രഹസ്യവിവരം ചോർത്തി: രണ്ട്​ സുരക്ഷാ ഉദ്യോഗസ്ഥർ അറസ്​റ്റിൽ

കുവൈത്ത്​ സിറ്റി: രഹസ്യ വിവരങ്ങൾ ചോർത്തിയതിന്​ സ്​റ്റേറ്റ്​ സെക്യൂരിറ്റി സർവീസിലെ രണ്ട്​ ഉദ്യോഗസ്ഥരെ അറസ്​റ്റ്​ ചെയ്​തു. വ്യാജ ട്വിറ്റർ അക്കൗണ്ട്​ഉപയോഗിച്ചാണ്​ ഇവർ രഹസ്യ സ്വഭാവമുള്ള വിഡിയോ പുറത്താക്കിയതെന്ന്​ പബ്ലിക്​ പ്രോസിക്യൂഷൻ പറയുന്നു​. അതേസമയം, പ്രതികൾ കുറ്റംനിഷേധിച്ചിട്ടുണ്ട്​. സ്​റ്റേറ്റ്​ സെക്യൂരിറ്റി ഏജൻസിയുടെ ഒാഫിസ്​ മുറിയിലെ ദൃശ്യങ്ങളും ശബ്​ദവും സാമൂഹിക മാധ്യമങ്ങളിൽ പ്രചരിച്ചിരുന്നു.

ചില രാഷ്​ട്രീയക്കാരുടെ ട്വിറ്റർ അക്കൗണ്ട്​ ​ഹാക്ക്​ ചെയ്യപ്പെട്ടതുമായും മലേഷ്യൻ ഫണ്ട്​ കേസുമായും ബന്ധപ്പെട്ട്​ ഉദ്യോഗസ്ഥരുടെ ചർച്ചയാണ്​ പുറത്തായത്​. ഇതുമായിബന്ധപ്പെട്ട്​ നടത്തിയ അന്വേഷണമാണ്​ രണ്ട്​ ഉദ്യോഗസ്ഥരുടെ അറസ്​റ്റിന്​ വഴിവെച്ചത്​. വിഷയം പാർലമെൻറിലും ചർച്ചയായാതാണ്​. 2018ലെദൃശ്യങ്ങളാണിതെന്ന്​ നേരത്തെ ആഭ്യന്തര മന്ത്രാലയം വിശദീകരിച്ചു. ജനങ്ങളുടെ സ്വകാര്യത സംരക്ഷിക്കുന്നതിൽ വിട്ടുവീഴ്​ചയില്ലെന്നും രഹസ്യവിവരങ്ങൾപുറത്താക്കിയ സംഭവത്തിലെ കുറ്റക്കാർക്കെതിരെ കർശന നടപടിയുണ്ടാവുമെന്ന്​ ആഭ്യന്തര മ​ന്ത്രി അനസ്​ അൽ സാലിഹ്​ പാർലമെൻറിനെ അറിയിച്ചു. അറസ്​റ്റിലായി രണ്ടുപേരിൽ ഒരാൾ കേണൽ റാങ്കിലുള്ളയാളും ഒരാൾ ഭരണ കുടുംബാംഗവുമാണ്​. പ്രതികൾ സെൻട്രൽ ജയിലിലാണുള്ളത്​.