വി.എച്ച്​.എസ്​.ഇ കോഴ്​സുകൾക്ക്​ പുതുമോടി

തിരുവനന്തപുരം: പത്താം ക്ലാസ്​ വിജയിച്ചവരിൽ ഹയർസെക്കൻഡറി പഠന​ത്തിനൊപ്പം തൊഴിൽ വൈദഗ്​ധ്യം കൂടി ആഗ്രഹിക്കുന്നവർക്ക്​ വി.എച്ച്​.എസ്​.ഇകളിൽ പുതുതായി ആരംഭിച്ച എൻ.എസ്​.ക്യു.എഫ് കോഴ്​സുകളിൽ ചേരാം. കഴിഞ്ഞ 29ന്​ തുടങ്ങിയ അപേക്ഷ സമർപ്പണം ആഗസ്​റ്റ്​ 14ന്​ അവസാനിക്കും. www.vhscap.kerala.gov.in എന്ന പോർട്ടലിലൂടെയാണ്​ അപേക്ഷിക്കേണ്ടത്​. ഒരാഴ്​ചക്കകം 28,312 ഒാൺലൈൻ അപേക്ഷകളാണ്​ ലഭിച്ചത്​. ഇൗ വർഷം 33,030 സീറ്റുകളാണ്​ വി.എച്ച്​.എസ്​.ഇയിലുള്ളത്​. സംസ്​ഥാനത്തെ 389 വി.എച്ച്​.എസ്​.ഇകൾ ഇൗ വർഷം മുതൽ പൂർണമായും ദേശീയ നൈപുണി വിദ്യാഭ്യാസ പദ്ധതി ചട്ടക്കൂട്​ (എൻ.എസ്​.ക്യു.എഫ്​) പ്രകാരമുള്ള പാഠ്യപദ്ധതിയിലേക്ക്​ മാറുകയാണ്​. 10 ലെവലുകളിലായി ഒ​േട്ടറെ കോഴ്സുകളുള്ള എൻ.എസ്​.ക്യു.എഫ്​ പ്രകാരം വി.എച്ച്.എസ്.ഇ കോഴ്​സ്​ പൂർത്തിയാക്കുന്ന വിദ്യാർഥിക്ക്​ ലെവൽ നാല് സ്കിൽ സർട്ടിഫിക്കറ്റാണ് ലഭിക്കുക. വിജയിക്കുന്ന വിദ്യാർഥികൾക്ക്​ സംസ്​ഥാനത്തെ പ്രഫഷനല്‍/പോളിടെക്‌നിക് കോഴ്‌സുകള്‍ക്ക് സീറ്റ്​ നീക്കിവെക്കുമെന്നും വിദ്യാഭ്യാസവകുപ്പ്​ ഉറപ്പുനൽകുന്നു​.

അഗ്രികള്‍ച്ചര്‍, ഇലക്ട്രോണിക്‌സ് ആൻഡ്​​ ഹാര്‍ഡ്‌വെയര്‍, മീഡിയ ആൻഡ്​ എൻറര്‍ടൈന്‍മെൻറ്​, ​െഎ.ടി - ​െഎ.ടി അധിഷ്ഠിത സര്‍വിസുകള്‍, പവര്‍സെക്റ്റര്‍, ഓട്ടോമോട്ടിവ്, കണ്‍സ്ട്രക്​ഷന്‍, ടെക്‌സ്​റ്റൈല്‍സ് ആൻഡ്​​ ഹാൻറ്​ലൂം, അപ്പാരല്‍, കെമിക്കല്‍ ആൻഡ്​​ പെട്രോകെമിക്കല്‍, ടെലികോം, ഇന്ത്യന്‍ പ്ലംബിങ് അസോസിയേഷന്‍, ഹെല്‍ത്ത് കെയര്‍, ബ്യൂട്ടി ആൻഡ്​​ വെല്‍നെസ്, ഫുഡ് ഇൻഡസ്ട്രി കപ്പാസിറ്റി ആൻഡ്​​ സ്‌കില്‍ ഇനിഷ്യേറ്റിവ്, സ്‌പോര്‍ട്‌സ്, ബാങ്കിങ് ഫിനാന്‍ഷ്യല്‍ സര്‍വിസസ് ആൻഡ്​​ ഇന്‍ഷുറന്‍സ്, ഓഫിസ് അഡ്മിനിസ്‌ട്രേഷന്‍ ആൻഡ്​​ ഫെസിലിറ്റി മാനേജ്‌മെ​ൻറ്​ തുടങ്ങിയ തൊഴിൽ മേഖലകളിലെ കോഴ്​സുകളിലേക്കാണ്​ പ്രവേശനം.