ഒമാനിൽ സർക്കാർ മേഖലയിലെ സ്വദേശിവത്​കരണം ഊർജിതമാക്കാൻ നിർദേശം

മസ്​കത്ത്​: സർക്കാർ മേഖലയിലെ വിദേശികൾക്ക്​ പകരം സ്വദേശികളെ നിയമിക്കുന്ന നടപടികൾ ഉൗർജിതമാക്കണമെന്ന്​ കാട്ട ി ധനകാര്യ മന്ത്രാലയം സർക്കുലർ പുറപ്പെടുവിച്ചു. സ്വദേശിവത്​കരണം അടിയന്തര പ്രാധാന്യത്തോടെ നടപ്പാക്കണമെന്നാണ്​ 14ാം നമ്പർ സർക്കുലർ നിർദേശിക്കുന്നത്​.

വിവിധ തലങ്ങളിലെ ജോലികളിൽ കൃത്യമായ സമയപരിധി നിശ്​ചയിച്ച്​ വേണം സ്വദേശികളെ നിയമിക്കാൻ. നേതൃ തസ്​തികകൾ, സൂപ്പർവൈസറി തസ്​തികകൾ എന്നിവയിലും സ്വദേശിവത്​കരണം വേഗത്തിൽ നടപ്പാക്കണമെന്ന്​ സർക്കുലറിൽ പറയുന്നു.

സ്വദേശി തൊഴിൽസേനയുടെ മികവ്​ വർധിപ്പിക്കാനും അതുവഴി വിവിധ മേഖലകളിലെ സമഗ്ര വികസനത്തിന്​ അവരുടെ പങ്കാളിത്തം വർധിപ്പിക്കാനും ലക്ഷ്യമിട്ടുള്ള സർക്കാർ പദ്ധതികളുടെ ഭാഗമായാണ്​ സ്വദേശിവത്​കരണത്തിനുള്ള നിർദേശം.

തൊഴിൽ അന്വേഷിക്കുന്ന സ്വദേശികൾക്ക്​ അനുയോജ്യമായ തൊഴിൽ അന്തരീക്ഷം സർക്കാർ കമ്പനികൾ ഒരുക്കണം. സ്വദേശിവത്​കരണം നടപ്പാക്കുന്നത്​ സംബന്ധിച്ച ചെലവുകൾ അടുത്ത വർഷത്തെ ബജറ്റിൽ ഉൾക്കൊള്ളിക്കും. അതിനായുള്ള നിർദേശങ്ങൾ ഇൗ വർഷം ജൂലൈക്കുള്ളിൽ സമർപ്പിക്കണമെന്നും സർക്കുലറിൽ പറയുന്നു.