സൗദിയിൽ ഇന്ത്യൻ പാസ്പോർട്ട് സേവനങ്ങൾക്ക്​ ഇനി പുതിയ ഏജൻസി, അലങ്കിത്​ ഗ്ലോബൽ

ദമ്മാം: സൗദി അറേബ്യയിലെ ഇന്ത്യന്‍ എംബസി, കോണ്‍സുലേറ്റ് എന്നിവക്ക്​ കീഴിലുള്ള പാസ്​പോർട്ട്​, കോൺസുലാർ സേവനങ്ങളുടെ പുറംകരാർ ഏജന്‍സിയായി അലങ്കിത് അസൈന്‍മെൻറ്​ ലിമിറ്റഡിനെ തെരഞ്ഞെടുത്തു. പാസ്​പോര്‍ട്ട്, ഇതര കോണ്‍സുലാര്‍ സേവനങ്ങള്‍, വീസ, അറ്റസ്‌റ്റേഷന്‍ എന്നിവയ്ക്കുളള അപേക്ഷകള്‍ സ്വീകരിക്കുന്നതിനും ഡെലിവറി നടത്തുന്നതിനുമുള്ള കരാറാണ്​ ന്യൂഡൽഹി ആസ്ഥാനമായി, വിവിധ രാജ്യങ്ങളിൽ ബ്രാഞ്ചുകളുള്ള അലങ്കിത്​ ഗ്ലോബലിന്​ ലഭിച്ചത്​. വർഷങ്ങളായി നിലവിലുള്ള വി.എഫ്​.എസ്​ ​ഗ്ലോബലിന്​ കരാർ നഷ്​ടമായെങ്കിലും അടുത്ത രണ്ട്​ മാസം കൂടി അവർ നിലവിൽ സേവനങ്ങൾ നൽകും. അതിനുശേഷമാണ്​ അലങ്കിത്​ സേവനങ്ങൾ ആരംഭിക്കുക എന്നാണ്​ വിവരം.

നിലവിലുള്ള ഏജൻസിയുടെ കാലാവധി അവസാനിക്കുന്ന ഘട്ടത്തിൽ സര്‍ട്ടിഫൈഡ് പാസ്‌പോര്‍ട്ട് വെറ്റിങ്​ (സി.പി.വി) സർവിസിന് താല്‍പര്യമുളള കമ്പനികളില്‍നിന്ന് പുതുതായി റിയാദ് ഇന്ത്യന്‍ എംബസി ടെൻഡർ ക്ഷണിക്കുകയായിരുന്നു. അലങ്കിത് ലിമിറ്റഡിന് പുറമ ബി.എൽ.എസ് ഇൻറര്‍നാഷനല്‍, വൈ.ബി.എ കാനൂ കമ്പനി ലിമിറ്റഡ്, വി.എഫ് വേള്‍ഡ് വൈഡ് ഹോള്‍ഡിങ്​ ലിമിറ്റഡ് എന്നീ കമ്പനികളാണ് ലേലത്തില്‍ പങ്കെടുത്തത്. ഏറ്റവും കുറഞ്ഞ തുക ക്വാട്ട്​ ചെയ്​ത അലങ്കിതിന് കരാര്‍ ഉറപ്പിക്കുകയായിരുന്നു.

18 വര്‍ഷത്തിലേറെയായി വി.എഫ്.എസ് ആണ് സൗദിയിൽ സി.പി.വി സേവനങ്ങൾ നല്‍കിവരുന്നത്. അപ്രതീക്ഷിതമായി വി.എഫ്.എസി​െൻറ കരാർ സേവനങ്ങൾ അവസാനിച്ചത് പ്രവാസികൾക്കിടയിൽ ആശങ്ക സൃഷ്​ടിച്ചിട്ടുണ്ടെങ്കിലും പലപ്പോഴും അവരുടെ സേവനം സംബന്ധിച്ച്​ അഭിപ്രായ ഭിന്നതകളും പരാതികളും ഉയർന്നിട്ടുണ്ട്​​. പുതിയ കമ്പനിയുടെ സേവനം എങ്ങനെയായിരിക്കുമെന്ന്​ അറിയാനുള്ള കാത്തിരിപ്പിലാണ് പ്രവാസികൾ.

ഇന്ത്യയിലെ ആധാർ കാർഡുകൾ നിർമിക്കുന്നതിന് ചുക്കാൻ പിടിച്ച കമ്പനി എന്ന നിലയിലാണ് അലങ്കിത് ശ്രദ്ധിക്കപ്പെടുന്നത്. അതിനപ്പുറത്ത് സൗദിയിലെ സേവനങ്ങളുടെ ഔട്ട്സോഴ്‌സിങ്​ ഏജന്‍സിയായി അലങ്കിത് പ്രവർത്തിച്ചു തുടങ്ങണമെങ്കിൽ നിരവധി കടമ്പകൾ കടക്കേണ്ടതുണ്ട്. അലങ്കിത് അസൈൻമെൻറ്​സ്​ ലിമിറ്റഡ് ഒരു ഐ.എസ്​.ഒ 9001:2008 സർട്ടിഫൈഡ് കമ്പനിയാണ്. പ്രഫഷനൽ സ്ഥാപനം എന്ന നിലയിൽ വർഷങ്ങളുടെ അനുഭവപരിചയത്തോടെ, ഇ-ഗവേണൻസ് സേവനദാതാക്കൾക്കിടയിൽ ശ്രദ്ധിക്കപ്പെട്ട കമ്പനിയാണ്​. 28 വർഷത്തിലേറെ പ്രവർത്തനപരിചയമുള്ള കമ്പനി ദേശീയവും അന്തർദേശീയവുമായ നിരവധി സേവനങ്ങൾ സർക്കാറിനായി ചെയ്തിട്ടുള്ളതായി അവകാശപ്പെടുന്നു.