പോയി. മണ്ഡലത്തിലെ ഏഴു പഞ്ചായത്തുകളിൽ ചെറുതോതിലെങ്കിലും ഇടതു മുന്നണിക്ക്​ മേൽക്കൈ നേടാനായത്​ കരുളായി പഞ്ചായത്തിൽ മാത്രമാണ്​. യു.ഡി.എഫിന്​ മുൻതൂക്കമുണ്ടെങ്കിലും ഇടതു മുന്നണി ഭരിക്കുന്ന നിലമ്പൂർ നഗരസഭയിൽ 4000 വോട്ടിന്‍റെ ഭൂരിപക്ഷമാണ്​ ഉപ തെരഞ്ഞെടുപ്പിൽ യു.ഡി.എഫിനുള്ളത്​.

ആര്യാടൻ മുഹമ്മദിനോടില്ലാത്ത വിരോധം മകൻ ഷൗക്കത്തിനോട്​ മണ്ഡലത്തിലെ നല്ലൊരു വിഭാഗം കോൺഗ്രസുകാർക്കുണ്ട്. അവർതന്നെയാണ്​ 2016ലെ നിയമസഭാ തെരഞ്ഞെടുപ്പിൽ ഷൗക്കത്തിനെ തോൽപിച്ചതും. ഇത്തവണ അക്കൂട്ടർ ഡി.സി.സി പ്രസിഡന്‍റ്​ വി.എസ്.​ ജോയിയെ സ്​ഥാനാർഥിയാക്കാൻ കൊണ്ടുപിടിച്ചു ശ്രമിച്ചെങ്കിലും ഷൗക്കത്ത്​ മറുകണ്ടം ചാടുമെന്ന അഭ്യൂഹമുയർന്ന പശ്ചാത്തലത്തിൽ സംസ്​ഥാന നേതൃത്വത്തിന്‍റെ തീരുമാനത്തിന്​ വഴങ്ങുകയായിരുന്നു. എന്നാൽ തെരഞ്ഞെടുപ്പു ഫലം പരിശോധിച്ചാൽ വഴിക്കടവ്​, എടക്കര, മൂത്തേടം പഞ്ചായത്തുകളിലെ കോൺഗ്രസ്​ വോട്ടിൽ ചോർച്ചയുണ്ടായിട്ടുണ്ടെന്നുതന്നെയാണ് കോ​ൺഗ്രസ്​ നേതൃത്വത്തിന്‍റെ വിലയിരുത്തൽ. 2021ലെ തെരഞ്ഞെടുപ്പിൽ യു.ഡി.എഫിന്​ വഴിക്കടവിൽ 13,538ഉം എടക്കരയിൽ 7885ഉം മൂത്തേടത്ത്​ 8654ഉം വോട്ടുകൾ ലഭിച്ചിടത്ത്​ ഉപ തെരഞ്ഞെടുപ്പിൽ യഥാക്രമം 12,255, 7739, 7986 വോട്ടുകളാണ്​. എന്നാൽ, മണ്ഡലത്തിലെ മുസ്​ലിം ലീഗ്​ വോട്ടുകളിൽ ചോർച്ചയുണ്ടായിട്ടില്ലെന്നാണ്​ യു.ഡി.എഫ്​ നേതൃത്വത്തിന്‍റെ വിലയിരുത്തൽ. അതേസമയം, മൊത്തം വോട്ടിൽ 2021നെ അപേക്ഷിച്ച്​ യു.ഡി.എഫിന്​ 2025ൽ (78,527 -77,737) 790 വോട്ടിന്‍റെ കുറവുണ്ടായിട്ടുണ്ട്​.

