കോവിഡ്​ മുന്നണിപ്പോരാളികൾക്ക്​ റേഷൻ വിതരണം ജനുവരി മുതൽ

കുവൈത്ത്​ സിറ്റി: കോവിഡ്​ പ്രതിരോധ പ്രവർത്തനങ്ങളുടെ മുൻനിരയിലുണ്ടായ ആരോഗ്യ മന്ത്രാലയ, ആഭ്യന്തര മന്ത്രാലയ ജീവനക്കാർക്ക്​ റേഷൻ ഭക്ഷ്യ വസ്​തുക്കൾ നൽകുന്നത്​ ജനുവരി മുതൽ. 91000 പേരെയാണ്​ ഗുണഭോക്​താക്കളായി കണ്ടെത്തിയിട്ടുള്ളത്​. അരി, പഞ്ചസാര, കോൺ ​ഒായിൽ, പാൽപ്പൊ​ടി, തക്കാളി പേസ്​റ്റ്​, ഫ്രോസൻ ചിക്കൻ, പയറുവർഗങ്ങൾ എന്നിവയാണ്​ റേഷൻ കിറ്റിൽ ഉൾ​ക്കൊള്ളിക്കുക.

ജനുവരി ഒന്നുമുതൽ 16നകം ആദ്യഘട്ട വിതരണം പൂർത്തിയാക്കും. ആറുമാസത്തേക്ക്​ റേഷൻ നൽകും. 50 ദശലക്ഷം ദീനാർ ധന മന്ത്രാലയം ഇതിന്​ വകയിരുത്തിയിട്ടുണ്ട്​. 90 ദീനാർ മുതൽ 100 ദീനാർ ​വരെ വിലമതിക്കുന്ന സാധനങ്ങളാണ്​ ഒരു ഗുണഭോക്​താവിന്​ ലഭിക്കുക. ഇതിന്​ പുറമെ കോവിഡ്​ മുന്നണിപ്പോരാളികളായിരുന്ന 40000 ആരോഗ്യ പ്രവർത്തകർക്ക്​ പണമായി ബോണസും നൽകും. 134 ദശലക്ഷം ദീനാറാണ്​ ഇതിന്​ കണക്കാക്കുന്നത്​. ​2020 ഫെബ്രുവരി 24 മുതൽ മേയ്​ 31 വരെ കാലയളവിൽ കോവിഡ്​ പ്രതിരോധ പ്രവർത്തന രംഗത്തുണ്ടായിരുന്നവർക്കാണ്​ ബോണസ്​ നൽകുന്നത്​. പൊതുമേഖലയിലുള്ളവർക്ക്​ മാത്രമാണ്​ ബോണസ്​ നൽകുന്നത്​.