ഖത്തർ ഇന്ത്യൻ എംബസിയിൽ പേര്​ ​ചേർത്തവർ 38,000 കവിഞ്ഞു; പ്രവാസികളെ നാട്ടിലെത്തിക്കൽ ഏഴിന്​ തുടങ്ങും

ദോഹ: കോവിഡിൻെറ പശ്​ചാത്തലത്തിൽ വിദേശരാജ്യങ്ങളിൽ കുടുങ്ങിക്കിടക്കുന്ന ഇന്ത്യക്കാരെ  ഘട്ടംഘട്ടമായി നാട്ടിലെത്തിക്കുന്നതിനുള്ള നടപടിക്രമങ്ങൾ മേയ്​ ഏഴ്​ മുതൽ തുടങ്ങുമെന്ന്​ കേന്ദ്രസർക്കാർ  അറിയിച്ചതോടെ പ്രവാസികൾക്ക്​ പ്രതീക്ഷ. അതത്​ രാജ്യങ്ങളിലെ ഇന്ത്യൻ എംബസിയിൽ പേര്​ വിവരങ്ങൾ  ചേർത്തതിൻെറ അടിസ്​ഥാനത്തിലാണ്​ കേന്ദ്രസർക്കാറിൻെറ നടപടികൾ. 

ഖത്തറിൽ നിന്ന്​ ഇന്ത്യയിലേക്ക്​ മടങ്ങാനായി ദോഹയിലെ ഇന്ത്യൻ എംബസിയിൽ പേരുവിവരങ്ങൾ രജിസ്​റ്റർ  ചെയ്​തവർ ഇതിനകം 38,000 കവിഞ്ഞിട്ടുണ്ട്​. വിവിധ ഇന്ത്യൻ സംസ്​ഥാനങ്ങളിലുള്ളവരാണിവർ. വിമാനങ്ങളും  നാവിക സേനാ കപ്പലുകളും പ്രയോജനപ്പെടുത്തിയായിരിക്കും സർക്കാർ മടക്കയാത്ര ഒരുക്കുന്നത്​. യാത്രയുടെ  ചിലവ്​ പ്രവാസികൾ വഹിക്കേണ്ടി വരും.

 പ്രവാസികളെ സ്വീകരിക്കാനായി ഒരുങ്ങിയിരിക്കണമെന്ന്​ സംസ്​ ഥാനങ്ങൾക്ക്​ കേന്ദ്രം നേരത്തേ വിവരം നൽകിയിരുന്നു. നാട്ടിലേക്ക്​ മടങ്ങാൻ ആഗ്രഹിക്കുന്ന ഇന്ത്യക്കാരെ  തിരികെയെത്തിക്കാൻ കേന്ദ്രസർക്കാർ വിശദമായ പദ്ധതി ഇതിനകം തയാറാക്കിയിട്ടുമുണ്ട്​. നാവികസേനയുടെ  കപ്പലുകളടക്കം ഇതിനായി തയാറായിക്കഴിഞ്ഞു. ഇതിൻെറയടിസ്​ഥാനത്തിലാണ്​ വിവരങ്ങൾ ഇന്ത്യൻ എംബസി  കഴിഞ്ഞ ആഴ്​ച വിവരങ്ങൾ ശേഖരിച്ചുതുടങ്ങിയത്​.  

മേയ്​ നാല്​ വരെ ഇത്തരത്തിൽ ഖത്തറിൽ നിന്ന്​ മടങ്ങാൻ ആഗ്രഹിച്ച്​ രജിസ്​റ്റർ ചെയ്​ത ഇന്ത്യക്കാരുടെ  എണ്ണമാണ്​ 38,000 കവിഞ്ഞത്​​. സംസ്​ഥാനം തിരിച്ചുള്ള വിവരങ്ങൾ എംബസി നിലവിൽ തയാറാക്കുന്നില്ല.  എന്നാൽ ഗർഭിണികൾ, സന്ദർശക വിസയിൽ എത്തിയവർ, ജോലി നഷ്​ടപ്പെട്ട്​ തിരിച്ചുപോകുന്നവർ തുടങ്ങിയ  വിവരങ്ങൾ വെവ്വേറെ തയാറാക്കുമെന്നും എംബസി അധികൃതർ നേരത്തേ ‘ഗൾഫ്​മാധ്യമ’ത്തോട്​ പറഞ്ഞിരുന്നു.   https://forms.gle/SeB52ZJymC8VR8HN8 എന്ന ലിങ്കിൽ കയറി വിവിധ ഫോമുകൾ പൂരിപ്പിക്കുകയാണ്​ മടങ്ങാനാഗ്രഹിക്കുന്നവർ ചെയ്യേണ്ടത്​. കു

ടുംബത്തിലെ എല്ലാ അംഗങ്ങളും വെവ്വേറെ ഫോമുകൾ  പൂരിപ്പിക്കണം​. മക്കൾക്കടക്കം വെവ്വേറെ ഫോമുകളാണ്​ പൂരിപ്പിക്കേണ്ടത്​. പ്രവാസികളുമായി ബന്ധപ്പെട്ട എല്ലാ  വിവരങ്ങളും ഇതിൽ ചോദിക്കുന്നുണ്ട്​. അടുത്തുള്ള വിമാനത്താവളമടക്കമുള്ള വിവരങ്ങൾ പൂരിപ്പിക്കണം.

കോവിഡ്​ പോസിറ്റീവ്​ ആണോ, നെഗറ്റീവ്​ ആണോ, ടെസ്​റ്റ്​ ഇതുവരെ നടത്തിയിട്ടില്ല എന്ന കോളങ്ങളും  ഫോമിൽ ഉണ്ട്​. പേര്​, വയസ്​, പാസ്​പോർട്ട്​ നമ്പർ, ഇ മെയിൽ വിലാസം, വീട്ടിലെ മേൽവിലാസം, വിസയുടെ  ഇനം, ജോലി, ഫോൺനമ്പർ, സംസ്​ഥാനം, ഇന്ത്യയിലേക്ക്​ മടങ്ങാനുള്ള കാരണം എന്നീ വിവരങ്ങളാണ്​  ഫോമിൽ നൽകേണ്ടത്​. ഏറെ എളുപ്പത്തിൽ ചെയ്യാവുന്ന പ്രക്രിയയാണ്​ ഇത്​.