തീമഴപെയ്​ത ആകാശം; ഒടുവിൽ ആശ്വാസത്തിൻെറ രാത്രി

ദോഹ: തീ പോലെ പ്രത്യക്ഷപ്പെട്ട മിസൈലുകളും, അവയെ വീഴ്​ത്താനായി തൊടുത്ത മിസൈൽവേധസംവിധാനങ്ങളുമായി ഭീതിവിതച്ച ആകാശം. ​​തലസ്​ഥാന നഗരിയായ ദോഹയിൽ ഇടിമുഴക്കം പോലെ പലയിടങ്ങളിൽ നിന്നും ശബ്​ദങ്ങൾ കേട്ടു. ആശങ്കയുടെ മുൾമുനയിൽ നിന്ന ഒരു മണിക്കൂറിനു ശേഷം, ഖത്തർ സാധാരണ നിലയിലെത്തിയതിൻെറ ആശ്വാസത്തിലാണ്​ പ്രവാസി മലയാളികളും വിവിധ ദേശക്കാരായ ​താമസക്കാരും ഉൾപ്പെടെ ഇൗ നാട്​. യുദ്ധങ്ങളും സംഘർഷങ്ങളും അവസാനിപ്പിക്കാനും, മേഖലയുടെ സമാധാനത്തിനും എന്നും മുൻതൂക്കം നൽകി, മധ്യസ്​ഥ ശ്രമങ്ങളുമായി നയതന്ത്ര രംഗത്ത്​ സജീവമായ ഖത്തറിനെ അക്ഷരാർത്ഥത്തിൽ ഞെട്ടിക്കുന്നതായിരുന്നു തിങ്കളാഴ്​ച വൈകുന്നേരത്തെ മണിക്കൂറുകൾ.

ഇറാനും ഇസ്രായേലും തമ്മിലെ ആക്രമണ പ്രത്യാക്രമണവും, ഞായറാഴ്​ച പുലർച്ചെ അമേരിക്ക നടത്തിയ ആക്രമണവുമെല്ലാമായി മേഖല സംഘർഷഭരിതമായിരുന്നുവെങ്കിലും ഖത്തർ ഉൾപ്പെടെ ജി.സി.സി രാജ്യങ്ങളിൽ ആധിയൊന്നുമുണ്ടായിരുന്നില്ല. എന്നാൽ, ​ആശ്വാസത്തിൻെറ ആകാശത്ത്​ ഭീതിയുടെ കാർമേഘം മൂടാൻ നിമിഷങ്ങളേ വേണ്ടിവന്നുള്ളൂ. തിങ്കളാഴ്​ച വൈകുന്നേരം പ്രാദേശിക സമയം 6.45ഓടെയാണ്​ ഖത്തറിൻെറ വ്യോമ പാത താൽകാലികമായി അടച്ചുകൊണ്ടുള്ള അറിയിപ്പെത്തുന്നത്​. 6.30ന്​ ദുബൈയിലേക്കുള്ള ​ൈഫ്ല ദുബൈ വിമാനമായിരുന്നു അവസാനമായി പറന്നുയർന്നത്​. ​ന്യൂഡൽഹിയിൽ നിന്നും ദോഹയിലേക്ക്​ പറന്ന എയർഇന്ത്യ വിമാനം ഖത്തർ വ്യോമപരിതിയിലേക്ക്​ പ്രവേശിക്കും മു​േമ്പ വഴിതിരിച്ചുവിട്ടു. ലോകത്തിൻെറ പലദിക്കിൽ നിന്നും ദോഹയിലേക്ക്​ പറന്ന പല വിമാനങ്ങളും വഴിതിരിച്ചു വിടുകയോ, പുറപ്പെട്ട ഇടങ്ങളിലേക്ക്​ തിരിക്കുകയോ ചെയ്​തു.

ശേഷം, 45 മിനിറ്റിനു പിന്നാലെയാണ്​ ദോഹ, അൽ വക്​റ, ഇൻഡസ്​ട്രിയൽ ഏരിയ തുടങ്ങിയ സ്​ഥലങ്ങളിൽ ഇടിമുഴക്കംപോലെ ശബ്​ദംകേട്ടതായി പലരും പങ്കുവെച്ചുതുടങ്ങുന്നത്​. മിനിറ്റുകൾക്കകം ഖത്തറിൻെറ ആകാശത്തേത്ത്​ ചെറു തീഗോളം പോലെ മിസൈലുകളും പ്രത്യക്ഷമായി. ഇവയെ തടയുന്നതിനായി മിസൈൽ പ്രതിരോധ സംവിധാനങ്ങളും പ്രവർത്തിച്ചുതുടങ്ങിയതോടെ ആകാശം തീ ഗോളങ്ങളാൽ നിറഞ്ഞു. അന്തരീക്ഷത്തിൽ നിന്നു തന്നെ മിസൈലുകളെ തകർക്കുന്നത്​ നഗ്​നനേത്രങ്ങൾകൊണ്ട്​ ഓരോരുത്തരും കാണുകയായിരുന്നു.

