അനധികൃത പണപ്പിരിവ്: അമ്പതോളം പേര്‍ തൊഴില്‍ മന്ത്രാലയത്തിന്‍െറ നിരീക്ഷണത്തില്‍

കുവൈത്ത് സിറ്റി: അനധികൃതമായി പണപ്പിരിവ് നടത്തിയ 50 ഓളം പേരെ തൊഴില്‍മന്ത്രാലയം തിരിച്ചറിഞ്ഞിട്ടുണ്ടെന്ന് തൊഴില്‍മന്ത്രാലയ വിഭാഗം തലവന്‍ ഫലാഹ് അല്‍ ഫദ്ലി വ്യക്തമാക്കി. തൊഴില്‍ മന്ത്രാലയത്തിന്‍െറ മുന്‍കൂട്ടിയുള്ള അനുമതികൂടാതെയാണ് ഇവര്‍ പണപ്പിരിവ് നടത്തിയിട്ടുള്ളത്. ഇവര്‍ ശേഖരിച്ച പണം വിദേശത്തേക്കയച്ചതായി ബാങ്കുകള്‍ വഴി കണ്ടത്തെിയിട്ടുണ്ടെന്നും ഇവരുടെ കാര്യത്തില്‍ അന്തിമതീരുമാനമെടുക്കുന്നതിന് ആഭ്യന്തരമന്ത്രാലയത്തിന് റിപ്പോര്‍ട്ട് സമര്‍പ്പിച്ചിട്ടുണ്ടെന്നും അദ്ദേഹം പറഞ്ഞു. സോഷ്യല്‍ മീഡിയവഴി അനധികൃതമായി പണപ്പിരിവ് നടത്തുന്നവരെ  പിടികൂടാന്‍ മൂന്ന് ടെലികോം കമ്പനികളുടെ സഹായം തേടിയിട്ടുണ്ട്. ഇവര്‍ക്ക് ലഭിച്ച
 പണം അഫ്ഗാനിസ്താന്‍, കാമറൂണ്‍, മാലി എന്നിവിടങ്ങളിലെ ചില പദ്ധതികള്‍ക്കുവേണ്ടിയാണ് നല്‍കിയിട്ടുള്ളതെന്ന് വ്യക്തമായിട്ടുണ്ട്. അനധികൃത പണപ്പിരിവ് നടത്തുന്നവരെ നിരന്തരം നിരീക്ഷിക്കുന്നതിന് തൊഴില്‍മന്ത്രാലയം പ്രത്യേകസംഘത്തിന് രൂപം നല്‍കിയിരുന്നു.