വിസക്കച്ചവടം: 800 കമ്പനികൾക്കെതിരെ അന്വേഷണം

കുവൈത്ത്​ സിറ്റി: വിസക്കച്ചവടവുമായി ബന്ധപ്പെട്ട്​ 800 കമ്പനികൾക്കെതിരെ ആഭ്യന്തര മന്ത്രാലയം അന്വേഷണം നടത്തുന്നു. ഇൗ കമ്പനികളുടെ കീഴിൽ 60000 വിദേശ തൊഴിലാളികൾ വിസ എടുത്തിട്ടുണ്ട്​. വിസക്കച്ചവടത്തിനായി ഉണ്ടാക്കിയ കടലാസു കമ്പനികൾ വാണിജ്യ ഇടപാടുകളും പ്രവർത്തനവും നടത്തുന്നില്ലെന്നാണ്​ അധികൃതർ കരുതുന്നത്​. ഇത്​ തെളിയിച്ചാൽ പണം നൽകി പുറത്ത്​ വിസയടിച്ച വിദേശികളും വെട്ടിലാകും. പണം ഇൗടാക്കി വിസയെടുത്ത്​ കൊണ്ടുവന്ന ശേഷം പുറത്തുവിടുകയാണ്​ തട്ടിപ്പു കമ്പനികൾ ചെയ്​തുവരുന്നത്​. വിസക്കച്ചവടത്തിനായി മാത്രം പ്രവർത്തിക്കുന്ന കമ്പനികളെ കണ്ടെത്താൻ മാനശേഷിവകുപ്പ് പരിശോധന ഊർജിതമാക്കിയിട്ടുണ്ട്​.

പരിശോധകർ എത്തുമ്പോൾ പല ഊഹക്കമ്പനികളുടെയും ഓഫിസുകൾ ഒഴിഞ്ഞു കിടക്കുകയായിരുന്നു. വാണിജ്യപരമോ ഉത്പാദനപരമോ ആയ യാതൊരു ഇടപാടും നടത്താതെ വിസക്കച്ചവടത്തിനു മാത്രമാണ് ഇത്തരം ഓഫിസുകൾ പ്രവർത്തിക്കുന്നതെന്നും വ്യക്തമായ മനുഷ്യക്കടത്താണ് കമ്പനി ഉടമകൾ നടത്തിയിരുന്നതെന്നും മാൻ പവർ അതോറിറ്റി അധികൃതർ വ്യക്​തമാക്കുന്നു. ഏതൊക്കെ കമ്പനികളാണ്​ ഇത്തരത്തിൽ ഉള്ളതെന്നും ​എന്ത്​ നടപടിയാണ്​ കമ്പനികൾക്കും ഇവയുടെ കീഴിൽ വിസയടിച്ച തൊഴിലാളികൾക്കും നേരിടേണ്ടി വരികയെന്നും അന്വേഷണ റിപ്പോർട്ട്​ പുറത്തുവന്നാലേ വ്യക്​തമാകൂ. വ്യാജകമ്പനികൾക്കു കീഴിലെത്തിയ തൊഴിലാളികൾ മറ്റു പലയിടങ്ങളിലുമായി തൊഴിലെടുക്കുകയാണ്.