സൗദി കിഴക്കൻ മേഖലയിൽ വാഹനാപകടങ്ങൾ 76 ശതമാനം കുറഞ്ഞു

ദമ്മാം: ശക്തമായ ഗതാഗത നിയന്ത്രണ സംവിധാനങ്ങൾ സൗദി കിഴക്കൻ പ്രവിശ്യയിയിൽ വാഹനാപകടങ്ങൾ 76 ശതമാനം കുറച്ചതായി റിപ്പോർട്ട്​. അപകടം മൂലമുള്ള മരണങ്ങൾ 72 ശതമാനം കുറഞ്ഞതായും ഗതാഗത സുരക്ഷാസമിതി വ്യക്തമാക്കി. ഗുരുതരപരി​ക്കേൽക്കുന്നവരുടെ എണ്ണത്തിലും കുറവ്​ വന്നിട്ടുണ്ട്​. ഇതിലൂടെ 26 ലക്ഷം ഡോളറി​െൻറ ചെലവാണ്​ കുറഞ്ഞത്​.

കിഴക്കൻ പ്രവിശ്യ ഗവർണർ അമീർ സഉൗദ് ബിൻ നാഇഫി​െൻറ അധ്യക്ഷതയിൽ തിങ്കളാഴ്ച ഗവർണറേറ്റിൽ ചേർന്ന യോഗമാണ്​ വിലയിരുത്തൽ നടത്തിയത്​. ഗതാഗത സുരക്ഷാസമിതി സെക്രട്ടറി ജനറൽ അബ്​ദുല്ല അൽരാജ്ഹിയും ഏജൻസികളും യോഗത്തിൽ പ​ങ്കെടുത്തു. പ്രവിശ്യയി​ലെ ജീവിത നിലവാരം മെച്ചപ്പെടുന്നതിനും റോഡ് സുരക്ഷാസംവിധാനങ്ങൾ മെച്ചപ്പെട്ടതിനുമുള്ള തെളിവാണ് ഈ കണക്കുകളെന്ന് അമീർ സഊദ് ബിൻ നാഇഫ്​ പറഞ്ഞു.

വാഹനമോടിക്കുന്നവർക്കുള്ള അവബോധം, കർശനമായി പാലിക്കപ്പെടുന്ന ഗതാഗത നിയന്ത്രണങ്ങൾ, മറ്റ് നൂതന സാ​ങ്കേതിക വിദ്യകളുടെ സഹായം എന്നിവ അപകടം കുറക്കുന്നതിൽ വലിയ പങ്കുവഹിക്കുന്നതായി അദ്ദേഹം പറഞ്ഞു. റോഡ് സുരക്ഷ വർദ്ധിപ്പിക്കുന്നതിൽ നിലവിൽ പുറത്തിറങ്ങുന്ന ആധുനിക സംവിധാനങ്ങളുള്ള വാഹനങ്ങൾ ഏറെ സഹായിക്കുന്നുണ്ടെങ്കിലും മനുഷ്യ​െൻറ പെരുമാറ്റം അതിനെയെല്ലാം മറികടക്കുകയാണ്. തുടർച്ചയായ വിദ്യാഭ്യാസവും ബോധവത്​കരണ കാമ്പയിനുകളും കൊണ്ട് മാത്രമേ ഇതിനെ തിരുത്തുവാൻ സാധിക്കുകയുള്ളുവെന്ന്​ അദ്ദേഹം കൂട്ടിച്ചേർത്തു.

2024 അവസാനത്തോടെ ഗതാഗത സുരക്ഷാ പാലനത്തിൽ കിഴക്കൻ പ്രവിശ്യ ദേശീയതലത്തിൽ ഒന്നാമതെത്തി. 17 ദേശീയ സുരക്ഷാ സൂചകങ്ങളിൽ 12 എണ്ണം കൃത്യമായി പാലിച്ചുകൊണ്ടാണ് ഈ നേട്ടം കൈവരിച്ചതെന്ന് സുരക്ഷാസമിതി സെക്രട്ടറി ജനറൽ അബ്​ദുല്ല അൽരാജ്ഹി പറഞ്ഞു.

ഗവർണറുടെ നേതൃത്വത്തിലുള്ള ഒരു സംയോജിത മാതൃകയുടെ ഭാഗമായി റോഡ് എൻജിനീയറിങ്​, എൻഫോഴ്‌സ്‌മെൻറ്​, പൊതുവിദ്യാഭ്യാസം, അടിയന്തര പ്രതികരണം എന്നിവ ഇതിന് കാരണമായതായി അദ്ദേഹം കൂട്ടിച്ചേർത്തു. മേഖലയുടെ റോഡ് ശൃംഖല 80 ശതമാനം സുരക്ഷാ റേറ്റിങ്​ നേടി. ജോലി മേഖലകളും വഴിതിരിച്ചുവിടലുകളും 95 ശതമാനം സുരക്ഷാ പാലനത്തിലെത്തി.

ലോകാരോഗ്യ സംഘടന ഉൾപ്പെടെയുള്ള പ്രാദേശിക, അന്തർദേശീയ സ്ഥാപനങ്ങൾ അംഗീകരിച്ച ഗതാഗത സുരക്ഷക്ക്​ കിഴക്കൻ പ്രവിശ്യയെ ഒരു മാതൃകയാക്കി ഈ മുന്നേറ്റങ്ങൾ മാറ്റിയതായി അൽരാജ്ഹി പറഞ്ഞു.