ബത്​ഹയിലെ വ്യാപാര സമുച്ചയത്തിൽ തീപിടിത്തം

റിയാദ്​: ബത്​ഹ മെയിൻ സ്​ട്രീറ്റിലെ വ്യാപാര സമുച്ചയത്തിൽ തീപിടിത്തം. പ്രശസ്​തമായ ഫൈവ്​ ബിൽഡിങ്ങി​നോട് (ഫിലിപ്പീൻസ്​ മാർക്കറ്റ്​)​ ചേർന്നുള്ള മോഡേൺ ഇലക്​ട്രിക്കൽ മാർക്കറ്റ്​ എന്ന്​ അറിയപ്പെടുന്ന കെട്ടിട സമുച്ചയത്തിലാണ്​ ഞായറാഴ്​ച വൈകീട്ട്​ ഏ​ഴോടെ തീപിടിത്തമുണ്ടായത്​. ഇൗ കെട്ടിടത്തിനുള്ളിലെ ഒരു ഷൂ ​കടയിലാണ്​ ആദ്യം തീയുണ്ടായതെന്ന്​ പറയപ്പെടുന്നു.

സമീപത്തെ ഒന്നു രണ്ട്​ കടകളിലേക്ക്​ കൂടി ബാധിച്ചിട്ടുണ്ട്​. കനത്ത പുക അന്തരീക്ഷം മൂടിയിരിക്കുകയാണ്​. അഗ്​നിശമന സേനയുടെ നിരവധി യൂനിറ്റുകൾ എത്തി തീയണക്കാൻ ശ്രമിക്കുന്നുണ്ട്​. ആളപായമൊന്നുമില്ല. നോമ്പുതുറ സമയത്ത്​ കടകളെല്ലാം അടച്ചതിനാൽ പരിസരത്ത്​ അധികം ആളുകളുണ്ടായിരുന്നില്ല.

ബത്​ഹയിൽ ആദ്യ കാലം മുതലുള്ള ഇലക്​ട്രിക്കൽ മാർക്കറ്റാണ്​ ഇത്​. ഇലക്​ട്രിക്കൽ ഷോപ്പുകളാണ്​ ഇവിടെ കൂടുതൽ. ഇപ്പോൾ മറ്റ്​ വിവിധതരം വ്യാപാര സ്ഥാപനങ്ങളും ഇവിടെ പ്രവർത്തിക്കുന്നുണ്ട്​.