ആദ്യം മത്സരിക്കാൻ താൽപര്യം കാണിക്കാതിരുന്ന ബി.ജെ.പി അവസാന ഘട്ടത്തിലാണ്​ കേരള കോൺഗ്രസ്​ ജോസഫ്​ ഗ്രൂപ്പിൽനിന്ന്​ അടർത്തിയെടുത്ത അഡ്വ. മോഹൻ ജോർജുമായി രംഗത്തെത്തിയത്​. മണ്ഡലത്തിലെ ക്രിസ്​ത്യൻ വോട്ടുകൾ പരമാവധി സമാഹരിക്കുക എന്ന ലക്ഷ്യത്തോടെ പാർട്ടിയെടുത്ത തീരുമാനം പ്രതീക്ഷിച്ച ഫലം കണ്ടില്ലെന്ന വിലയിരുത്തലാണ്​ എൻ.ഡി.എ മുന്നണിക്കുള്ളത്​. ഈഴവ വോട്ടുകൾ ഇടതു സ്​ഥാനാർഥിക്കാണ്​ പോവുകയെന്ന്​ വോ​ട്ടെടുപ്പിനു മുമ്പുതന്നെ എസ്​.എൻ.ഡി.പി ജനറൽ സെ​ക്രട്ടറി വെള്ളാപ്പള്ളി നടേശൻ സൂചിപ്പിച്ചിരുന്നു. വോ​ട്ടെടുപ്പിനുശേഷം അദ്ദേഹമത്​ സ്​ഥിരീകരിക്കുകയുംചെയ്​തു. 2021ൽ ബി.ജെ.പി സ്​ഥാനാർഥിക്ക്​ ലഭിച്ചത്​ 8595 വോട്ടാണ്. ഇത്തവണ ലഭിച്ചത്​ 8648 വോട്ടും. 53 വോട്ടിന്‍റെ വർധന. കഴിഞ്ഞ ലോക്​സഭാ ഉപതെരഞ്ഞെടുപ്പിൽ ലഭിച്ച വോട്ടനുസരിച്ച്​ മണ്ഡലത്തിൽ 12,000ത്തിലധികം വോട്ട്​ തങ്ങൾക്കുണ്ടെന്ന്​ അവകാശപ്പെടുന്നിടത്താണ്​ ഉപ തെരഞ്ഞെടുപ്പിലെ ബി.ജെ.പിയുടെ മോശമായ പ്രകടനം. എസ്​.ഡി.പി.ഐയുടെ വോട്ടിലും ഇത്തവണ കുറവ്​ സംഭവിച്ചിട്ടുണ്ട്​. 2011ൽ അവർക്ക്​ ലഭിച്ചത്​ 3281 വോട്ടാണെങ്കിൽ ഇത്തവണ മത്സരിച്ച സാദിഖ്​ നടുത്തൊടി​ നേടിയത്​ 2075 വോട്ടാണ്. കുറഞ്ഞ വോട്ട്​ ഏതു സ്​ഥാനാർഥിക്കാണ്​ പോയതെന്ന്​ അന്വേഷിച്ച്​ കണ്ടുപിടിക്കേണ്ടതായിട്ടാണുള്ളത്​.

ആര്യാടൻ മുഹമ്മദ്,ടി​.കെ. ഹംസ,വി.ഡി. സതീശൻ,എം.വി.​ ഗോവിന്ദൻ,പി.വി. അൻവർ,വി.എസ്. ജോയ്,വെള്ളാപ്പള്ളി നടേശൻ

അൻവറും യു.ഡി.എഫും

തെരഞ്ഞെടുപ്പിൽ മുഖ്യഘടകങ്ങളിലൊന്ന്​ പുത്തൻവീട്ടിൽ അൻവർതന്നെയായിരുന്നു. അന്‍വറിന്​ കേരള രാഷ്​ട്രീയത്തിൽ തന്‍റെ സ്​ഥാനം നിർണയിക്കാനുള്ള അവസരംകൂടിയായി ഈ തെരഞ്ഞെടുപ്പ്​. അൻവർ കുറച്ചുകാലം കൂടി രാഷ്​ട്രീയ കേരളത്തിലൊരു വിഷയമായി തുടരുമെന്നുവേണം കരുതാൻ. അൻവർ തന്‍റെ അടുത്ത ഗോദയും ഉന്നവും തീരുമാനിച്ചുകഴിഞ്ഞു. പിണറായിസം വിട്ട്​ ‘മരുമോനിസ’ത്തിനെതിരെ ​ബേപ്പൂരിൽ പോരാടുമെന്നാണ്​ അൻവറിന്‍റെ പ്രഖ്യാപനം. അതോടൊപ്പം അൻവറിനെ യു.ഡി.എഫിലെടുക്കണമെന്ന ആവശ്യം വീണ്ടും ഉയർന്നുവരുന്നുണ്ട്​. കെ.പി.സി.സി പ്രസിഡന്‍റ്​ സണ്ണി ജോസഫിന്‍റെയും മുൻ പ്രസിഡന്‍റ്​ സുധാകരന്‍റെയും പ്രതികരണങ്ങൾ ഇതിനകം വന്നുകഴിഞ്ഞു. വി.ഡി. സതീശനുമായുള്ള നിലപാട്​ അൻവർ മയപ്പെടുത്തിയിട്ടുമുണ്ട്​. എന്നാൽ, അൻവറിന്‍റെ താൽപര്യങ്ങളുമായി യു.ഡി.എഫ്​ നേതൃത്വത്തിന്​ എങ്ങനെ മുന്നോട്ടുപോകാൻ കഴിയുമെന്ന്​ രാഷ്​ട്രീയ കേരളം കണ്ടറിയാനിരിക്കുന്നതേയുള്ളൂ.

