സൗദി പണ്ഡിതനെ കുത്തിക്കൊന്ന്​ വീട്​ കൊള്ളയടിച്ചു; ഈജിപ്​ഷ്യൻ കുറ്റവാളിയുടെ വധശിക്ഷ നടപ്പാക്കി

റിയാദ്​: ഭവന ഭേദനം നടത്തി സൗദി പണ്ഡിതനെ കത്തികൊണ്ട്​ പലതവണ കുത്തി ക്രൂരമായി കൊലപ്പെടുത്തിയ ഈജിപ്​ഷ്യൻ ഘാതകന്റെ വധശിക്ഷ നടപ്പാക്കി. എഴുത്തുകാരനും യൂനിവേഴ്​സിറ്റി പ്രഫസറും ഗവേഷകനും ഹദീസ്​ പണ്ഡിതനുമായ ഡോ. അബ്​ദുൽ മാലിക്​ ഖാദിയെ വധിച്ച മഹ്​മൂദ്​ അൽ മുൻതസിർ അഹ്​മദ്​ യൂസുഫ് എന്നയാളുടെ​​ ശിക്ഷയാണ്​ സംഭവമുണ്ടായി 42ാം ദിവസം നടപ്പാക്കിയത്​. ഭിന്നശേഷിക്കാരൻ കൂടിയായ പ്രഫസറുടെ മുൻ പരിചയക്കാരനായിരുന്നു ഡെലിവറി ജീവനക്കാരനായ പ്രതി. ​

കിങ്​ ഫഹദ്​ സർവകലാശാലയിലെ ഇസ്​ലാമിക്​ സ്​റ്റഡീസ്​ വിഭാഗം മേധാവി സ്ഥാനത്തുനിന്ന്​ വിരമിച്ച്​ സൗദി കിഴക്കൻ പ്രവിശ്യയിലെ വീട്ടിൽ ഭാര്യയോടൊപ്പം കഴിഞ്ഞുവരികെയാണ്​ 80 വയസുകാരനായ പ്രഫസർ കൊല്ലപ്പെട്ടത്​. ദമ്മാമിലെ ദഹ്​റാനിലുള്ള വീട്ടിൽവെച്ച് ഇക്കഴിഞ്ഞ​ ജൂൺ അഞ്ചിനായിരുന്നു സംഭവം. ഈ വീടിന്​ സമീപത്തുള്ള സൂപ്പർമാർക്കറ്റിലെ ഡെലിവറി ജീവനക്കാരനെന്ന നിലയിൽ പ്രതിക്ക്​ പ്രഫസറെ മുൻ പരിചയമുണ്ടായിരുന്നു. ഇത്​ മുതലെടുത്ത്​ വീട്ടിൽ പ്രഫസറും ഭാര്യയും തനിച്ചാണെന്ന്​ മനസിലാക്കി മോഷണ ഉദ്ദേശത്തോടെ കടന്നുകയറുകയായിരുന്നു.

അപ്രതീക്ഷിതമായി വാതിൽ തള്ളിത്തുറന്ന്​ അകത്തുകയറിയ പ്രതി ദമ്പതികളെ ആക്രമിച്ചു. 16 തവണയാണ്​ പ്രഫസറെ കുത്തിയത്​. സംഭവസ്ഥലത്ത്​ തന്നെ അദ്ദേഹം മരിച്ചു. ഭർത്താവിനെ അക്രമിക്കുന്നത്​​ തടയാൻ ശ്രമിച്ച ഭാര്യ അദ്‌ല ബിന്ത് ഹമീദ് മർദിനിയെ മർദിക്കുകയും കത്തി കൊണ്ട്​ ആക്രമിക്കുകയും ചെയ്​തു. ഗുരുതര മുറിവേറ്റ അവർ ഇപ്പോഴും അപകടനില തരണം ചെയ്​തിട്ടില്ല. 42 ദിവസമായി ദമ്മാമിലെ ആശുപത്രിയിൽ തീവ്രപരിചരണ വിഭാഗത്തിലാണ്​. അതിനു ശേഷം വീട്ടിൽനിന്ന്​ 3,000 റിയാൽ പ്രതി മോഷ്​ടിച്ചു.

