റിയാദിൽ കാണാതായ കന്യാകുമാരി സ്വദേശി മരിച്ച നിലയിൽ

റിയാദ്: നജ്​റാനിൽ നിന്ന്​ റിയാദിലെത്തി മൂന്നാഴ്​ച മുമ്പ്​ കാണാതായ കന്യാകുമാരി സ്വദേശിയുടെ മൃതദേഹം ആശുപത്രി മോർച്ചറിയിൽ കണ്ടെത്തി. ഇക്കഴിഞ്ഞ ജൂലൈ 25ന് നജ്റാനിൽ നിന്നും റിയാദ്​ അസീസിയയിലെ സാപ്​റ്റ്​കോ ബസ് സ്​റ്റാൻഡിൽ വന്നിറങ്ങിയ ശേഷം കാണാതായ കന്യാകുമാരിയിലെ അരുമനൈ, തെറ്റി വിളൈ, മറുതര വിളാഗം സ്വദേശി ജോൺ സേവ്യറി​ന്‍റെ (43) മൃതദേഹമാണ്​ റിയാദ്​ ശുമൈസി ആശുപത്രി മോർച്ചറിയിലുള്ളതെന്ന്​ കണ്ടെത്തിയത്​.

അസീസിയ പൊലീസ്​ സ്​റ്റേഷനിൽനിന്ന്​ ഇന്ത്യൻ എംബസിക്ക്​ ലഭിച്ച വിവരത്തിന്‍റെ അടിസ്ഥാനത്തിൽ ജീവകാരുണ്യപ്രവർത്തകൻ സിദ്ദീഖ്​ തുവ്വൂർ മോർച്ചറിയിലെത്തി തിരിച്ചറിയുകയായിരുന്നു. ജൂലൈ 29ാം തീയതി മരിച്ചതായാണ്​ പൊലീസ്​ രേഖകളിൽ പറയുന്നത്​. അസീസിയ ബസ്​ സ്​റ്റേഷന്​ സമീപമുള്ള റോഡ്​ സൈഡിൽ മരിച്ച നിലയിൽ കണ്ടെത്തുകയായിരുന്നു.

2022 ജൂലൈ ഒമ്പതിനാണ്​ നജ്റാനിൽ മേസൺ ജോലിക്കായി നാട്ടിൽനിന്നെത്തിയത്​. കരാറെടുത്ത്​ ജോലി ചെയ്ത വകയിൽ വലിയ സാമ്പത്തിക ബാധ്യത വന്നുചേരുകയും പ്രതിസന്ധിയിലാവുകയും ചെയ്​തു. ഇതറിഞ്ഞ റിയാദിലുള്ള സുഹൃത്ത് ത​െൻറ അടുത്തേക്ക്​ വരാൻ ആവശ്യപ്പെടുകയായിരുന്നു. എന്നാൽ റിയാദിലെത്തി സുഹൃത്തിനെ ബന്ധപ്പെടാൻ ശ്രമിച്ചപ്പോൾ ഫോൺ സ്വിച്ച് ഓഫ് ആയതിനാൽ കഴിഞ്ഞില്ല. ഇതോടെ വലിയ മാനസികപ്രയാസത്തിലായ ജോൺ സേവ്യർ അസീസിയ ബസ് സ്​റ്റാൻഡിൽനിന്നും നാട്ടിലുള്ള മകനെ വിളിച്ച് റിയാദിലേക്ക് വരാൻ പറഞ്ഞ സുഹൃത്ത് ചതിക്കുകയായിരുന്നു എന്നു പറയുകയായിരുന്നത്രെ.

അതാണ്​ ഒടുവിലത്തെ വിവരം. പിന്നീട്​ ആളെ കുറിച്ച്​ ഒരു വിവരവുമില്ലാതാവുകയായിരുന്നു. വരാൻ പറഞ്ഞ്​ സുഹൃത്ത്​ ചതിച്ചതിനെ തുടർന്നുണ്ടായ മാനസികാഘാതം കൊണ്ടായിരിക്കാം പിന്നീട്​ അസീസിയ ഭാഗത്ത് അലഞ്ഞുതിരിയുന്നത്​ കണ്ടതായും ചില വിവരങ്ങൾ കിട്ടി. ഒരാൾ ഇങ്ങനെ അലഞ്ഞുതിരിയുന്നതി​െൻറ ചിത്രം സമൂഹമാധ്യമങ്ങളിൽ പ്രചരിക്കുകയും ചെയ്​തു. ഇതിനെ തുടർന്ന് ജീവകാരുണ്യപ്രവർത്തകൻ സിദ്ദീഖ്​ തുവ്വൂർ അസീസിയ ഭാഗത്ത് അന്വേഷണം നടത്തിയെങ്കിലും കണ്ടെത്താൻ കഴിഞ്ഞിരുന്നില്ല.

തുടർന്ന്​ സാമൂഹികപ്രവർത്തകരുടെ നേതൃത്വത്തിൽ വ്യാപക അന്വേഷണം തുടരുകയായിരുന്നു. ഇത്​ സംബന്ധിച്ച്​ ‘ഗൾഫ്​ മാധ്യമ’വും വാർത്ത പ്രസിദ്ധീകരിച്ചിരുന്നു. ഇതിനിടയിലാണ്​ എംബസിയിൽ വിവരം ലഭിക്കുന്നതും മോർച്ചറിയിൽ മൃതദേഹം കണ്ടെത്തുകയുമായിരുന്നു. അനന്തര നടപടികൾക്കും മൃതദേഹം നാട്ടിൽ അയക്കുന്നതിനും സാമൂഹികപ്രവർത്തകരായ സിദ്ദീഖ്​ തുവ്വൂരും സാലി എം. സാലിയും രംഗത്തുണ്ട്​.​ സുമതിയാണ്​ ജോൺ സേവ്യറിന്‍റെ അമ്മ. ഭാര്യ: ശ്രീകുമാരി, മക്കൾ: താജിൽ, തർഷിൻ ജെന.