ഒമാൻ ടൂറിസ്​റ്റ്​ വിസകളുടെ കാലാവധി നീട്ടി നൽകി 

മസ്​കത്ത്​: ഒമാൻ ടൂറിസ്​റ്റ്​ വിസകളുടെ കാലാവധി നീട്ടി നൽകി. 2020 മാർച്ച്​ ഒന്നുമുതൽ ആഗസ്​റ്റ്​ 31 വരെ കാലയളവിൽ അനുവദിച്ച വിസകളുടെ കാലാവധി അടുത്ത വർഷം മാർച്ച്​ 31വരെയാണ്​ നീട്ടിയതെന്ന്​ ടൂറിസം മന്ത്രി അഹമ്മദ്​ അൽ മെഹ്​രീസി സുപ്രീം കമ്മിറ്റി വാർത്താ സമ്മേളനത്തിൽ പറഞ്ഞു. ഇതനുസരിച്ച്​ വിസ ലഭിച്ചിട്ട്​ കോവിഡ്​ മൂലം രാജ്യത്ത്​ എത്താൻ സാധിക്കാത്തവർ അടുത്ത വർഷം മാർച്ചിനുള്ളിൽ ഒമാനിൽ എത്തിയാൽ മതിയാകും. 

നിരവധി ടൂറിസം ഒാഫീസുകളും ട്രാവൽ ഏജൻസികളും ടൂറിസ്​റ്റ്​ വിസക്കായി പണം നൽകിയിട്ടുണ്ട്​. ഇത്​ കണക്കിലെടുത്ത്​ ധനകാര്യ മന്ത്രാലയവും റോയൽ ഒമാൻ പൊലീസുമായി ചേർന്നാണ്​ ഇൗ തീരുമാനം കൈകൊണ്ടതെന്നും മന്ത്രി പറഞ്ഞു. കോവിഡ്​ മറ്റു മേഖലകളെ പോലെ ടൂറിസം മേഖലയെയും കാര്യമായി ബാധിച്ചിട്ടുണ്ട്​. വ്യോമഗതാഗതം റദ്ദാക്കിയത്​ സ്വാഭാവികമായും ടൂറിസം മേഖലയെയും ബാധിക്കും. കോവിഡ്​ നൽകിയ ആഥഘാതത്തിൽ ടൂറിസം മേഖല മോചിതമായി വരുകയാ​െണന്നും മന്ത്രി മെഹ്​രീസി പറഞ്ഞു. 

മറ്റ്​ മേഖലകളെ പോലെ ടൂറിസം മേഖലക്കായും നിരവധി ആശ്വാസ പദ്ധതികൾ പ്രഖ്യാപിച്ചിട്ടുണ്ട്​. ടൂറിസ്​റ്റ്​ ഫീസ്​ അടക്കുന്നതിൽ നിന്ന്​ ഹോട്ടലുകൾക്ക്​ താൽക്കാലിക ഇളവ്​ നൽകിയിട്ടുണ്ട്​. ടൂറിസം മന്ത്രാലയം വഴി രാജ്യത്തി​​െൻറ ഖജനാവിലേക്ക്​ നേരിട്ട്​ എത്തുന്ന തുകയാണിത്​. കോവിഡ്​ ആഘാതത്തിൽ നിന്ന്​ കരകയറിയ ശേഷം ഹോട്ടലുകൾ ഇൗ തുക അടച്ചാൽ മതിയെന്ന്​ മന്ത്രി പറഞ്ഞു. 

കോവിഡ്​ മൂലം ടൂറിസം മേഖലക്ക്​ ഉണ്ടാകുന്ന ആഘാതത്തെ കുറിച്ച്​ സമഗ്ര റിപ്പോർട്ട്​ തയാറാക്കിയിട്ടുണ്ട്​. കഴിഞ്ഞ വർഷത്തെ സലാല ടൂറിസം സീസൺ മാത്രം കണക്കിലെടുക്കു​േമ്പാൾ 80 ദശലക്ഷം റിയാലാണ്​ നഷ്​ടമെന്നും മന്ത്രി പറഞ്ഞു. യാത്രാ വിലക്കുകൾ പൂർണമായി നീക്കിയ ശേഷം ഹോട്ടലുകൾക്കായി പദ്ധതി തയാറാക്കുമെന്നും മന്ത്രി മെഹ്​രീസി കൂട്ടിച്ചേർത്തു.