മികവുള്ളവർക്ക്​ നേരത്തെ ബിരുദം നേടാം; മാർഗരേഖയായി; രണ്ടര വർഷം കൊണ്ട്​ ത്രിവത്സര ബിരുദവും മൂന്നര വർഷം കൊണ്ട്​ നാലുവർഷ ബിരുദവും നേടാം

തിരുവനന്തപുരം: സംസ്ഥാനത്തെ കോളജുകളിൽ കഴിഞ്ഞവർഷം ആരംഭിച്ച നാലു​ വർഷ ബിരുദ കോഴ്​സ് മികവ്​ പുലർത്തുന്ന വിദ്യാർഥികൾക്ക്​​ വേഗത്തിൽ പൂർത്തിയാക്കാൻ മാർഗരേഖ പുറത്തിറങ്ങി. എട്ട്​ സെമസ്റ്റർ ദൈർഘ്യമുള്ള കോഴ്​സ്​ ഏഴ്​ സെമസ്റ്റർ കാലയളവിൽ പൂർത്തിയാക്കാവുന്ന രീതിയിലാണ്​ മാർഗരേഖ​. ആറ്​ സെമസ്റ്റർ അടങ്ങിയ മൂന്നു​ വർഷ ബിരുദ കോഴ്​സ്​ ഇതേ മാതൃകയിൽ അഞ്ച്​ സെമസ്റ്റർ കാലയളവിലും പൂർത്തിയാക്കാം. ത്വരിതഗതിയിലുള്ള ബിരുദപഠനം പൂർത്തിയാക്കാൻ ആഗ്രഹിക്കുന്നവർ രണ്ടാം സെമസ്റ്ററിന്‍റെ അവസാനത്തിൽ ഇതിനായി അപേക്ഷിക്കണം. വിദ്യാർഥി ഓരോ സെമസ്റ്ററിലും 85 ശതമാനത്തിൽ കൂടുതൽ ഗ്രേഡ്​​ പോയന്‍റ്​ ആവറേജിൽ മാർക്ക്​ നേടിയിരിക്കണം.

വിദ്യാർഥി നാലു വർഷ ബിരുദ കോഴ്​സിന്‍റെ മാനദണ്ഡപ്രകാരമുള്ള 42 ക്രെഡിറ്റുകൾ ആദ്യ രണ്ട്​ സെമസ്റ്ററിലുമായി ആർജിച്ചിരിക്കണം. അധിക പഠനഭാരം വഹിക്കാനുള്ള ശേഷിയും വിദ്യാർഥി തെളിയിച്ചിരിക്കണം. നേരത്തെ പൂർത്തിയാക്കുന്ന ബിരുദ കോഴ്​സ്​ എന്ന നിലയിൽ ഇവ ആക്സിലറേറ്റഡ്​ ഡിഗ്രി പ്രോഗ്രാം (എ.ഡി.പി) എന്ന പേരിലായിരിക്കും അറിയപ്പെടുക. കോഴ്​സ്​ നിശ്ചയിച്ചതിലും ഒരു സെമസ്​റ്റർ നേരത്തെ പൂർത്തിയാക്കുന്നതിനാൽ ‘എൻ-1 സെമസ്റ്റർ’ എന്ന പേരിലും ഈ രീതി അറിയപ്പെടും. ഉന്നത വിദ്യാഭ്യാസമന്ത്രി ഡോ. ആർ. ബിന്ദുവും സർവകലാശാല പ്രതിനിധികളും പ​ങ്കെടുത്ത യോഗത്തിലാണ്​ മാർഗരേഖ അംഗീകരിച്ചത്​​.

