സൗദിയിൽ വാഹനാപകടത്തിൽ മുണ്ടക്കയം സ്വദേശി മരിച്ചു

റിയാദ്​: സൗദി കിഴക്കൻ പ്രവിശ്യയിലെ അൽ അഹ്​സക്ക്​ സമീപം വാഹനാപകടത്തിൽ മരിച്ച കോട്ടയം മുണ്ടക്കയം പുഞ്ചവയൽ 504 നഗർ ഇടപ്പള്ളിൽ വെസ്‌ലി ജോൺസണി​െൻറ (ജോമോൻ, 33) മൃതദേഹം ബുധനാഴ്​ച രാത്രിയിൽ നാട്ടിലേക്ക്​ കൊണ്ടുപോകും. ഇക്കഴിഞ്ഞ തിങ്കളാഴ്​ച പുലർച്ചെയായിരുന്നു അപകടം. റിയാദിൽ സ്വകാര്യ കമ്പനിയിൽ ഡ്രൈവറായ വെസ്​ലി ജോലിയുടെ ഭാഗമായി അൽ അഹ്​സയിലേക്ക്​ പോയതാണ്​. അവിടെ വെച്ച്​ പുലർച്ചെ 12.15ഓടെയാണ്​ അപകടമുണ്ടായതത്രെ. വെസ്​ലി ഓടിച്ച മിനി ട്രക്കി​െൻറ ഡ്രൈവർ കാബിൻ പാടെ തകർന്നുപോയി.

രണ്ട്​ വർഷം മുമ്പാണ്​ വെസ്​ലി സൗദിയിലെത്തിയത്​. അവിവാഹിതനാണ്​. വിവാഹം കഴിക്കാനായി ജനുവരിയിൽ നാട്ടിൽ പോകാൻ തീരുമാനിച്ചിരിക്കുകയായിരുന്നു.

ജോൺസൺ ആണ്​ പിതാവ്​. ജെസ്സി മാതാവ്​. സഹോദരങ്ങൾ: ജോജോ മോൻ, രേഷ്​മ. ബുധനാഴ്​ച രാത്രി 11.35ന്​ പുറപ്പെടുന്ന എയർ ഇന്ത്യ വിമാനത്തിൽ മൃതദേഹം കൊണ്ടുപോകും. മുംബൈ വഴി വ്യാഴാഴ്​ച ഉച്ചക്ക്​ 12 ഓടെ നെടുമ്പാശ്ശേരി വിമാനത്താവളത്തിലെത്തിക്കും.

മരണാനന്തര നിയമ നടപടിക്രമങ്ങൾ പൂർത്തീകരിക്കാനും മൃതദേഹം നാട്ടിലെത്തിക്കാനും ആവശ്യമായ പ്രവർത്തനങ്ങളുമായി സാമൂഹികപ്രവർത്തകരായ ശിഹാബ്​ കൊട്ടുകാട്​, പ്രസാദ്​ കരുനാഗപ്പള്ളി, റിയാദ്​ ഹെൽപ്​ ഡെസ്​ക്, കോട്ടയം പ്രവാസി അസോസിയേഷൻ ഭാരവാഹി ബഷീർ സാപ്​റ്റികോ, കാഞ്ഞിരപ്പള്ളി പ്രവാസി അസോസിയേഷൻ ജനറൽ സെക്രട്ടറി അഫ്സൽ ബിൻ ഇസ്മാഈൽ എന്നിവരാണ്​ രംഗത്തുണ്ടായിരുന്നത്​.