കെനിയ അപകടം: പരിക്കേറ്റവർ അപകടനില തരണംചെയ്​തു; ആർക്കും ഗുരുതരമല്ല

ദോഹ: കെനിയയിൽ അപകടത്തിൽ പെട്ട വിനോദയാത്രാ സംഘത്തിൽ പരിക്കേറ്റവർ അപകടനില തരണം ചെയ്​തു. മൂന്ന്​ സ്​ത്രീകളും രണ്ട്​ കുട്ടികളും ഉൾപ്പെടെ അഞ്ചു പേർ മരിച്ച അപകടത്തിൽ 27 പേർക്കായിരുന്നു പരിക്കേറ്റത്​. മരിച്ച സ്​ത്രീകളുടെ കുടുംബാംഗങ്ങൾ ഉൾപ്പെടെയുള്ളവർക്ക്​ പരിക്കേറ്റിരുന്നു. എന്നാൽ, എല്ലാവരും ഇപ്പോൾ അപകട നില തരണം ചെയ്​തതായും, ആരുടെയും പരിക്കുകൾ ഗുരുതരമല്ലെന്നും ​സംഘത്തോടൊപ്പമുള്ള ട്രാവൽ ഏജൻസി പ്രതിനിധി ‘ഗൾഫ്​ മാധ്യമ’ത്തോട്​ പ്രതികരിച്ചു.

മരിച്ചവരുടെ മൃതദേഹങ്ങളുടെ പോസ്​റ്റ്​മോർട്ടം നടപടികൾ ചൊവ്വാഴ്​ച രാത്രിയോടെ പൂർത്തിയായി. എംബാം ചെയ്​ത മൃതദേഹങ്ങൾ ബുധനാഴ്​ച രാവിലെയോടെ നയ്​റോബിയിലെ ആശുപത്രിയിലേക്ക്​ മാറ്റുന്ന നടപടികളും ആരംഭിച്ചു. യാത്രാസംഘത്തിലെ മറ്റു അംഗങ്ങളെയെല്ലാം അപകടം നടന്ന ന്യാഹുരുവിൽ നിന്നും 200 കിലോമീറ്റർ അകലെ നയ്​റോബിയിലെത്തിച്ചിട്ടുണ്ട്​. നേരത്തെ അഞ്ചു പേർക്കാണ്​ ഗുരുതരമായ പരിക്കേറ്റത്​. ഇവരെ എയർ ആംബുലൻസ്​ വഴിയാണ്​ ന്യാഹുരുവിൽ നിന്നും നയ്​റോബിയിലേക്ക്​ മാറ്റിയത്​. 13പേരെ നകുരുവിൽ നിന്നും നയ്​റോബിയിലേക്ക്​ റോഡ്​ മാർഗവുമെത്തിച്ചു.

മൃതദേഹങ്ങൾ നാട്ടിലെത്തിച്ച്​ സംസ്​കരിക്കാനാണ്​ ബന്ധുക്കൾ താൽപര്യം അറിയിച്ചത്​. അതേസമയം, ഒപ്പമുള്ള ബന്ധുക്കൾക്ക്​ യാത്രചെയ്യാൻ സാധ്യമാവുന്ന സാഹചര്യത്തിൽ മാത്രമേ മാത്രമേ മൃതദേഹവും നാട്ടിലെത്തിക്കൂവെന്ന്​ ട്രാവൽ ഏജൻസി പ്രതിനിധികൾ അറിയിച്ചു. വ്യാഴം, വെള്ളി ദിവസങ്ങളിലായി മൃതദേഹങ്ങൾ നാട്ടിലെത്തിക്കാൻ കഴിയുമെന്നാണ്​ ​പ്രതീക്ഷിക്കുന്നത്​.

ഖത്തറിൽ നിന്നുള്ള 28 അംഗ വിനോദയാത്രാ സംഘം തിങ്കളാഴ്​ചയാണ്​ മധ്യകെനിയയിലെ ന്യാൻഡറുവ കൗണ്ടിയിൽ അപകടത്തിൽ പെട്ടത്​. ഇവർ സഞ്ചരിച്ച ബസ്​ താഴ്​ചയിലേക്ക്​ പതിച്ചായിരുന്നു അപകടം. പാ​ല​ക്കാ​ട് കോ​ങ്ങാ​ട് മ​ണ്ണൂ​ർ പു​ത്ത​ൻ​പു​ര വീട്ടിൽ രാ​ധാ​കൃ​ഷ്ണ​ൻെറ മ​ക​ൾ റി​യ ആ​ൻ (41), മ​ക​ൾ ടൈ​റ (എ​ട്ട്), മൂ​വാ​റ്റു​പു​ഴ സ്വദേശിനി ജ​സ്ന കുറ്റിക്കാട്ടയിൽ (30), ഏക മ​ക​ൾ ​റൂ​ഹി മെ​ഹ്റി​ൻ (ഒ​ന്ന​ര വ​യ​സ്സ്), തി​രു​വ​ല്ല സ്വ​ദേ​ശി​നി ഗീ​ത ഷോ​ജി ഐ​സ​ക് (58) എ​ന്നി​വ​ർ സംഭവ സ്​ഥലത്തുവെച്ചു തന്നെ മ​രിച്ചിരുന്നു.