ആരോഗ്യ സുരക്ഷാ മാർഗനിർദേശങ്ങൾ പാലിച്ചില്ലെങ്കിൽ കർശന നടപടി

കുവൈത്ത്​ സിറ്റി: കോവിഡ്​ പ്രതിരോധത്തിനായി പുറപ്പെടുവിച്ച ആരോഗ്യ സുരക്ഷാ മാർഗനിർദേശങ്ങൾ പാലിച്ചില്ലെങ്കിൽ ശക്​തമായ നടപടിയെടുക്കുമെന്ന്​കുവൈത്ത്​ ആരോഗ്യ മന്ത്രി ഡോ. ബാസിൽ അസ്സബാഹ്​ പറഞ്ഞു. ഇതുമായി ബന്ധപ്പെട്ട കരടുനിയമം സർക്കാർ തയാറാക്കിക്കൊണ്ടിരിക്കുകയാണെന്ന്​ അദ്ദേഹം ട്വിറ്ററിൽ പ്രതികരിച്ചു. മാസ്​ക്​ ധരിക്കാതെ പുറത്തിറങ്ങുന്നവർക്ക്​ കനത്ത ശിക്ഷ ഉറപ്പാക്കുന്നതായിരിക്കും നിർദ്ദിഷ്​ട നിയമം. കർഫ്യൂ അവസാനിപ്പിച്ചതിന്​ കോവിഡ്​ പ്രതിസന്ധി തീർന്നെന്ന്​ അർഥമില്ല. നാം ജാഗ്രതയും കരുതലും തുടർന്നേ പറ്റൂ. നാം ഒരുമിച്ച്​ സൂക്ഷ്​മതയോടെ നില​കൊണ്ടാൽ കോവിഡിനെ തുരത്താൻ കഴിയും. വിവിധ സർക്കാർ വകുപ്പുകൾ ഇതിനായി കഠിനാധ്വാനം ചെയ്യുകയാണ്​.

ജനങ്ങളും ഇതുമായി സഹകരിക്കാൻ ബാധ്യസ്ഥരാണെന്ന്​ അദ്ദേഹം വ്യക്​തമാക്കി. കർഫ്യൂ അവസാനിപ്പതോടെ ജനങ്ങൾ ജാഗ്രത കൈവിടുന്നതായി വിലയിരുത്തലുണ്ട്​. നിരത്തുകൾ ഇപ്പോൾ സജീവമാണ്​. രാജ്യത്ത്​ കോവിഡ്​ ഭീതി ഒഴിഞ്ഞിട്ടില്ല. വ്യാഴാഴ്​ച മാത്രം 900 പേർക്ക്​ പുതുതായി കോവിഡ്​ സ്ഥിരീകരിച്ചു. 582 പേരാണ്​ രോഗമുക്​തി നേടിയത്​. ​ െഎ.സി.യുവിലുള്ളവരുടെ എണ്ണവും മരണ നിരക്കും കുറഞ്ഞത്​ മാത്രമാണ്​ ആശ്വാസം. തണുപ്പുകാലത്ത്​ വീണ്ടും വൈറസ്​ ആഞ്ഞടിക്കുമോ എന്ന ആശങ്കയും അധികൃതർക്കുണ്ട്​. ഇപ്പോൾ അധികം രോഗികൾ എത്തുന്നില്ലെങ്കിലും ജലീബ്​ അൽ ശുയൂഖിലെ ഉൾപ്പെടെ ഫീൽഡ്​ ആശുപത്രികൾ തുറന്നുവെച്ചിരിക്കുന്നത്​ ഇൗ ആശങ്ക കാരണമാണ്​.