ഹൗസ് ബോട്ടിലെ മേശയുടെ ഗ്ലാസ് പൊട്ടി, ജീവനക്കാരും യാത്രക്കാരും തമ്മിൽ ഏറ്റുമുട്ടി, വിനോദസഞ്ചാരി കുഴഞ്ഞു വീണുമരിച്ചു

ആലപ്പുഴ: ഹൗസ് ബോട്ടിൽ ഗ്ലാസ്​ പൊട്ടിയതിനെതുടർന്നുണ്ടായ തർക്കത്തിനിടെ വിനോദസഞ്ചാരി കുഴഞ്ഞു വീണുമരിച്ചു. ചെന്നൈ വർഷമേൽപട്ട് മുഹമ്മദ് ഗാവുസ് സ്ട്രീറ്റിൽ വൈ. മുഹമ്മദ് സുൽത്താനാണ്​ (48)​ മരിച്ചത്.

പുന്നമട സ്വദേശി ജോസഫ് ജോണിന്‍റെ ഉടമസ്‌ഥതയിലുള്ള കാലിപ്സ് ഹൗസ് ബോട്ടിൽ ചൊവ്വാഴ്ച രാവിലെ 8.30ന് പുന്നമട ഫിനിഷിങ് പോയന്‍റിലാണ്​ സംഭവം. ചെന്നെയിൽ നിന്ന്​ 26പേരാണ് തിങ്കളാഴ്‌ച ആലപ്പുഴയിൽ എത്തിയത്.

ബോട്ടിങ് കഴിഞ്ഞ് തിരികെ ഇറങ്ങാനുള്ള തയാറെടുപ്പിനിടെ ഹൗസ് ബോട്ടിലെ മേശയുടെ ഗ്ലാസ് പൊട്ടിയതുമായി ബന്ധപ്പെട്ട് ഹൗസ് ബോട്ട് ജീവനക്കാരും യാത്രക്കാരും തമ്മിൽ വാക്കുതർക്കായി. ഇത്​ കൈയേറ്റത്തിൽ കലാശിച്ചതിന്​ പിന്നാലെ സുൽത്താൻ കുഴഞ്ഞുവീഴുകയായിരുന്നു. ഉടൻ ആലപ്പുഴ ജനറൽ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

മൃതദേഹം ആലപ്പുഴ മെഡിക്കൽ കോളജിൽ പോസ്​റ്റുമോർട്ടത്തിനു ശേഷം ബന്ധുക്കൾക്ക് വിട്ടു നൽകി. കൈ​യേറ്റത്തിനിടെ ജീവനക്കാരായ അഭിജിത്തിനും പരിക്കേറ്റെന്ന്​ ടൂറിസം പൊലീസ്​ പറഞ്ഞു. തലക്ക്​ പരിക്കേറ്റ ഇയാളെ ആലപ്പുഴ മെഡിക്കൽ കോളേജിൽ ചികിത്സ നൽകി വിട്ടയച്ചു. ആലപ്പുഴ നോർത്ത് പൊലീസ് അസ്വഭാവിക മരണത്തിന്​ കേസെടുത്തു.