ഐ.​എ.എസ് ഓഫിസർക്കാണോ സൈനിക ഓഫിസർക്കാണോ ഇന്ത്യയിൽ കൂടുതൽ അധികാരം​?

ന്യൂഡൽഹി: ഇന്ത്യൻ അഡ്മിനിസ്ട്രേറ്റീവ് സർവീസും ഇന്ത്യൻ ആർമി സർവീസും നമ്മുടെ രാജ്യത്ത് ഏറെ ആദരിക്കപ്പെടുന്ന രണ്ട് തൊഴിൽ മേഖലകളാണ്. രണ്ട് കരിയറുകളും രാഷ്ട്രത്തിന്റെ സുഗമമായ ​പ്രവർത്തനത്തിന് അത്യന്താപേക്ഷിതമാണ്. ഐ.എ.എസ് ഉദ്യോഗസ്ഥർ ഭരണസംവിധാനം നിയന്ത്രിക്കുമ്പോൾ സൈനിക ഉദ്യോഗസ്ഥർ ദേശീയ സുരക്ഷ ഉറപ്പാക്കുന്നു. ആർക്കാണ് ഏറ്റവും കൂടുതൽ അധികാരം എന്നത് പലർക്കും ഉണ്ടാകുന്ന സംശയമാണ്. അതിന്റെ ഉത്തരം സങ്കീർണമാണ്.

ഭരണപരവും പ്രവർത്തനപരവും സ്വാധീനപരവുമായ മേഖലകളിൽ ഈ രണ്ട് തൊഴിൽ മേഖലകളുടെയും അധികാരം വ്യത്യസ്തമായാണ് പ്രകടമാകുന്നത്. ഐ.എ.എസ് ഓഫിസർമാരുടെയും സൈനിക ഉദ്യോഗസ്ഥരുടെയും അധികാരങ്ങളെയും ചുമതലകളെയും കുറിച്ച് പരിശോധിക്കുകയാണ് ഇവിടെ.

രണ്ട് ഓഫിസർമാരുടെയും അധികാരങ്ങളെ പ്രധാനമായും മൂന്ന് വിഭാഗങ്ങളായി തിരിക്കാം

1. ഭരണപരമായ അധികാരം: സർക്കാർ പ്രവർത്തനങ്ങൾ കൈകാര്യം ചെയ്യുന്നതിനും നയങ്ങൾ രൂപീകരിക്കുന്നതിനും വിഭവങ്ങൾ അനുവദിക്കുന്നതിനുമുള്ള അധികാരം.

2. പ്രവർത്തന അധികാരം: നിർദിഷ്ട ജോലികളിലോ ദൗത്യങ്ങളിലോ ഉദ്യോഗസ്ഥരുടെയും വിഭവങ്ങളുടെയും മേൽ നേരിട്ടുള്ള അധികാരം.

3. സ്വാധീനശക്തി: തീരുമാനങ്ങൾ, നയങ്ങൾ, പൊതുജനാഭിപ്രായം എന്നിവ രൂപപ്പെടുത്താനുള്ള കഴിവ്.

സിവിലിയൻ ഭരണ ചട്ടക്കൂടിനുള്ളിൽ ഭരണപരവും സ്വാധീനപരവുമായ അധികാരമാണ് ഐ.എ.എസ് ഉദ്യോഗസ്ഥർ പ്രധാനമായും പ്രയോഗിക്കുന്നത്. അപ്പോൾ സൈനിക ഉദ്യോഗസ്ഥർ സൈനിക മേഖലയിൽ പ്രവർത്തനപരവും സ്വാധീന പരവുമായ അധികാരം വഹിക്കുന്നു. ഇവരുടെ റോളുകൾ താരതമ്യം ചെയ്യുന്നതിന് ഈ വ്യത്യസ്ത മേഖലകളിലെ അവരുടെ അധികാരം പരിശോധിക്കേണ്ടത് അത്യാവശ്യമാണ്.