ദോഹ നഗരവും, പ്രധാന റോഡുകളും പതിവുപോലെ തിരക്കിൽ ഒഴുകു​േമ്പാഴായിരുന്നു ആകാശത്തെ മിസൈൽ വർഷവും, പ്രതിരോധവും. അരമണിക്കൂറോളം നീണ്ട ഭീതിനിറഞ്ഞ അന്തരീക്ഷത്തിനു പിന്നാലെ, സാമൂഹിക മാധ്യമങ്ങളിൽ മിസൈലുകളും, പ്രതിരോധവും വീഡിയോ ക്ലിപ്പുകളായി നിറഞ്ഞു. ചിലയിടങ്ങളിൽ മിസൈൽ അവശിഷ്​ടങ്ങൾ വീണുകിടക്കുന്ന കാഴ്​ചകളുമെത്തി.

‘വൈകുന്നേരം ജോലികഴിഞ്ഞ്​ താമസസ്​ഥലത്തെത്തിയപ്പോൾ ഉഗ്രശബ്​ദം കേട്ടാണ്​ പുറത്തിറങ്ങിയത്​. ആകാശത്ത്​ തീഗോളം പോലെ ഓരോന്നായി നീങ്ങുന്ന കാഴ്​ചകണ്ട്​ ഞെട്ടി. ചിലയിടങ്ങളിൽ നിന്ന്​ ശബ്​ദവും കേട്ടിരുന്നു. എന്താണ്​ സംഭവിക്കുന്നതെന്നറിയാതെ ഭയന്നുവെങ്കിലും അധികം വൈകാതെ ആശ്വാസമായി’ -പ്രവാസിയായ കോഴിക്കോട്​ സ്വദേശി മുഹമ്മദ്​ അലി ‘ഗൾഫ്​ മാധ്യമ’ത്തോട്​ അനുഭവം പങ്കുവെച്ചു. ​

ദോഹയിൽ നിന്നും വീട്ടിലേക്കുള്ള യാത്രയിലാണ്​ ആകാശത്ത്​ തീഗോളങ്ങൾ പോലെ ഒന്ന്​ ദൃശ്യമായതെന്ന്​ മറ്റൊരു പ്രവാസി പങ്കുവെച്ചു. അരമണിക്കൂറോളം നീണ്ടു നിന്ന മിസൈൽ വർഷം പ്രവാസികളിലും സ്വദേശികളിലും ആശങ്ക പടർത്തിയെങ്കിലും എല്ലാം വിജയകരമായി പ്രതിരോധിച്ചുകൊണ്ട്​ ഖത്തർ ജനങ്ങളുടെ സുരക്ഷ ഉറപ്പാക്കി.

തൊട്ടുപിന്നാലെ അൽ ഉദൈദിലെ അമേരിക്കൻ വ്യോമതാവളം ലക്ഷ്യമിട്ട്​ ഇറാൻ മിസൈൽ ആക്രമണം നടത്തിയതായി ഖത്തർ പ്രതിരോധ മന്ത്രാലയവും, വിദേശകാര്യമന്ത്രാലയവും സ്​ഥിരീകരിച്ചു. രണ്ടു ഘട്ടങ്ങളിലായി 19 മിസൈലുകളാണ്​ ഇറാൻെറ വടക്കു നിന്നും വടക്കുപടിഞ്ഞാറു നിന്നുമായി അൽ ഉദൈദ്​ ലക്ഷ്യമാക്കി തൊടുത്തതെന്ന്​ വിദേശകാര്യമന്ത്രാലയ വക്​താവ്​ ഡോ. മാജിദ്​ അൽ അൻസാരി പറഞ്ഞു. ആദ്യ ഘട്ടത്തിലെ ഏഴ്​ മിലൈസുകളും ഖത്തർ വിജയകരമായി പ്രതിരോധിച്ചു. രണ്ടാം ഘട്ടത്തിൽ ഇറാൻ തൊടുത്ത 12ൽ 11 മിസൈലുകളെയും പ്രതിരോധിക്കാനായി. ഒരെണ്ണം അൽ ഉദൈദ്​ വ്യോമതാവളത്തിൽ വീണെങ്കിലും ആർക്കും പരിക്കോ നാശനഷ്​ടങ്ങളോ ഉണ്ടായിട്ടില്ല.