ഭരണവിരുദ്ധ വികാരവും വർഗീയ പ്രചാരണവും

തെരഞ്ഞെടുപ്പ്​ ഫലത്തെ അവലോകനംചെയ്​തുകൊണ്ട്​ സി.പി.എം സംസ്​ഥാന സെക്രട്ടറി വാർത്താസ​​മ്മേളനത്തിൽ പറഞ്ഞത്​, ഇടതുപക്ഷത്തിന്​ രാഷ്​ട്രീയമായി ജയിക്കാൻ കഴിയുന്ന മണ്ഡലങ്ങളുടെ പട്ടികയിലല്ല നിലമ്പൂരെന്നും വർഗീയശക്തികളുടെ പിൻബലത്തോടെയാണ്​ യു.ഡി.എഫ്​ സ്​ഥാനാർഥി ജയിച്ചതെന്നുമാണ്. യു.ഡി.എഫിന്​ 2021ൽ ലഭിച്ചതിനേക്കാൾ 1470 വോട്ട്​ ഇത്തവണ കുറഞ്ഞിട്ടുണ്ടെന്നും എന്നാൽ, തങ്ങളുടെ വോട്ട്​ 2011ൽ പാർട്ടി സ്​ഥാനാർഥിക്ക്​ ലഭിച്ചതിനേക്കാൾ വർധിക്കുകയാണ്​ ചെയ്​ത​തെന്നുമായിരുന്നു തുടർന്നുള്ള വിശദീകരണം. 2021ൽ അൻവറിന്​ ലഭിച്ചതിനേക്കാൾ 14,500 വോട്ട്​ ഇത്തവണ ഇടതു മുന്നണി സ്​ഥാനാർഥിക്ക്​ കുറവാണല്ലോ എന്ന്​ മാധ്യമപ്രവർത്തകർ ചൂണ്ടിക്കാട്ടിയപ്പോൾ, ആ വോട്ട്​ അൻവർ എന്ന സ്വതന്ത്ര സ്​ഥാനാർഥിക്ക്​ കിട്ടിയ വോട്ടാണെന്നായിരുന്നു മറുപടി.

അൻവറിന്​ ഞങ്ങളുടെ കുറച്ച്​ വോട്ടും ലഭിച്ചിട്ടുണ്ട്​. എന്നാലും പാർട്ടി അടിത്തറ ശക്തമാണ്​. യു.ഡി.എഫിന്​ ലഭിച്ച വോട്ട്​ വർഗീയ, തീവ്രവാദ ശക്തികളുമായി ചേർന്നു നടത്തി​യ തെരഞ്ഞെടുപ്പ്​ പ്രവർത്തനത്തിന്‍റെ ഭാഗമായി ലഭിച്ചതാണ്​. ഭാവിയിൽ അതിന്‍റെ സാമൂഹിക പ്രത്യാഘാതമുണ്ടാവും. അത്​ ജനങ്ങൾ തിരിച്ചറിയണം. ഞങ്ങൾ രാഷ്​ട്രീയ മത്സരമാണ്​ നടത്തിയത്​. അതിനുള്ള വോട്ട്​ ഞങ്ങൾക്ക്​ കിട്ടിയെന്നും അദ്ദേഹം പറഞ്ഞു.