ഭരണപരമായ അധികാരം: ജില്ലാ, സംസ്ഥാന, കേന്ദ്ര തലങ്ങളിൽ പ്രവർത്തിക്കുന്ന ഐ‌.എ‌.എസ് ഉദ്യോഗസ്ഥർ ഇന്ത്യയുടെ ഭരണ സംവിധാനത്തിന്റെ നട്ടെല്ലാണ്. സ്വച്ഛ് ഭാരത് അല്ലെങ്കിൽ ആരോഗ്യ ഇൻഷുറൻസ് പദ്ധതികൾ പോലുള്ള സർക്കാർ പദ്ധതികൾ നടപ്പാക്കൽ, ക്രമസമാധാനപാലനം, റവന്യൂ പിരിവ്, പൊതുജനക്ഷേമം, ദുരന്ത നിവാരണ പ്രവർത്തനങ്ങൾ ഏകോപിപ്പിക്കുക തുടങ്ങിയ സുപ്രധാന അധികാരങ്ങൾ ഐ.എ.എസ് ഉദ്യോഗസ്ഥർക്ക് ഏറ്റെടുക്കാൻ കഴിയും. ഉദാഹരണമായി അടിയന്തര ഘട്ടങ്ങളിൽ നിയമം കൈയിലെടുക്കാനുള്ള അധികാരം ഐഎഎസ് ഉദ്യോഗസ്ഥർക്ക് നൽകുന്നു. ജില്ലാ കലക്ടർ ഒരു ജില്ലയുടെ ഭരണത്തിന്റെ മേൽനോട്ടം വഹിക്കുന്നു.

അതേസമയം, സൈനിക ഉദ്യോഗസ്ഥരുടെ ഭരണപരമായ അധികാരം സൈന്യത്തിൽ മാത്രമായി പരിമിതപ്പെടുത്തിയിരിക്കുന്നു. എന്നാൽ ഐ.എ.എസ് ഉദ്യോഗസ്ഥർ ജനങ്ങളുമായി ബന്ധപ്പെട്ട കുറെ കാര്യങ്ങൾ ​ചെയ്യുന്നു. സൈനിക സാഹചര്യങ്ങളിൽ സൈനിക ഉദ്യോഗസ്ഥർക്ക് കൂടുതൽ പ്രവർത്തന അധികാരമുണ്ട്. അതിർത്തി സംഘർഷങ്ങൾ അല്ലെങ്കിൽ ഭീകരവിരുദ്ധ പ്രവർത്തനങ്ങൾ പോലുള്ള സൈനിക തന്ത്രങ്ങൾ ആസൂത്രണം ചെയ്യുകയും നടപ്പാക്കുക ചെയ്യുക എന്നത് ഉദാഹരണം.

അതുപോലെ ഭൂചനം പോലുള്ള മാനുഷിക ദുരന്തങ്ങളുണ്ടാകുമ്പോൾ സൈന്യത്തിന്റെ രക്ഷാപ്രവർത്തനം അനിവാര്യമാണ്.

അടിയന്തര ഘട്ടങ്ങളിൽ സിവിലിയൻ പ്രതികരണങ്ങൾ ഏകോപിപ്പിക്കുന്നതിൽ ഐ.എ.എസ് ഉദ്യോഗസ്ഥർ നിർണായകമാണെങ്കിലും, സായുധ സേനയുടെയോ നിയമ നിർവഹണ സംവിധാനത്തിന്റെയോ മേൽ അവർക്ക് നേരിട്ടുള്ള പ്രവർത്തന നിയന്ത്രണം ഇല്ല. വെള്ളപ്പൊക്കം അല്ലെങ്കിൽ കലാപങ്ങൾ പോലുള്ള ദുരിതാശ്വാസ പ്രവർത്തനങ്ങൾ കൈകാര്യം ചെയ്യുന്നതുപോലുള്ള മേൽനോട്ടവും ഏകോപനവുമാണ് അവരുടെ പ്രവർത്തന പങ്ക്. അങ്ങനെ നോക്കുമ്പോൾ സൈനിക ഉദ്യോഗസ്ഥർ അവരുടെ ചട്ടക്കൂടിനുള്ളിലെ പ്രവർത്തന ശക്തിയിൽ ആധിപത്യം പുലർത്തുന്നു.

മന്ത്രിമാരുമായും നയരൂപീകരണ വിദഗ്ധരുമായും ഐ.എ.എസ് ഉദ്യോഗസ്ഥർക്ക് നേരിട്ട് ബന്ധമുണ്ട്. ഐ.എ.എസ് ഉദ്യോഗസ്ഥരെ മന്ത്രിമാരുടെ കണ്ണും ചെവിയും എന്നാണ് വിശേഷിപ്പിക്കാറുള്ളത് തന്നെ. സൈനിക നടപടികളിൽ ഏർപ്പെടണോ വേണ്ടയോ എന്നതുപോലുള്ള ദേശീയ സുരക്ഷാ തീരുമാനങ്ങളിൽ പോലും ഐ‌.എ‌എസ് ഉദ്യോഗസ്ഥരും പ്രധാനമന്ത്രിയും നിർണായക പങ്ക് വഹിക്കുന്നു. അവരുടെ തീരുമാനങ്ങൾ നടപ്പിലാക്കുന്നതിനായി സൈനിക ജനറൽമാർക്ക് അയക്കുന്നു.

