ഗസ്സ യുദ്ധം അവസാനിപ്പിക്കാൻ ഗൾഫ്​ രാജ്യങ്ങളും യുഎസും ഒരുമിച്ച്​ പ്രവർത്തിക്കും

റിയാദ്​: ഗസ്സ യുദ്ധം അവസാനിപ്പിക്കാൻ അമേരിക്കയും ഗൾഫ്​ രാജ്യങ്ങളും ഒരുമിച്ച് പ്രവർത്തിക്കാൻ ധാരണയിലെത്തി. മേഖലയിലെ അസ്ഥിരതക്ക് പരിഹാരം കാണാൻ രാജ്യങ്ങൾ ഒറ്റക്കെട്ടായി നിൽക്കാൻ റിയാദിൽ ചേർന്ന ഗൾഫ്​-യുഎസ് ഉച്ചകോടി ആഹ്വാനം ചെയ്തു. യുദ്ധം അവസാനിപ്പിക്കാൻ ഒരുമിച്ച് നിൽക്കണമെന്ന് അമേരിക്കൻ പ്രസിഡൻറ്​ ഡൊണാൾഡ് ട്രംപും യുദ്ധം അവസാനിപ്പിക്കാൻ യുഎസുമായി ചേർന്ന് പ്രവർത്തിക്കുമെന്ന് സൗദി കിരീടാവകാശി അമീർ മുഹമ്മദ്​ ബിൻ സൽമാനും പറഞ്ഞു.

അമേരിക്കൻ പ്രസിഡൻറി​െൻറ സൗദി സന്ദർശനത്തോട്​ അനുബന്ധിച്ച്​ സംഘടിപ്പിച്ച ഗൾഫ്​-യുഎസ്​ ഉച്ചകോടിയിൽ പ​ങ്കെടുക്കാൻ സൽമാൻ രാജാവി​െൻറ ക്ഷണം സ്വീകരിച്ചാണ്​ ഇതര ഗൾഫ് രാജ്യങ്ങളുടെ നേതാക്കളും പ്രതിനിധികളും എത്തിയത്​. ബുധനാഴ്​ച രാവിലെ റിയാദിലെ കിങ്​ അബ്​ദുൽ അസീസ്​ കോൺഫറൻസ്​ സെൻററിലായിരുന്നു ഉച്ചകോടി. ഗൾഫ് നേതാക്കളും പ്രതിനിധികളും രാവിലെ തന്നെ എത്തി. ഡോണൾഡ്​ ട്രംപ്​ പ​ങ്കെടുത്ത ഉച്ചകോടി സൗദി കിരീടാവകാശി അമീർ മുഹമ്മദ്​ ബിൻ സൽമാൻ ഉദ്​ഘാടനം ചെയ്​തു.

ഖത്തർ അമീർ ശൈഖ്​ തമീം ബിൻ ഹമദ്​ അൽതാനി, കുവൈത്ത്​ അമീർ ശൈഖ്​ മിഷാൽ അൽ അഹ്​മദ്​ അൽ സബാഹ്​, അബൂദാബി കിരീടാവകാശി ശൈഖ്​ ഖാലിദ്​ ബിൻ മുഹമ്മദ്​ ബിൻ സായിദ്​, ഒമാൻ ഉപപ്രധാനമന്ത്രി അസാദ്​ ബിൻ താരിഖ്​ അൽ സായിദ്​, ബഹ്​റൈൻ രാജാവ്​ ഹമദ്​ ബിൻ ഈസ ആൽ ഖലീഫ എന്നിവരും പ​ങ്കെടുത്തു.