ഒറ്റ ഷോട്ടിൽ സിനിമ; വിസ്​മയിപ്പിക്കാൻ 12 വയസ്സുകാരൻ ആഷിക്​ ജിനു വരുന്നു

കൊച്ചി: സിംഗിൾ ഷോട്ടിൽ ഒരു സിനിമ ചിത്രീകരിച്ച്​ വിസ്​മയിപ്പിക്കാൻ ഒരുങ്ങുകയാണ് കുട്ടി സംവിധായകൻ ആഷിക്​ ജിനു. ഒന്നേ മുക്കാൻ മണിക്കൂർ ദൈർഘ്യമുള്ള ഈ സിനിമ അത്ര തന്നെ സമയം കൊണ്ട്​ ചിത്രീകരിക്കുകയും ചെയ്​താണ്​ ഈ 12 വയസ്സുകാരൻ ശ്രദ്ധ നേടുന്നത്​. 'കൊളംബിയൻ അക്കാഡമി' എന്ന്​ പേരിട്ടിരിക്കുന്ന സിനിമ 2021ലെ ചെറിയ പെരുന്നാളിന്​ റിലീസ് ചെയ്യാനാണ്​ ഉദ്ദേശിച്ചിരുന്നതെങ്കിലും ലോക്​ഡൗൺ മൂലം നീട്ടിവെച്ചിരിക്കുകയാണ്​. ​

2019ൽ പത്താം വയസ്സിൽ ഉപഭോക്​തൃ ബോധവത്​കരണത്തിന്​ വേണ്ടി പീടിക എന്ന ഹ്രസ്വചിത്രം സംവിധാനം ചെയ്​താണ്​ ആഷിക്​ ജിനു വാർത്തകളിൽ ഇടംപിടിക്കുന്നത്​. ഇന്ത്യയിലെ ഏറ്റവും പ്രായം കുറഞ്ഞ സംവിധായകൻ എന്ന യൂനിവേഴ്​സൽ റെക്കോർഡ്​ ഫോറമിന്‍റെ അവാർഡ്​ ഈ ചിത്രം ആഷികിന്​ നേടി കൊടുത്തുരുന്നു.

തുടർന്ന് ഏഴോളം ഹ്രസ്വ ചിത്രങ്ങളും രണ്ട് ഡോക്യുമെന്‍ററിയും സംവിധാനം ചെയ്​തു. അതിൽ 'പശി' എന്ന ഹ്രസ്വചിത്രത്തിന് മികച്ച സംവിധായകനുള്ള ട്രാവൻകൂർ ഇന്‍റർനാഷണൽ അവാർഡും ലഭിച്ചു. 'ഫിലിപ്പ്' എന്ന ഹ്രസ്വചിത്രവും കഴിഞ്ഞ വർഷം ലോക്​ഡൗൺ സമയത്ത് സംവിധാനം ചെയ്​ത 'ദി റൂൾ ഓഫ്​ പീസ്​' എന്ന ഹ്രസ്വചിത്രവും ഏറെ പ്രശംസ നേടി.

പിന്നീട് ആണ്​ 2020ൽ സംവിധായകരും തിരക്കഥാകൃത്തുക്കളുമായ മാതാപിതാക്കൾ ജിനു സേവ്യറിന്‍റെയും രജിതയുടെയും സഹായത്തോടെ 'കൊളംബിയൻ അക്കാഡമി' എന്ന സിംഗിൾ ഷോട്ട്​മൂവിയും 'ഇവ' എന്ന സിനിമയും സംവിധാനം ചെയ്​തത്​. നാല്​ മാസത്തോളം പരിശീലനം ചെയ്​ത ശേഷമാണ്​ 'കൊളംബിയൻ അക്കാഡമി' ചിത്രീകരിച്ചത്​.

ഇപ്പോൾ മാതാപിതാക്കളോടൊപ്പം ചെന്നൈയിൽ താമസിക്കുന്ന ആഷിക്​ അടുത്ത സിനിമയായ 'പ്രിസണി'ന്‍റെ അണിയറപ്രവർത്തനങ്ങളിലാണ്​. പിതാവ്​ ജിനു സേവ്യർ തിരക്കഥ രചിച്ചിരിക്കുന്ന സിനി നാല്​ ഭാഷകളിലാണ്​ ചിത്രീകരിക്കുകയെന്ന്​ ആഷിക്​ പറയുന്നു.