‘മിഷൻ വിങ്​സ്​ ഒാഫ്​ കംപാഷൻ’: 15 വിമാന ടിക്കറ്റ്​ നൽകി ക്വാളിറ്റി ഫുഡ്​ സ്​റ്റഫ്​ ഗ്രൂപ്പ്​

കുവൈത്ത്​ സിറ്റി: കോവിഡ്​ പ്രതിസന്ധിയിൽ ജോലിയും വരുമാനവും ഇല്ലാതായും മറ്റു പ്രശ്​നങ്ങളാലും നാടണയാൻ കൊതിക്കുന്നവർക്കായി​ ആശ്വാസത്തി​​െൻറ കൈത്തിരിനാളങ്ങൾ തെളിഞ്ഞുകൊണ്ടേയിരിക്കുന്നു. നാട്ടിലേക്ക്​ തിരിച്ചുപോവാൻ വിമാന ടിക്കറ്റ്​ എടുക്കാൻ പണമില്ലാത്തവർക്കായി ‘ഗൾഫ്​ മാധ്യമ’വും ‘മീഡിയവണും’ ചേർന്നൊരുക്കുന്ന ‘മിഷൻ വിങ്​സ്​ ഒാഫ്​ കംപാഷൻ’പദ്ധതിയിലേക്ക് ക്വാളിറ്റി ഇൻറർനാഷനൽ ഫുഡ്​ സ്​റ്റഫ്​ ഗ്രൂപ്പ്​ 15 വിമാന ടിക്കറ്റുകൾ 
നൽകി. 

ക്വാളിറ്റി ഇൻറർനാഷനൽ ഫുഡ്​ സ്​റ്റഫ്​ കമ്പനി, ക്വാളിറ്റി ബസാർ സെൻട്രൽ മാർക്കറ്റ്​ എന്നിവയുടെ മേധാവിയായ മലപ്പുറം വേങ്ങര സ്വദേശി മുസ്തഫ ഉണ്യാലുക്കൽ ആണ്​ 15 പ്രവാസികളുടെ നാടണയാനുള്ള സ്വപ്​നങ്ങൾക്ക്​ ചിറക്​ വിരിച്ചത്​. കോവിഡ്​ കാലത്ത്​ പ്രവാസികൾ അനുഭവിക്കുന്ന പ്രതിസന്ധിയിൽ തുണയായി നിൽക്കാൻ ‘ഗൾഫ്​ മാധ്യമ’വും ‘മീഡിയവണും’ മുന്നോട്ടുവന്നത്​ അഭിനന്ദനാർഹമാണെന്നും പദ്ധതിയുമായി സഹകരിക്കാൻ സാധിച്ചതിൽ സന്തോഷമുണ്ടെന്നും അദ്ദേഹം വ്യക്​തമാക്കി.

നാടിനായി ഏറെ സേവനം നൽകിയ പ്രവാസികളിൽ ഒരുവിഭാഗം ദുരിതത്തിലായ അവസരത്തിൽ അവരെ സഹായിക്കാൻ സമൂഹത്തിന്​ ബാധ്യതയുണ്ടെന്ന്​ അദ്ദേഹം കൂട്ടിച്ചേർത്തു. പ്രവാസികളെ തിരിച്ചെത്തിക്കാനുള്ള വന്ദേ ഭാരത്​ ദൗത്യത്തിൽ 
നാട്ടിലേക്ക്​ പോകാൻ ടിക്കറ്റിന്​ പണമില്ലാതെ വിഷമിക്കുന്നവർക്കാണ്​ ഇൗ പദ്ധതിയിൽ ടിക്കറ്റ്​ ലഭ്യമാക്കുന്നത്​. 

ഇൗ ദൗത്യവുമായി കൈകോർക്കാൻ ആഗ്രഹിക്കുന്ന സഹൃദയർ 965 55777275 എന്ന നമ്പറിൽ വാട്​സാപ്​ ചെയ്യുക. അല്ലെങ്കിൽ ഗൾഫ്​മാധ്യമം- മീഡിയ വൺ പ്രവർത്തകരുമായി ബന്ധപ്പെടുക.