ഭരണവിരുദ്ധ വികാരവും വർഗീയവിരുദ്ധ പ്രചാരണവും തമ്മിലുള്ള ഏറ്റുമുട്ടൽതന്നെയാണ്​ നിലമ്പൂരിൽ നടന്നതെന്നാണ്​ തെരഞ്ഞെടുപ്പ്​ ഫലം വിശകലനം ചെയ്യു​േമ്പാൾ തെളിഞ്ഞുവരുന്ന വസ്​തുത. ആര്യാടൻ ഷൗക്കത്തിന്​ ലഭിച്ച അധിക വോട്ടും (11,077) സ്വതന്ത്ര സ്​ഥാനാർഥി അൻവർ പിടിച്ച 19,760 വോട്ടും തന്നെയാണ്​ അതിന്​ അടിസ്​ഥാനം. യു.ഡി.എഫ്​ ഉയർത്തിയത്​ പിണറായി സർക്കാറിന്‍റെ അഴിമതിയും ഭരണവൈകല്യങ്ങളും അൻവർ ഉന്നയിച്ചത്,​ പിണറായിക്കും കുടുംബത്തിനും ആഭ്യന്തരം, റവന്യൂ, വനം വകുപ്പുകൾക്കുമെതിരായ ആരോപണങ്ങളുമായിരുന്നു. മറിച്ച്​ ഇടതുപക്ഷം മുന്നണി സർക്കാറിന്‍റെ ഒമ്പതു വർഷത്തെ ഭരണനേട്ടങ്ങളിലൂന്നി പ്രചാരണം ആരംഭിച്ചെങ്കിലും അത്​ പതിയെ വർഗീയതക്കെതിരായ പോരാട്ടമാണ്​ തങ്ങളുടേതെന്ന ഒറ്റ അജണ്ടയിലേക്ക്​ മാറ്റുകയുമാണുണ്ടായത്​.

വർഗീയത തെരഞ്ഞെടുപ്പിൽ മുഖ്യ പ്രചാരണ വിഷയമാക്കുമെന്ന സൂചന തെരഞ്ഞെടുപ്പൊരുക്കത്തിന്‍റെ തുടക്കത്തിലേ ഉണ്ടായിരുന്നു. കഴിഞ്ഞ ഏപ്രിൽ നാലിന്​​ നിലമ്പൂർ മണ്ഡലത്തി​ലെ ചുങ്കത്തറയിൽ നടന്ന ശ്രീനാരായണ കൺവെൻഷനിൽ എസ്​.എൻ.ഡി.പി ജനറൽ സെക്രട്ടറി വെള്ളാപ്പള്ളി നടേശൻ, മലപ്പുറം പ്രത്യേക രാജ്യമാണെന്നും ചില പ്രത്യേക ആളുകളുടെ സംസ്​ഥാനമാണെന്നും ഇവിടെ ഈഴവർക്ക്​ ശ്വാസം മുട്ടുകയാണെന്നും പറഞ്ഞിരുന്നു.

ഏപ്രിൽ 11ന്​ ചേർത്തലയിൽ നടന്ന എസ്​.എൻ.ഡി.പി പരിപാടിയിൽ പ​ങ്കെടുത്ത മുഖ്യമന്ത്രി പിണറായി വിജയൻ, വെള്ളാപ്പള്ളി മലപ്പുറത്തെ കുറിച്ച്​ പറഞ്ഞതിനെ ന്യായീകരിക്കുന്ന രീതിയിലുള്ള പ്രതികരണമാണ്​ നടത്തിയത്​. പിന്നീട്​ വെൽഫെയർ പാർട്ടി യു.ഡി.എഫിന്​ പിന്തുണ പ്രഖ്യാപിച്ചപ്പോൾ, മതരാഷ്​ട്രവാദികളായ ജമാഅത്തെ ഇസ്​ലാമിയുമായി കൂട്ടുകൂടിയാണ്​ യു.ഡി.എഫ്​ തെരഞ്ഞെടുപ്പിനെ നേരിടുന്നതെന്ന ആരോപണവുമായി​ മുഖ്യമന്ത്രിയും പാർട്ടി സെക്രട്ടറിയും പോളിറ്റ്​ ബ്യൂറോ അംഗങ്ങളും രംഗത്തുവന്നു. മുന്നണിയുടെ പ്രധാന പ്രചാരണ വിഷയവും അതായി. പ്രചാരണങ്ങളിലൊന്നും വെൽഫെയർ പാർട്ടിയുടെ പേരുപറയാതെ പകരം ജമാഅത്തെ ഇസ്​ലാമിയെന്നു പറയാൻ മുന്നണി നേതാക്കൾ പ്രത്യേകം ശ്രദ്ധിക്കുകയുംചെയ്​തു. പി.ഡി.പി ഇടതു മുന്നണിക്ക്​ പിന്തുണ പ്രഖ്യാപിച്ചപ്പോൾ, അവർ പീഡിപ്പിക്കപ്പെട്ടവരുടെ പാർട്ടിയാണെന്നായിരുന്നു പാർട്ടി സെക്രട്ടറിയുടെ മറുപടി.

