വെസ്​റ്റ്​ ബാങ്കിൽ പരമാധികാരം സ്ഥാപിക്കൽ: ഇസ്രായേൽ പാർലമെന്റ്​ തീരുമാനത്തിനെതിരെ​ സൗദിയുൾപ്പടെ 10​ രാജ്യങ്ങൾ

റിയാദ്​: ഫലസ്​തീനിലെ വെസ്​റ്റ്​ ബാങ്കിന്മേൽ പരമാധികാരം അടിച്ചേൽപ്പിക്കാനുള്ള​ ഇസ്രായേൽ പാർലമെൻറായ ‘നെസെറ്റ്’​ തീരുമാനത്തിനെതിരെ അറബ്​, മുസ്​ലിം രാജ്യങ്ങൾ. അധിനിഷ്​ട വെസ്​റ്റ്​ ബാങ്കിന്മേൽ ‘ഇസ്രായേൽ പരമാധികാരം’ അടിച്ചേൽപ്പിക്കണമെന്ന് ആവശ്യപ്പെടുന്ന ഭരണകൂട പ്രഖ്യാപനത്തിന് നെസെറ്റ് അംഗീകാരം നൽകിയതിനെ ശക്തമായി അപലപിച്ച്​ സൗദി അറേബ്യ, ബഹ്‌റൈൻ, ഈജിപ്ത്, ഇന്തോനേഷ്യ, ജോർദാൻ, നൈജീരിയ, ഫലസ്തീൻ, ഖത്തർ, തുർക്കി, യു.എ.ഇ എന്നീ രാജ്യങ്ങളും അറബ്​ ലീഗ്​, ഒ.​െഎ.സി എന്നീ അന്താരാഷ്​ട്ര സംഘടനകളുമാണ്​ രംഗത്തുവന്നത്​.​

ദ്വിരാഷ്​ട്ര പരിഹാരത്തെ ദുർബലപ്പെടുത്തുന്ന നീക്ക​മാണിതെന്ന്​​ സൗദി വിദേശകാര്യ മന്ത്രാലയം പ്രസ്​താവനയിൽ പറഞ്ഞു. അന്താരാഷ്​ട്ര നിയമത്തിന്റെയും പ്രമേയങ്ങളുടെയും നഗ്​നവും അസ്വീകാര്യവുമായ ലംഘനമായി ഇൗ നടപടിയെ കണക്കാക്കുന്നുവെന്ന്​ അറബ്​ ലീഗും ഒ.​െഎ.സിയും വ്യക്തമാക്കി. 1967 മുതൽ കൈവശപ്പെടുത്തിയ ഫലസ്തീൻ പ്രദേശങ്ങളിലെ കുടിയേറ്റ പ്രവർത്തനങ്ങൾ ഉൾപ്പെടെ അധിനിവേശത്തെ നിയമവിധേയമാക്കാൻ ലക്ഷ്യമിട്ടുള്ളതാണ്​ ഇത്​. അധിനിവിഷ്​ട ഫലസ്തീൻ പ്രദേശത്തിന്മേൽ ഇസ്രായേലിന് പരമാധികാരമില്ലെന്ന് അറബ്​ ലീഗും ഒ.​െഎ.സിയും ആവർത്തിച്ചു. ഇസ്രായേലി​െൻറ ഏകപക്ഷീയമായ ഈ നീക്കത്തിന് നിയമപരമായ പ്രാബല്യമില്ലെന്നും അധിനിവിഷ്​ട ഫലസ്തീൻ പ്രദേശത്തി​െൻറ നിയമപരമായ പദവി മാറ്റാൻ കഴിയില്ലെന്നും അവർ ഊന്നിപ്പറഞ്ഞു.

ഇസ്രായേലി​െൻറ ഇത്തരം നടപടികൾ മേഖലയിലെ രൂക്ഷമാവുന്ന സംഘർഷങ്ങൾക്ക് ആക്കം കൂട്ടുകയേ ഉള്ളൂവെന്നും ഗസ്സ മുനമ്പിലെ ഇസ്രായേലി​െൻറ ആക്രമണവും മാനുഷിക ദുരന്തവും ഈ സംഘർഷങ്ങളെ കൂടുതൽ വഷളാക്കുമെന്നും സൗദിയുൾപ്പടെയുള്ള രാജ്യങ്ങൾ ഏകസ്വരത്തിൽ ഊന്നിപ്പറഞ്ഞു.

ബലപ്രയോഗത്തിലൂടെ ഒരു വിധി നടപ്പാക്കുക, നീതിയുക്തവും ശാശ്വതവുമായ സമാധാനം കൈവരിക്കാനുള്ള സാധ്യതകളെ ദുർബലപ്പെടുത്തുക, ദ്വിരാഷ്​ട്ര പരിഹാരത്തി​െൻറ സാധ്യത ഇല്ലാതാക്കുക എന്നിവ ലക്ഷ്യമിട്ടുള്ള നിയമവിരുദ്ധമായ ഇസ്രായേലി നയങ്ങൾ നിർത്തലാക്കാൻ അടിയന്തര നടപടി സ്വീകരിക്കാനും നിയമപരവും ധാർമികവുമായ ഉത്തരവാദിത്തങ്ങൾ ഏറ്റെടുക്കാനും യു.എൻ സെക്യൂരിറ്റി കൗൺസിലും ബന്ധപ്പെട്ട എല്ലാ കക്ഷികളും ഉൾപ്പെടെയുള്ള അന്താരാഷ്​ട്ര സമൂഹത്തോട് രാജ്യങ്ങഹ ആവശ്യപ്പെട്ടു.

അന്താരാഷ്​ട്ര പ്രമേയങ്ങളുടെയും അറബ് സമാധാന സംരംഭത്തി​െൻറയും അടിസ്ഥാനത്തിലുള്ള ദ്വിരാഷ്​ട്ര പരിഹാരത്തോടുള്ള പ്രതിബദ്ധത രാജ്യങ്ങൾ ആവർത്തിച്ചു പ്രഖ്യാപിച്ചു. 1967 ജൂൺ നാലിന് കിഴക്കൻ ജറുസലേം തലസ്ഥാനമായി സ്വതന്ത്രവും പരമാധികാരവുമായ ഫലസ്തീൻ രാഷ്​ട്രം സ്ഥാപിക്കണമെന്നും അവർ ആവശ്യപ്പെട്ടു.