കസ്റ്റംസ് ജീവനക്കാരനു നേരെ സുരക്ഷാ ഉദ്യോഗസ്ഥന്‍ തോക്ക് ചൂണ്ടിയെന്ന വാര്‍ത്ത ശരിയല്ളെന്ന് ആഭ്യന്തരമന്ത്രാലയം

കുവൈത്ത് സിറ്റി: യാത്രക്കാരെ പരിശോധിക്കുന്നതുമായി ബന്ധപ്പെട്ട തര്‍ക്കത്തെ തുടര്‍ന്ന് അബ്ദലി ചെക്പോസ്റ്റില്‍ കസ്റ്റംസ് ജീവനക്കാരനെതിരെ സുരക്ഷാ ഉദ്യോഗസ്ഥന്‍ തോക്ക് ചൂണ്ടിയതായ വാര്‍ത്ത ശരിയല്ളെന്ന് ആഭ്യന്തരമന്ത്രാലം വ്യക്തമാക്കി. പെരുന്നാള്‍ അവധിയില്‍ ജനത്തിരക്കേറിയ അബ്ദലി അതിര്‍ത്തി കവാടത്തില്‍ യാത്രക്കാരെ സൂക്ഷ്മപരിശോധനക്ക് വിധേയമാക്കേണ്ടതുമായി ബന്ധപ്പെട്ട കാര്യത്തില്‍ പൊലീസും കസ്റ്റംസ് ജീവനക്കാരും തമ്മില്‍ തര്‍ക്കത്തിലായെന്നും ഇതിനിടെ സുരക്ഷാ ഉദ്യോഗസ്ഥന്‍ ഒരു ഉദ്യോഗസ്ഥന്‍െറ മുഖത്ത് തോക്കുചൂണ്ടിയെന്നുമാണ് സോഷ്യല്‍ മീഡിയകളില്‍ പ്രചരിച്ചത്. അതേസമയം, യാത്രക്കാരെ പരിശോധിക്കുന്നതുമായി ബന്ധപ്പെട്ട പുതിയ നിര്‍ദേശം പാലിക്കാത്ത ഉദ്യോഗസ്ഥനെതിരെ ബന്ധപ്പെട്ട ഡിപ്പാര്‍ട്ട്മെന്‍റില്‍ പരാതി നല്‍കുകമാത്രമാണുണ്ടായതെന്ന് ആഭ്യന്തരമന്ത്രാലയം വ്യക്തമാക്കി.