പ്രചാരണങ്ങളുടെ ഉന്നം ഹിന്ദു, ക്രിസ്​ത്യൻ വോട്ടുകളുടെ സമാഹരണമാണെന്ന്​ തുടക്കത്തിലേ വ്യക്തമായിരുന്നു. അതുകൊണ്ടുതന്നെ പ്രചാരണത്തിന്‍റെ അവസാനം വരെ വർഗീയ ആരോപണങ്ങൾ ഉന്നയിക്കുന്നതിൽനിന്ന്​ ഇടതു മുന്നണി നേതൃത്വം പിറകോട്ടുപോയതുമില്ല. ഇതിനിടയിൽ ഹിന്ദു മഹാസഭ നേതാവ്​ നിലമ്പൂരിൽ വന്ന്​ ഇടതു മുന്നണിക്ക്​ പിന്തുണ പ്രഖ്യാപിച്ചപ്പോൾ അങ്ങനെയൊരു സംഘടനയെ കുറിച്ചറിയില്ലെന്നായിരുന്നു പാർട്ടി സെക്രട്ടറിയുടെ പ്രതികരണം. തുടർന്ന്​ സി.പി.എം പോളിറ്റ്​ ബ്യൂറോ അംഗവും മുൻ പാർട്ടി സെക്രട്ടറി കോടിയേരി ബാലകൃഷ്​ണനും ഹിന്ദു മഹാസഭ നേതാവുമായി സംസാരിക്കുന്ന ഫോ​ട്ടോകൾ പുറത്തുവന്നു. ഇതിന്‍റെ തുടർച്ചയായാണ്​ ആർ.എസ്​.എസുമായി ചേർന്ന്​ സി.പി.എം തെരഞ്ഞെടുപ്പിൽ മത്സരിച്ചിട്ടുണ്ടെന്ന വെളിപ്പെടുത്തലുകൾ പുറത്തു വന്നത്​.

വോ​ട്ടെടുപ്പിന്​ തൊട്ടുമുമ്പത്തെ ദിവസം പാർട്ടി സെക്രട്ടറി എം.വി. ഗോവിന്ദൻ ‘മാതൃഭൂമി’ ചാനലിന്​ നൽകിയ അഭിമുഖത്തിൽ, തങ്ങൾ ആർ.എസ്​.എസുമായി കൂട്ടുകൂടിയിട്ടുണ്ടെന്ന്​ അർഥശങ്കക്കിടയില്ലാത്ത വിധം സമ്മതിക്കുകയുംചെയ്​തു. ഈ പശ്ചാത്തലത്തിലൊക്കെയാണ്​ വോ​ട്ടെണ്ണലിന്​ തലേന്ന്​ വെള്ളാപ്പള്ളി നടേശൻ ചേർത്തലയിൽ പറഞ്ഞത്​, മലപ്പുറത്തും നിലമ്പൂരിലും ഹിന്ദു, മുസ്​ലിം കൺസോളിഡേഷൻ ഉണ്ടായിട്ടുണ്ടെന്നും നിലമ്പൂരിൽ ഇടതു സ്​ഥാനാർഥി ഹിന്ദുവായതിനാൽ ഹിന്ദു വോട്ടുകൾ ഇടതു മുന്നണിക്ക്​ ലഭിക്കുമെന്നും. നിലമ്പൂർ ഉപ തെരഞ്ഞെടുപ്പിൽ ഹിന്ദു, മുസ്​ലിം വികാരമുണ്ടായെന്നും ഹിന്ദുക്കളിൽ നല്ലൊരു ഭാഗം ഇടതു സ്​ഥാനാർഥിക്ക്​ വോട്ട്​​ ചെയ്​തെന്നും ഫലം പുറത്തുവന്ന ദിവസം വെള്ളാപ്പള്ളി മാധ്യമപ്രവർത്തകരോട്​ സ്​ഥിരീകരിക്കുകയുംചെയ്​തു. വെള്ളാപ്പള്ളി പറയുന്ന ഹിന്ദു വോട്ടുകൾ ഏതാണെന്ന്​ വ്യക്തം.

