യാത്രാവിലക്ക് നീക്കാൻ കേന്ദ്രസർക്കാർ ഇടപെടണം -കെ.കെ.എം.എ

കുവൈത്ത്‌ സിറ്റി: കുവൈത്തിലേത്ത്​ പ്രവേശന വിലക്കുള്ള രാജ്യങ്ങളുടെ പട്ടികയിൽനിന്ന്​ ഇന്ത്യയെ നീക്കാൻ കേന്ദ്രസർക്കാർ ഇടപെടണമെന്ന് കെ.കെ.എം.എ ആവശ്യപ്പെട്ടു. കേന്ദ്ര വിദേശകാര്യ മന്ത്രി എസ്. ജയശങ്കർ, സഹമന്ത്രി വി. മുരളീധരൻ എന്നിവർക്ക് ഇത് സംബന്ധിച്ച നിവേദനം അയച്ചു. ഇടത്താവളങ്ങൾക്ക്​പകരം കുവൈത്തിൽ തന്നെ 14 ദിവസത്തെ ക്വാറൻറീൻ കഴിഞ്ഞാൽ മതിയാവുമെന്ന വ്യവസ്ഥ വന്നാൽ യാത്രക്കാർക്ക്​ സ്വീകാര്യമാവും.

ഇടത്താവളരാജ്യങ്ങളിൽ 14 ദിവസത്തെ ക്വാറൻറീനിൽ കഴിഞ്ഞശേഷം കുവൈത്തിലേക്ക്​​ വരുന്ന രീതി കുവൈത്തിലെ ട്രാവൽ, ഹോട്ടൽ, ഇതര വാണിജ്യ മേഖലകൾക്ക്​ലഭിക്കേണ്ട വാണിജ്യ സാധ്യത നഷ്​ടപ്പെടുത്തുന്നു. യാത്രാക്കാർക്കും കനത്ത ക്ലേശവും പണച്ചെലവും നേരിടുന്നു. ഇടത്താവള രാജ്യങ്ങളിലെ ഹോട്ടലുകൾക്കുംട്രാവൽ ഓപറേറ്റർമാർക്കും മാത്രമാണ് ലാഭം. തിരിച്ചുവരാൻ പറ്റാത്തതിലൂടെ പതിനായിരക്കണക്കിന് ഇന്ത്യക്കാർ തൊഴിൽ നഷ്​ട ഭീഷണി അഭിമുഖീകരിക്കുകയാണ്. വസ്തുതകൾ കുവൈത്ത്‌ അധികൃതരെ നയതന്ത്ര ബന്ധത്തിലൂടെ ബോധ്യപ്പെടുത്തി യാത്രാവിലക്ക് നീക്കിയെടുക്കാൻ കേന്ദ്ര സർക്കാർ ശക്തമായി ഇടപെടണമെന്നും കേരള സർക്കാരും ഇതിനായി സമ്മർദ്ദം ചെലുത്തണമെന്നും കെ.കെ.​എം.എ ആവശ്യപ്പെട്ടു.