പ്രതിരോധ മന്ത്രി കാര്യക്ഷമതയില്ലെന്ന്​ പറഞ്ഞ കമ്പനിക്ക്​ റെക്കോർഡ്​ ലാഭം

ബംഗളൂരു: ഹിന്ദുസ്ഥാൻ എയ്​റോനോട്ടിക്ക്​സി​​െൻറ കാര്യക്ഷമതയെ കുറിച്ച് പ്രതിരോധമന്ത്രി​ നിർമല സീതാരാമൻ ആശങ്ക പങ്കുവെച്ചതിന്​ പിന്നാലെ റെക്കോർഡ്​ ലാഭം നേടി കമ്പനി. 2017-18 സാമ്പത്തിക വർഷത്തിൽ 18,28,386 കോടിയാണ്​ എച്ച്​.എ.എല്ലി​​െൻറ ലാഭം. കഴിഞ്ഞ വർഷം ഇത്​ 17,60,379 കോടിയായിരുന്നു.

നാൽപത്​ എയർക്രാഫ്​റ്റുകളും ഹെലികോപ്​ടറുകളും എച്ച്​.എ.എൽ കഴിഞ്ഞ സാമ്പത്തിക വർഷത്തിൽ നിർമിച്ചിട്ടുണ്ട്​​. ഇതിന്​ പുറമേ 220 എയർക്രാഫ്​റ്റ്​ എൻജിനുകളും 550 ഹെലികോപ്​ടർ എൻജിനുകളും കമ്പനി കഴിഞ്ഞ സാമ്പത്തിക വർഷത്തിൽ നിർമിച്ചു​. എച്ച്​.എ.എൽ ഒാഹരി ഉടമകളുടെ യോഗത്തിലാണ്​ കമ്പനിയുടെ ലാഭകണക്ക്​ പുറത്ത്​ വിട്ടത്​.

റഫാൽ ഇടപാടിൽ എച്ച്​.എ.എല്ലിനെ ഒഴിവാക്കിയതുമായി ബന്ധപ്പെട്ട വിവാദങ്ങൾ സജീവമാവുന്നതിനിടെയാണ്​ കമ്പനിയുടെ കണക്കുകൾ പുറത്ത്​ വന്നിരിക്കുന്നത്​. എച്ച്​.എ.എല്ലിന്​ റഫാൽ വിമാനം നിർമിക്കാനുള്ള ശേഷിയില്ലാത്തതിനാലാണ്​ സ്ഥാപനത്തെ കരാറിൽ നിന്ന്​ ഒഴിവാക്കാൻ തീരുമാനിച്ചതെന്ന്​ നിർമലാ സീതാരാമൻ പറഞ്ഞിരുന്നു.