ജോലി ബഹ്​റൈനികൾക്ക്: കരട്​ ബില്ലിന്​ അംഗീകാരം​

മനാമ: സർക്കാർ ഉടമസ്ഥതയിലുള്ള കമ്പനികളിലെയും സർക്കാറിന്​ 50 ശതമാനത്തിലധികം വിഹിതമുള്ള സ്​ഥാപനങ്ങളിലെയും ജോലികൾ ബഹ്​റൈനികൾക്ക്​ മാത്രമാക്കാൻ വ്യവസ്​ഥ ചെയ്യുന്ന കരട്​ ബിൽ പാർലമെൻറ്​ പാസാക്കി. സർക്കാർ ആറു മാസത്തിനുള്ളിൽ ഇതുസംബന്ധിച്ച നിയമ നിർമാണം നടത്തി ദേശീയ അസംബ്ലിയുടെ പരിഗണനക്ക്​ വിടണം.

യോഗ്യരായ ബഹ്​റൈനികളെ ലഭ്യമല്ലെങ്കിൽ മാത്രം വിദേശജോലിക്കാരെ താൽക്കാലിക കരാർ അടിസ്​ഥാനത്തിൽ നിയമിക്കാമെന്നും കരട്​ ബില്ലിൽ പറയുന്നു. ബിൽ അവതരണത്തിനിടെ കഴിഞ്ഞദിവസം പാർലമെൻറിൽ ചൂടേറിയ ചർച്ച നടന്നു.

തൊഴിലില്ലായ്​മ പരിഹരിക്കാൻ മന്ത്രിമാർ ശക്​തമായ നടപടികൾ സ്വീകരിക്കുന്നില്ലെന്ന്​ മുഹമ്മദ്​ അൽ അബ്ബാസി വിമർശിച്ചു. ബിസിനസുകാർപോലും ബഹ്​റൈനികളേക്കാൾ പ്രവാസികളെയാണ്​ തിരഞ്ഞെടുക്കുന്നത്​.

വിവേചനം പാടില്ലെന്ന്​ അന്താരാഷ്​ട്ര കരാറുകൾ വ്യവസ്​ഥ ചെയ്യുന്നുവെന്നാണ്​ അവർ പറയുന്നത്​.

വിവിധ പദവികൾ ഏറ്റെടുക്കാൻ യോഗ്യരായ ബഹ്​റൈനികൾക്ക്​ തൊഴിൽ ലഭ്യമാക്കണമെന്ന്​ മാത്രമാണ്​ തങ്ങൾ ആവശ്യപ്പെടുന്നതെന്നും അദ്ദേഹം പറഞ്ഞു.