ശൈഖ്​ സായിദ്​ റോഡിൽ 700മീറ്റർ റോഡ്​ വിപുലീകരണം പൂർത്തിയായി

ദുബൈ: ശൈഖ്​ സായിദ്​ റോഡിൽ 700മീറ്റർ റോഡ്​ വിപുലീകരണം പൂർത്തിയാക്കി ദുബൈ റോഡ്​ ഗതാഗത അതോറിറ്റി (ആർ.ടി.എ) ഉമ്മുൽ ശരീഫ് സ്​ട്രീറ്റ്​​ എക്സിറ്റിന്​ സമീപത്താണ്​ പദ്ധതി നടപ്പാക്കിയത്​. പദ്ധതി പൂർത്തിയായതോടെ ഈ ഭാഗത്ത്​ റോഡിലെ ലൈനുകളുടെ എണ്ണം ആറിൽ നിന്ന്​ ഏഴായി.

ഇതോടെ മണിക്കൂറിൽ ഈ ഭാഗത്ത്​ 14,000 വാഹനങ്ങൾക്ക്​ കടന്നുപോകാനുള്ള സൗകര്യമുണ്ടാകും. നേരത്തെയുള്ളതിനേക്കാൾ 16 ശതമാനമാണ്​ ശേഷി വർധിച്ചിരിക്കുന്നത്​.

ദുബൈയിലുടനീളം ഗതാഗതം സുഗമമാക്കാനും കാര്യക്ഷമമാക്കാനുമുള്ള ആർ.ടി.എയുടെ ശ്രമങ്ങളുടെ ഭാഗമായാണ്​ പദ്ധതി നടപ്പിലാക്കിയത്​. ഗതാഗതക്കുരുക്ക്​ കുറക്കാനും എളുപ്പത്തിലും സുഖകരവുമായ യാത്ര ഉറപ്പാക്കാനും നവീകരണം സഹായിക്കും.

നഗരത്തിലെ ഏറ്റവും ​പ്രധാനപ്പെട്ടതും തിരക്കേറിയതുമായ ഹൈവേയാണ്​ ശൈഖ്​ സായിദ്​ റോഡ്​. നിരവധി താമസ മേഖലകൾ, സ്കൂളുകൾ, ദുബൈ ഇനറർനാഷണൽ ഫിനാൻഷ്യൽ സെന്‍റർ, ബുർജ്​ ഖലീഫ, ദുബൈ മാൾ അടക്കമുള്ള പ്രമുഖ വാണിജ്യ,സാമ്പത്തിക കേന്ദ്രങ്ങൾ എന്നിവ റോഡിന്​ സമീപത്തായി സ്ഥിതി ചെയ്യുന്നുണ്ട്​.

ആഗോള കമ്പനികൾ, ബാങ്കുകൾ, നിക്ഷേപ സ്ഥാപനങ്ങൾ, ഹോട്ടലുകൾ, വിനോദകേന്ദ്രങ്ങൾ എന്നിവയും റോഡിനോട്​ ചേർന്ന്​ പ്രവർത്തിക്കുന്നുണ്ട്​. ആർ.ടി.എ നടപ്പിലാക്കിയ പുതിയ നവീകരണം റോഡിലെ ഈ മേഖലയിലെ യാത്രാ സമയം കുറക്കുകയും സുരക്ഷ വർധിപ്പിക്കുകയും ചെയ്യുന്നതുമാണ്​.