റിയാദിൽ കാണാതായ മലയാളിയുടെ മൃതദേഹം മോർച്ചറിയിൽ

റിയാദ്​: രണ്ട്​ ദിവസം മുമ്പ്​ റിയാദിൽ കാണാതായ മലയാളിയുടെ മൃതദേഹം ആശുപത്രി മോർച്ചറിയിൽ കണ്ടെത്തി. റിയാദിൽ ടാക്​സി ഡ്രൈവറായ മലപ്പുറം ഉമ്മത്തൂർ സ്​കൂൾപറമ്പ്​ സ്വദേശി കിളിയമണ്ണിൽ മുസ്​തഫയെ (55) ഞായറാഴ്​ച മുതലാണ്​ കാണാതായത്​. പുലർച്ചെ മലസിലെ കിങ്​ അബ്​ദുല്ല പാർക്കിൽ നടക്കാൻ പോയതാണ്​. പിന്നീടൊരു വിവരവുമുണ്ടായില്ല.

ടാക്​സി ഡ്രൈവറായതിനാൽ ട്രാഫിക്​ പൊലീസ്​ പിടിച്ച്​ സ്​റ്റേഷനിലായിരിക്കും എന്നാണ്​ റിയാദിൽ തന്നെയുള്ള സഹോദരങ്ങളും മറ്റ്​ ബന്ധുക്കളും കരുതിയത്​. മുമ്പ്​ ഗതാഗത നിയമലംഘനത്തിന്​ പൊലീസ്​ പിടിച്ച്​ 48 മണിക്കൂറിന്​ ശേഷമാണ്​ പുറത്തിറങ്ങിയത്​. ആ അനുഭവമുള്ളതിനാൽ 48 മണിക്കൂർ വരെ ബന്ധുക്കൾ കാത്തിരുന്നു. എന്നിട്ടും വിവരമില്ലാതായപ്പോൾ ചൊവ്വാഴ്​ച രാവിലെ പിതൃസഹോദര പുത്രനായ നാസർ ഉമ്മത്തൂരും സുഹൃത്ത്​ ഇബ്രാഹിമും ആശുപത്രികളും പൊലീസ്​ സ​്​റ്റേഷനുകളും കയറിയിറങ്ങി അന്വേഷിക്കുന്നതിനിടയിലാണ്​ ശുമൈസി ആശുപത്രിയുടെ മോർച്ചറിയിൽ മൃതദേഹം കണ്ടെത്തിയത്​.

മോർച്ചറി അധികൃതരെ ഇഖാമ കാണിച്ചപ്പോൾ അവർ മൃതദേഹങ്ങൾ പരിശോധിച്ച്​ കണ്ടെത്തുകയായിരുന്നു. ഞായറാഴ്​ച പുലർച്ചെ പാർക്കിൽ വ്യായാമത്തിന്​ പോയ മുസ്​തഫ ഒാടുന്നതിനിടയിൽ കുഴഞ്ഞുവീഴുകയായിരുന്നത്രെ. അവിടെ വെച്ച്​ തന്നെ മരണവും സംഭവിച്ചു. പൊലീസാണ്​ മൃതദേഹം ആശുപത്രിയിൽ എത്തിച്ചത്​. ഇതിന്​ മു​െമ്പാരിക്കലും ഒരു രോഗങ്ങളും ഉണ്ടായിട്ടില്ലാത്ത, ദിവസവും വ്യായാമം ചെയ്​ത്​ നല്ലതുപോലെ ആരോഗ്യം പരിപാലിക്കുന്നയാളായിരുന്നു മുസ്​തഫയെന്നും മരണം വിശ്വസിക്കാനായില്ലെന്നും നാസർ ഉമ്മത്തൂർ ‘ഗൾഫ്​ മാധ്യമ’ത്തോട്​ പറഞ്ഞു.

റിയാദിലുള്ള സഹോദരങ്ങളായ ബഷീർ, സലീം, സക്കീർ എന്നിവരുടെ​ നേതൃത്വത്തിൽ മൃതദേഹം റിയാദിൽ ഖബറടക്കുന്നതിനുള്ള ശ്രമം നടക്കുന്നു. 33 വർഷമായി റിയാദിലുള്ള മുസ്​തഫ ഒന്നര വർഷം മുമ്പാണ്​ നാട്ടിൽ പോയിവന്നത്​. പരേതനായ ഇസ്​മാഇൗലാണ്​ പിതാവ്​. മതാവ്​: നബീസ. ഭാര്യ: മുംതാസ്​, മക്കൾ: അർഷാദ്​, അർഷിദ, നിദ. ​മറ്റ്​ സഹോദരങ്ങൾ: ഷരീഫ്​, ഹഫ്​സത്ത്​, സാജിദ, ജുമൈല.