യു.എൻ ബഹിരാകാശ കമ്മിറ്റിയുടെ തലപ്പത്ത്​ യു.എ.ഇ

ദുബൈ: ബഹിരാകാശ രംഗത്ത്​ വലിയ കുതിപ്പുകൾക്ക്​ നേതൃത്വം നൽകിയ യു.എ.ഇക്ക്​ അന്താരാഷ്​ട്ര അംഗീകാരം. ബഹിരാകാശത്തിന്‍റെ സമാധാനപരമായ ഉപയോഗത്തിനുള്ള ഐക്യരാഷ്ട്രസഭയുടെ 100 രാജ്യങ്ങളടങ്ങിയ കമ്മിറ്റിയുടെ അധ്യക്ഷ സ്ഥാനത്തേക്ക്​ യു.എ.ഇ തെരഞ്ഞെടുക്കപ്പെട്ടു​. രാജ്യത്തിന്‍റെ ചൊവ്വാ ദൗത്യത്തിന്‍റെ പ്രോജക്ട് ഡയറക്ടറായ ഉംറാൻ ശറഫ്​ കമ്മിറ്റി ഡയറക്ടറായി പ്രവർത്തിക്കും.

1959 മുതൽ പ്രവർത്തിക്കുന്ന യു.എന്നിലെ ഈ കമ്മിറ്റി ബഹിരാകാശ രംഗത്തെ സമാധാനപരമായ ഉപയോഗം പ്രോത്സാഹിപ്പിക്കുകയും ഈ രംഗത്തെ പര്യവേഷണത്തെ സഹായിക്കുന്ന നിയമങ്ങളും നയങ്ങളും നിർദേശിക്കുകയും ചെയ്യുന്ന സമിതിയാണ്​.

സുപ്രധാന പദവിയിലേക്ക്​ തെരഞ്ഞെടുക്കപ്പെട്ട ഉംറാൻ ശറഫിന്​ യു.എ.ഇ പ്രസിഡന്റ് ശൈഖ്​ മുഹമ്മദ്​ ബിൻ സായിദ്​ അൽ നഹ്​യാൻ​ അഭിനന്ദനമറിയിച്ചു. ബഹിരാകാശ മേഖലയിൽ യു.എ.ഇ ശ്രദ്ധേയമായ സംഭാവന നൽകുന്നത് തുടരുകയാണെന്നും ഉംറാന്‍റെ പുതിയ പദവിയിൽ എല്ലാ വിജയങ്ങളും നേരുന്നതായും അദ്ദേഹം ട്വിറ്ററിൽ കുറിച്ചു.

നിയമനം യു.എ.ഇക്ക്​ ലഭിച്ച ബഹുമതിയാണെന്ന്​ വൈസ്​ പ്രസിഡന്റും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ അൽ മക്​തൂം അഭിപ്രായപ്പെട്ടു.

ബഹിരാകാശത്ത് സൈനികവത്കരണം വർധിച്ചുവരുന്ന സാഹചര്യത്തിൽ കമ്മിറ്റിയുടെ അധ്യക്ഷ സ്ഥാനത്തേക്ക്​ തെരഞ്ഞെടുക്കപ്പെട്ടത്​ വലിയ ബഹുമതിയായാണ്​ വിലയിരുത്തപ്പെടുന്നത്​. ബഹിരാകാശത്ത് ആയുധങ്ങളുടെയും സൈനിക സാങ്കേതികവിദ്യയുടെയും ഉപയോഗം വർധിച്ചുവരുന്നുണ്ട്​. അതോടൊപ്പം ചാര സാറ്റലൈറ്റുകളും പലരും ഉപയോഗപ്പെടുത്തുന്നു. ഈ സാഹചര്യത്തിൽ ലോകരാജ്യങ്ങൾക്ക്​ നയങ്ങളും നിയമങ്ങളും നിർദേശിക്കുന്ന കമ്മിറ്റിയെ വളരെ ശ്രദ്ധയോടെയാണ്​ വിദഗ്​ധർ വിലയിരുത്തുന്നത്​. യു.എൻ കമ്മിറ്റിയിൽ അംഗമായി ഉംറാൻ പ്രവർത്തിച്ചു വരികയായിരുന്നു.