പെട്രോൾ-ഡീസൽ വില ഇന്നും കൂടും

ന്യൂഡൽഹി: രാജ്യത്ത് പെട്രോൾ-ഡീസൽ വില വ്യാഴാഴ്ചയും ഉയരും. പെട്രോൾ ലിറ്ററിന് 87 പൈസയും ഡീസലിന് 84 പൈസയുമാണ് വർധിക്കുക. ഇ​തോടെ രാജ്യതലസ്ഥാനമായ ഡൽഹിയിൽ ഒരു ലിറ്റർ പെട്രോളിന്റെ വില 101.81 രൂപയായി ഉയരും. ഡീസൽ വില 93.07 രൂപയായാണ് വർധിക്കുക.

കഴിഞ്ഞ കുറേ ദിവസങ്ങളായി എണ്ണകമ്പനികൾ പെട്രോൾ-ഡീസൽ വില ഉയർത്തിയിരുന്നു. മാർച്ച് 22 മുതലാണ് കമ്പനികൾ വില കൂട്ടാൻ തുടങ്ങിയത്. മാർച്ച് 22ന് ശേഷം പെട്രോൾ വില 6.40 രൂപയാണ് ഉയർത്തിയത്. ഡീസലിനും സമാനമായി വില വർധിപ്പിച്ചിരുന്നു. അഞ്ച് സംസ്ഥാനങ്ങളിലേക്കുള്ള തെരഞ്ഞെടുപ്പായതിനാൽ തുടർച്ചയായ 137 ദിവസം കമ്പനികൾ എണ്ണവിലയിൽ മാറ്റം വരുത്തിയിരുന്നില്ല.

അതേസമയം, അന്താരാഷ്ട്രവിപണിയിൽ ബ്രെന്റ് ക്രൂഡിന്റെ വില ബാരലിന് 2.80 ഡോളർ വർധിച്ച് 112.7ലെത്തി. വെസ്റ്റ് ടെക്സാസ് ഇന്റർമീഡിയേറ്റ് ക്രൂഡിന്റെ വില 107 ഡോളറിലുമെത്തി.