അധിക ക്രെഡിറ്റ്​ ഓൺലൈൻ ക്ലാസ്​ വഴി

ത്വരിത ബിരുദ പഠനത്തിനായി നേടേണ്ട അധിക ക്രെഡിറ്റുകൾ ആർജിക്കാൻ ഓൺലൈൻ ക്ലാസുകളിൽ​ ഹാജരായി നേടാം. കോളജുകളിൽ ഇതിന്​ മതിയായ അധ്യാപകരില്ലെങ്കിൽ പഠന ബോർഡുകളുടെ സഹായത്തോടെ സർവകലാശാലകൾക്ക്​ ഓൺലൈൻ ക്ലാസുകൾ നടത്താം. സ്വയം സന്നദ്ധരാകുന്ന അധ്യാപകർക്ക്​ ഇത്തരം വിഷയങ്ങളിൽ ക്ലാസുകൾ നടത്താം. യു.ജി.സിയുടെ ‘സ്വയം’ പ്ലാറ്റ്​ഫോം വഴിയുള്ള ഓൺലൈൻ കോഴ്​സുകൾ വഴിയും അധിക ക്രെഡിറ്റ്​ നേടാം. ഈ കോഴ്​സുകൾക്ക്​ ചേരുന്ന വിദ്യാർഥികൾക്ക് കോളജുകൾ​ മാർഗദർശിയെ നിശ്ചയിച്ചുനൽകണം.

അഞ്ച്​ സെമസ്റ്ററിൽ 133 ക്രെഡിറ്റ്​; ഏഴ്​ സെമസ്റ്ററിൽ 177 ക്രെഡിറ്റ്​

മൂന്നു​ വർഷ ബിരുദ കോഴ്​സ്​ രണ്ടര വർഷം കൊണ്ട്​ അഞ്ച്​ സെമസ്റ്റർ കാലയളവിൽ പൂർത്തിയാക്കാൻ വിദ്യാർഥി മൂന്നു​ മുതൽ അഞ്ചു​ വരെ സെമസ്റ്ററുകളിൽ അധികമായി എട്ടു​ വീതം ക്രെഡിറ്റുകൾ നേടേണ്ടിവരും. അഞ്ച്​ സെമസ്​റ്റർ കാലയളവിൽ മൊത്തം 133 ക്രെഡിറ്റ്​ ആർജിച്ചാൽ വിദ്യാർഥിക്ക്​ ത്രിവത്സര ബിരുദം ലഭിക്കും. നാലു വർഷ ബിരുദ കോഴ്​സിന്​ ആവശ്യമായ 177 ക്രെഡിറ്റ്​ മൂന്നരവർഷം കൊണ്ട്​ ഏഴ്​ സെമസ്റ്റർ കാലയളവിൽ പൂർത്തിയാക്കുന്നവർക്ക്​ ഓണേഴ്​സ്​ ബിരുദം/ ഓണേഴ്​സ്​ വിത്ത്​ റിസർച്ച്​ ബിരുദം ലഭിക്കും.

ഈ വിദ്യാർഥികളും മൂന്നു മുതൽ ഏഴുവരെ സെമസ്റ്ററുകളിൽ അധികമായി ശരാശരി എട്ടു സെമസ്റ്ററുകൾ വീതം അധികമായി നേടേണ്ടിവരും. എ.ഡി.പി ബിരുദ കോഴ്​സിനുള്ള അപേക്ഷ കോളജ്​ പ്രിൻസിപ്പൽ ചെയർപേഴ്​സണും പഠനവകുപ്പ്​ മേധാവി കൺവീനറുമായ അഞ്ചംഗ എ.ഡി.പി കമ്മിറ്റി പരിശോധിച്ച്​ യോഗ്യതയുള്ളവരെ രേഖാമൂലം അനുമതി അറിയിക്കണം. പ്രതീക്ഷിച്ച അക്കാദമിക മികവ്​ പുലർത്താൻ കഴിയാത്തവർക്ക്​ ത്വരിത ബിരുദ പഠനത്തിൽ പുറത്തുപോകാൻ അവസരമുണ്ടായിരിക്കും. മതിയായ കാരണത്തോടെ സ്വയം പിന്മാറാനും അവസരമുണ്ടാകും.