ബഹ്റൈനിന്‍െറ വളര്‍ച്ച: പ്രധാനമന്ത്രിയുടേത് നിര്‍ണായക സംഭാവനകളെന്ന് ഹമദ് രാജാവ്

മനാമ: ആധുനിക ബഹ്റൈന്‍െറ നിര്‍മിതിയില്‍ പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ഖലീഫയുടെ പങ്ക് അനിഷേധ്യമാണെന്ന് രാജാവ് ഹമദ് ബിന്‍ ഈസ ആല്‍ഖലീഫ വ്യക്തമാക്കി. മെഡിക്കല്‍ പരിശോധന കഴിഞ്ഞ ആശുപത്രിയില്‍ നിന്ന് തിരിച്ചത്തെിയ പ്രധാനമന്ത്രിയെ സഖീര്‍ പാലസില്‍ സ്വീകരിച്ച് സംസാരിക്കുകയായിരുന്നു അദ്ദേഹം. പ്രധാനമന്ത്രിയുടെ ആരോഗ്യാവസ്ഥയില്‍ സന്തുഷ്ടി പ്രകടിപ്പിച്ച ഹമദ് രാജാവ് അദ്ദേഹത്തിന് കൂടുതല്‍ ആരോഗ്യത്തോടെ രാജ്യത്തെ ദീര്‍ഘനാള്‍ നയിക്കാന്‍ കഴിയട്ടെയെന്ന് ആശംസിച്ചു. ജനങ്ങളെ സേവിക്കാനും അവര്‍ക്കായി നിലകൊള്ളാനുമുള്ള അദ്ദേഹത്തിന്‍െറ ആഗ്രഹം ഏറെ മാതൃകാപരമാണ്. സര്‍ക്കാറിന്‍െറ പ്രവര്‍ത്തനം മെച്ചപ്പെടുത്താനും അതുവഴി രാജ്യത്തിന്‍െറ പുരോഗതിയും വളര്‍ച്ചയും ഉറപ്പുവരുത്താനുമുള്ള അദ്ദേഹത്തിന്‍െറ ശ്രമം എന്നും ആവേശമുണര്‍ത്തുന്നതാണ്.  
ബഹ്റൈനിന്‍െറ വളര്‍ച്ചക്കും വികാസത്തിനും പ്രധാനമന്ത്രി നിര്‍ണായക സംഭാവനകളാണ് നല്‍കിയത്. സര്‍ക്കാറിന്‍െറ പ്രവര്‍ത്തനം മെച്ചപ്പെടുത്താനും കൂടുതല്‍ ലക്ഷ്യങ്ങള്‍ നേടുന്നതിനും പ്രധാനമന്ത്രി അവിരാമം പരിശ്രമിച്ചുകൊണ്ടിരിക്കുകയാണെന്നും ഹമദ് രാജാവ് പറഞ്ഞു. തന്‍െറ ആരോഗ്യ സ്ഥിതി അപ്പപ്പോള്‍ ആരായുകയും ആവശ്യമായ ശ്രദ്ധയും പരിചരണവും ഉറപ്പുവരുത്തുകയും ചെയ്തിന് ഹമദ് രാജാവിന് പ്രധാനമന്ത്രി പ്രത്യേകം നന്ദി അറിയിച്ചു. 
രാജ്യം നേരിടുന്ന എല്ലാ വെല്ലുവിളികളും പ്രതിസന്ധികളും തരണം ചെയ്ത് മുന്നോട്ട് പോവാന്‍ പ്രധാനമന്ത്രിക്ക് കഴിയട്ടെയെന്നും ഹമദ് രാജാവ് ആശംസിച്ചു. കിരീടാവകാശിയും ഒന്നാം ഉപപ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് ആല്‍ലഖീഫയും സംബന്ധിച്ചു.