അന്ന്​ തന്നെ കിഴക്കൻ പ്രവിശ്യാ പൊലീസ് കുറ്റവാളിയെ പിടികൂടി. അറസ്​റ്റ്​ ​രേഖപ്പെടുത്തി കൂടുതൽ അന്വേഷണത്തിനായി പബ്ലിക് പ്രോസിക്യൂഷന് കൈമാറുകയായിരുന്നു. അതിവേഗം അന്വേഷണം പൂർത്തിയാക്കി കോടതിയിലെത്തിയ കേസിൽ വധശിക്ഷ വിധിച്ചു. ദമ്മാമിൽ വ്യാഴാഴ്ച ആഭ്യന്തര മന്ത്രാലയം വധശിക്ഷ നടപ്പാക്കി. മുൻകൂർ ആസൂത്രണത്തോടെയാണ്​ പ്രതി കൃത്യം നടത്തിയതെന്ന്​ തെളിയിക്കപ്പെട്ടിരുന്നു.

വേഗത്തിലുള്ളതും നിർണായകവുമായ ഒരു നീതിന്യായ പ്രക്രിയയാണ്​ നടന്നതെന്ന്​ മന്ത്രാലയം വാർത്താക്കുറിപ്പിൽ പറഞ്ഞു. ദഹ്‌റാൻ നഗരത്തെയും പ്രത്യേകിച്ച് സൗദി അറേബ്യയെയും മുഴുവൻ പിടിച്ചുകുലുക്കിയ ഭയാനകമായ കുറ്റകൃത്യമായിരുന്നു ഇതെന്നും കുറ്റവാളിയുടെ ഗുരുതരമായ കുറ്റകൃത്യത്തി​ന്റെ ഭയാനകതയും ഭീകരതയും കണക്കിലെടുക്കുമ്പോൾ അതി​ന്റെ പ്രത്യാഘാതങ്ങൾ രാജ്യത്തിനപ്പുറത്തേക്ക് വ്യാപിച്ചെന്നും മന്ത്രാലയം ചൂണ്ടിക്കാട്ടി. നിരപരാധികളെ ആക്രമിക്കാനും അവരുടെ രക്തം ചിന്താനും സ്വത്ത് മോഷ്​ടിക്കാനും ജീവിക്കാനും സുരക്ഷിതത്വത്തിനുമുള്ള അവകാശം ലംഘിക്കാനും ധൈര്യപ്പെടുന്ന ഏതൊരാൾക്കും ന്യായമായ ശിക്ഷയാണ്​ ഇതെന്നും ഇത് എല്ലാവർക്കും പാഠമാണെന്നും പ്രസ്​താവനയിൽ കൂട്ടിച്ചേർത്തു.

കിങ്​ ഫഹദ് സർവകലാശാലയിലെ ഇസ്​ലാമിക പഠന വകുപ്പിൽ പ്രഫസറും മേധാവിയുമായിരുന്ന ഖാദി, ധാർമികതയും ഉദാരതയും കുടുംബത്തോടും ബന്ധുക്കളോടും ദയയും വിദ്യാർഥികളോട്​ വളരെ അടുപ്പവും സൂക്ഷിച്ചിരുന്ന അറിയപ്പെടുന്ന പണ്ഡിതനായിരുന്നു എന്നും ആഭ്യന്തര മന്ത്രാലയം വ്യക്തമാക്കി. ഹദീസ് മേഖലയിൽ പണ്ഡിതോചിതമായ സംഭാവനകൾ അദ്ദേഹം നൽകിയിട്ടുണ്ട്​. ജോലിയിൽനിന്ന്​ വിരമിച്ചതിനുശേഷം പഠനം, എഴുത്ത് എന്നിവ തുടരുകയും ‘ദ എൻസൈക്ലോപീഡിയ ഓഫ് പ്രോഫെറ്റിക് ഹദീസ്’, ‘ദ ഓതേഴ്സ് ഓൺ ദ സുന്നത്ത് ആൻഡ് ബയോഗ്രഫി’ എന്നീ വിജ്ഞാനകോശ പുസ്തകങ്ങൾ പ്രസിദ്ധീകരിക്കുകയും ചെയ്​തിരുന്നു. രാജ്യത്ത് ഏറെ​ അറിയപ്പെടുന്ന ഒരു പണ്ഡിതനായിരുന്നു അദ്ദേഹം.