പ്രതിരോധ തന്ത്രങ്ങൾ, സൈനിക നയതന്ത്രം, ദേശീയ സുരക്ഷാ നയങ്ങൾ എന്നിവയിൽ സൈനിക ഉദ്യോഗസ്ഥർ സ്വാധീനം ചെലുത്തുന്നു. ജനറൽമാർ പോലുള്ള മുതിർന്ന ഉദ്യോഗസ്ഥർ യുദ്ധത്തിന്റെയും സമാധാനത്തിന്റെയും കാര്യങ്ങളിൽ ഉപദേശം നൽകുന്നു. സൈനിക ഇടപെടലുകളിലൂടെ അന്താരാഷ്ട്ര ബന്ധങ്ങളെ സ്വാധീനിക്കുന്നു. സൈനിക ഉദ്യോഗസ്ഥരുടെ സ്വാധീനം സുരക്ഷയിലും പ്രതിരോധത്തിലുമാണ് കൂടുതൽ ശ്രദ്ധ കേന്ദ്രീകരിക്കുന്നത്.

റാങ്കും ശ്രേണിയും

സത്യത്തിൽ രണ്ട് ഉദ്യോഗസ്ഥരുടെയും റാങ്കുകൾ തമ്മിലെ താരതമ്യം എളുപ്പമല്ല. ഒരു ലെഫ്റ്റനന്റ് സൈനിക ഉദ്യോഗസ്ഥന്റെ റാങ്ക് അസിസ്റ്റന്റ് കലക്ടർക്ക് തുല്യമാണ്. അതുപോലെ ഒരു കരസേന മേജർ ജനറൽ സംസ്ഥാന സെക്രട്ടറിയുടെ പദവിക്ക് തുല്യമാണ്. സൈനിക ജനറലിനെ നമുക്ക് സിവിൽ സർവീസിലെ ഏറ്റവും ഉയർന്ന പോസ്റ്റായ കാബിനറ്റ് സെ​ക്രട്ടറിയോട് താരതമ്യപ്പെടുത്താം. മുൻഗണന ക്രമം നോക്കുനേപാൾ കാബിനറ്റ് സെക്രട്ടറി ഉയർന്ന റാങ്കിലാണ്. രണ്ട് പദവിക്കും വളരെയധികം ബഹുമാനം ലഭിക്കുന്നു. രണ്ട് റോളിനും വ്യത്യസ്തമായ ഉത്തരവാദിത്തങ്ങളുമുണ്ട്. ഐ.എ.എസ് ഉദ്യോഗസ്ഥരുടെ ജോലികളിൽ പലപ്പോഴും രാഷ്ട്രീയ നേതാക്കളുടെ സ്വാധീനം പ്രകടമാകും.

ദുരന്തനിവാരണം മുതൽ നയരൂപീകരണം വരെയുള്ള വൈവിധ്യമാർന്ന ഉത്തരവാദിത്തങ്ങൾ കൈകാര്യം ചെയ്യുകയും വേണം. സൈനിക ഉദ്യോഗസ്ഥർക്ക് കഠിനമായ ശാരീരിക അധ്വാനം ആവശ്യമാണ്. ചുരുക്കിപ്പറഞ്ഞാൽ ഐ.എ.എസ് ഉദ്യോഗസ്ഥരും സൈനിക ഓഫിസറും രാജ്യത്തിന്റെ മുന്നോട്ടുള്ള പ്രവർത്തനത്തിന് ഒഴിച്ചു കൂടാനാവാത്തതാണ്. ഐ.എ.എസ് ഉദ്യോഗസ്ഥർ രാഷ്ട്രത്തിന്റെ ഭരണ എൻജിനെ ചലിപ്പിക്കുമ്പോൾ സൈനിക ഉദ്യോഗസ്ഥർ അതിന്റെ പരമാധികാരം സംരക്ഷിക്കുന്നു.