നിലമ്പൂരിൽ ആര്യാടൻ ഷൗക്കത്തിന്‍റെ വിജയം ആഘോഷിക്കുന്നവർ

​മത്സരത്തെക്കുറിച്ചൊരു മറുചിന്ത

ഇനി കൗതുകകരമായ ഒരു കാര്യത്തെക്കുറിച്ചു കൂടി ചിന്തിക്കാം: നിലമ്പൂർ ഉപ തെരഞ്ഞെടുപ്പിനുള്ള സ്​ഥാനാർഥി നിർണയ ചർച്ചകൾ നടക്കുന്ന സമയത്തെ കാര്യങ്ങൾ ഒന്നുകൂടി വിലയിരുത്തുന്നത്​ കൗതുകകരമായിരിക്കും. പിണറായിസത്തോട്​ പടപൊരുതി ഇടതു മുന്നണിപ്പടി ഇറങ്ങിയ അൻവറിനെ യു.ഡി.എഫിൽ എടുക്കുകയും അദ്ദേഹം നിർദേശിച്ച, മലപ്പുറത്തെ ചില പ്രമുഖ കോൺഗ്രസ്​ നേതാക്കൾകൂടി ആഗ്രഹിച്ച ഡി.സി.സി പ്രസിഡന്‍റ്​ വി.എസ്​. ജോയിയെ സ്​ഥാനാർഥിയാക്കുകയും ചെയ്തിരുന്നെങ്കിൽ യു.ഡി.എഫിന്‍റെ ഭൂരിപക്ഷം 30,000 വോട്ടിനും 40,000ത്തിനും ഇടയിലാവുമായിരുന്നില്ലേ?

അപ്പോൾ, ബാപ്പാന്‍റെ സീറ്റ്​ ​വിട്ടുകൊടുക്കില്ലെന്നു വാശിപിടിച്ച്​ ആര്യാടൻ ഷൗക്കത്ത്​ മറുകണ്ടം ചാടിയാൽ ഇടതു മുന്നണിക്കാവില്ലേ വിജയം? ഇടക്കാല തെരഞ്ഞെടുപ്പിൽ ജോയിയെ മത്സരിപ്പിക്കുകയും അടുത്ത നിയമസഭാ തെരഞ്ഞെടുപ്പിൽ ആര്യാടൻ ഷൗക്കത്തിന്​ നിലമ്പൂർ സീറ്റ്​ ഉറപ്പുകൊടുക്കുകയും ​ചെയ്​തിരുന്നെങ്കിലോ? ഏതായാലും സംഭവിക്കേണ്ടത്​ സംഭവിച്ചു. ഉപ തെരഞ്ഞെടുപ്പു ഫലം വി.ഡി. സതീശനും കെ. സുധാകരനും പിണറായി വിജയനും എം.വി. ഗോവിന്ദനും പി.വി. അൻവറിനും രാജീവ്​ ചന്ദ്രശേഖരനും വരാൻ പോകുന്ന നിയമസഭാ തെരഞ്ഞെടുപ്പിൽ ‘ഇന്ധന’മാക്കിയാൽ അവർക്ക്​ നല്ലത്​. അതല്ല, വർഗീയ കാർഡെന്ന ഒറ്റ ശീട്ടുമായാണ്​ തെരഞ്ഞെടുപ്പിന് ഇറങ്ങുന്നതെങ്കിൽ അതിന്​ ശക്തമായ മറുപടി നൽകുക കേരളത്തിലെ വോട്ടർമാരായിരിക്കും.