മോദിയുടെ അവകാശ വാദം തെറ്റ്​; സമ്പദ്​വ്യവസ്ഥയിൽ വളർച്ചയില്ല

വാഷിങ്​ടൺ: സമ്പദ്​വ്യവസ്ഥയുടെ വളർച്ച സംബന്ധിച്ച കേ​ന്ദ്രസർക്കാറി​​െൻറ അവകാശ വാദം തെറ്റെന്ന്​ സാമ്പത്തിക വിദഗ്​ധർ. സമ്പദ്​വ്യവസ്ഥയിൽ ഏഴ്​ ശതമാനം വളർച്ചയുണ്ടെന്നായിരുന്നു സർക്കാറി​​െൻറ കണക്കുകൾ. എന്നാൽ റിപ്പോർട്ടിലുള്ളത്ര വളർച്ച രാജ്യത്തെ സമ്പദ്​വ്യവസ്ഥയിൽ ഉണ്ടായിട്ടില്ലെന്നായിരുന്നു  വിദഗ്​ധരുടെ അഭിപ്രായം. ഇന്ത്യയിലെ സാമ്പത്തിക രംഗത്തെ പ്രമുഖ ശാസ്​ത്രജ്ഞരിലൊരാളായ വിജയ്​ ജോഷിയാണ്​ ഇതു സംബന്ധിച്ച്​ അഭിപ്രായം ​പ്രകടനം നടത്തിയത്​. 

രാജ്യത്തെ കയറ്റുമതിയിലും ഇറക്കുമതിയിലും പുരോഗതി ഉണ്ടായിട്ടില്ലെന്ന്​ അദ്ദേഹം ചൂണ്ടിക്കാട്ടുന്നു. കയറ്റുമതിയിലും ഇറക്കുമതിയിലും ഉണ്ടാവുന്ന വളർച്ച വളരെ കുറവാണ്​. തൊഴിൽ മേഖലയിലും അവസരങ്ങൾ കുറഞ്ഞ്​ വരികയാണ്​. വ്യാവസായിക ഉൽപ്പാദനവും ബാങ്ക്​ ക്രെഡിറ്റും കുറഞ്ഞ്​ വരികയാണെന്നും അദ്ദേഹം ചൂണ്ടിക്കാട്ടുന്നു. 2011ൽ ആകെ ജി.ഡി.പിയുടെ 34 ശതമാനവും നിക്ഷേപമായിരുന്നു. എന്നാൽ നിലവിൽ 27 ശതമാനമാണ്​ ആകെ ജി.ഡി.പിയിൽ നിഷേപത്തി​​െൻറ തോത്​. ഇൗയൊരു സാഹചര്യത്തിൽ ജി.ഡി.പി 7 ശതമാനം നിരക്കിൽ വളരുന്നുണ്ടെന്ന്​ വിശ്വസിക്കാൻ പ്രയാസമുണ്ടെന്നായിരുന്നു വിജയ്​ ജോഷി അഭിപ്രായപ്പെട്ടത്​. 

നിലവിലെ സാഹചര്യത്തിൽ ജി.ഡി.പി വളർച്ച 5 മുതൽ 5.5 ശതമാനം വരെ വളർച്ച നിരക്കാണ്​ ഇന്ത്യൻ സമ്പദ്​വ്യവസ്ഥക്ക്​ ഉണ്ടാകുകയുള്ളു എന്നും അദ്ദേഹം പറഞ്ഞു. അതിവേഗത്തിൽ ജി.ഡി.പി വളർച്ച ഉണ്ടായത്​ ചൈന, സിംഗപൂർ, തയ്​വാൻ, ദക്ഷിണ കൊറിയ എന്നീ രാജ്യങ്ങളിൽ മാത്രമാണെന്നും ജോഷി ചൂണ്ടിക്കാട്ടുന്നു. ഇതാദ്യമല്ല ഇന്ത്യൻ ജി.ഡി.പിയുടെ വളർച്ച നിരക്ക്​ സംബന്ധിച്ച്​ സാമ്പത്തിക വിദഗ്​ധർ ആശങ്കയുയർത്തുന്നത്​. മേക്ക്​ ഇൻ ഇന്ത്യ, ഡിജിറ്റൽ ഇന്ത്യ പോലുള്ള വൻ പരിപാടികൾ ഉയർത്തിക്കാട്ടി സാമ്പത്തിക രംഗത്ത്​ വളർച്ചയുണ്ടെന്ന്​ മോദി സർക്കാർ അവകാശവാദം ഉയർത്തുന്നുണ്ടെങ്കിലും അതെല്ലാം തെറ്റാണെന്ന്​ തെളിയിക്കുന്നതാണ്​ ഇത്​ സംബന്ധിച്ച യഥാർഥ കണക്കുകളെന്നാണ്​ വിദഗ്​ധർ ചൂണ്ടിക്കാട്ടുന്നു​.