കുവൈത്തിൽ ബാർബർ ഷോപ്പുകൾ തുറക്കുന്നു; കർശന നിബന്ധനകൾ

കുവൈത്ത്​ സിറ്റി: കുവൈത്തിൽ ബാർബർ ഷോപ്പുകളും സലൂണുകളും ചൊവ്വാഴ്​ച മുതൽ തുറക്കും. താടി വടിക്കലിനും മസാജിനും ​സ്​ക്രബ്ബിങ്ങിനും മേക്കപ്പിനും പുരികം ഡൈ ചെയ്യുന്നതിനും അനുമതിയില്ല. ഒാരോ ഉപഭോക്​താവിനും സേവനം നൽകിയ ശേഷം തൊഴിലുപകരണങ്ങൾ അണുവിമുക്​തമാക്കണം, സാമൂഹിക അകലം പാലിക്കപ്പെടണം, ഉപഭോക്​താക്കൾ സ്ഥാപനത്തിന്​ അകത്തുള്ള സമയത്തെല്ലാം മാസ്​ക്​ ധരിക്കണം, ജീവനക്കാർ പ്ലാസ്​റ്റിക്​ ഫേസ്​ ഷീൽഡും സ്ലീവുകളും കയ്യുറയും ധരിക്കണം, സലൂണിനകത്ത്​ സീറ്റുകളിലോ കാത്തിരിപ്പ്​ സ്ഥലത്തോ മാസികകളോ പത്രമോ വെക്കാൻ പാടില്ല, ജോലിഉപകരണങ്ങളായി കഴിയുന്നിടത്തോളം ഒറ്റത്തവണ ഉപയോഗിക്കുന്ന സാധനങ്ങളെ ആശ്രയിക്കണം, സ്​റ്റെറിലൈസറും ടിഷ്യൂ പേപ്പറും ഗാർബേജ്​ ബാഗും കരുതണം, സ്ഥാപനത്തിന്​ അകത്ത്​ ഭക്ഷണം കഴിക്കാനോ പാനീയങ്ങൾ കുടിക്കാനോ പാടില്ല. കസേരയും വാതിൽപിടിയും പോലെയുള്ള നിരന്തരം തൊടുന്ന സ്ഥലങ്ങൾ പ്രത്യേകം ശ്രദ്ധിക്കുകയും സാനിറ്റൈസർ ഉപയോഗിച്ച്​ തുടക്കുകയും വേണം, ജീവനക്കാർ ദിവസവും രോഗലക്ഷണങ്ങൾ ഉണ്ടോ എന്ന്​ പരിശോധിക്കണം, ജീവനക്കാരുടെ ശരീര താപനില അടയാളപ്പെടുത്തണം, ബന്ധപ്പെട്ട സർക്കാർ ഉദ്യോഗസ്ഥർ പരിശോധനക്കെത്തു​േമ്പാൾ ഇത്​ കാണിക്കണം, ശുചിത്വം ഉറപ്പുവരുത്തണം, രോഗ സംശയമുള്ള ഉപഭോക്​താക്കളെ കൈകാര്യം ചെയ്യേണ്ടതെങ്ങ​​​നെ എന്നത്​ സംബന്ധിച്ച്​ ജീവനക്കാർക്ക്​ മാർഗനിർദേശംനൽകണം, പഴക്കംചെന്ന രോഗങ്ങൾ ഉള്ളവർ അടച്ചിട്ട സ്ഥലങ്ങളിൽ ​ക്ലോറിൻ ഉപയോഗിക്കുന്നത്​ ഒഴിവാക്കണം, എയർ കണ്ടീഷനിങ്​ ഫിൽറ്ററും വെൻറിലേഷൻ സംവിധാനവും ശുചീകരിക്കുകയും അണുവിമുക്​തമാക്കുകയും വേണം, പരിശോധനക്കെത്തുന്ന ഉദ്യോഗസ്ഥർക്ക്​ സൗകര്യം ചെയ്​തുകൊടുക്കണം തുടങ്ങിയ മാർഗനിർദേശങ്ങളും​ ആരോഗ്യ മന്ത്രാലയം പുറത്തിറക്കിയിട്ടുണ്ട്​​.