അവർ കൃഷ്ണകുമാറിന് വിടയേകുന്നു, കണ്ണീരോടെ...

ദുബൈ: കൃഷ്​ണകുമാർ അവർക്ക്​ പഴയ സഹപാഠി മാത്രമല്ലായിരുന്നു. പ്രവാസത്തിലെ പരീക്ഷണ ദിനങ്ങളിൽ കൂടപ്പിറപ്പിനെപ്പോലെ അവർ കാവലിരുന്ന്​ ചേർത്തുപിടിച്ച കൂട്ടുകാര​​െൻറ വേർപാട്​ അതു കൊണ്ടു തന്നെ പന്തളം പോളിടെക്​നിക്​ കോളജിലെ പൂർവ്വവിദ്യാർത്ഥികൾക്ക്​ താങ്ങാവുന്നതിലും അപ്പുറമായിരുന്നു.

കഴിഞ്ഞ ഫെബ്രുവരി13നാണ്​ പത്തനംതിട്ട ചെന്നിക്കര  പുത്തൻപുരയിൽ കൃഷ്ണകുമാർ (55) വഴിയിൽ കുഴഞ്ഞുവീണത്​. വിവരം അറിഞ്ഞ  20ാം തീയതി മുതൽ പന്തളം പോളി പൂർവ വിദ്യാർഥി കൂട്ടായ്​മയായ പാം അലുംനി  വേണ്ടുന്ന എല്ലാ സഹായങ്ങളും ചെയ്യാനായി കൂടെയുണ്ടായിരുന്നു. നാട്ടിലേക്കു ചികിത്സക്ക് കൊണ്ട് പോകാനുള്ള ശ്രമങ്ങൾ നടത്തിയും ഭാര്യ ജയശ്രീ ടീച്ചർ, മകൾ മിഥില എന്നിവരെ യു.എ.ഇയിൽ എത്തിച്ചും അവർ പ്രിയ സഹോദര​നെ വീണ്ടെടുക്കുന്നതിനായി ​പൊരുതി.

നാട്ടിലെത്തിക്കുന്നതിനുള്ള ശ്രമങ്ങൾ ഒരു പരിധി വരെ വിജയം കണ്ട ഘട്ടത്തിലാണ്​ ഇന്ത്യയിൽ ​േലാക്​ഡൗൺ പ്രഖ്യാപിച്ചതും വിമാനവിലക്ക്​ നിലവിൽ വന്നതും. എയർ ആംബുലൻസ് മുഖേന  നാട്ടിൽ എത്തിക്കുവാനുള്ള  പ്രവർത്തനങ്ങൾ പുരോഗമിക്കവെ വേദനകളില്ലാത്ത ലോകത്തേക്ക്​ കൃഷ്​ണകുമാർ യാത്രയാവുകയായിരുന്നു.

സാമൂഹിക പ്രവർത്തകൻ അഷ്‌റഫ് താമരശ്ശേരിയുമായി ചേർന്ന്​ മൃതദേഹം നാട്ടിലെത്തിക്കുന്നതിന്​ നടപടി ക്രമങ്ങളും പന്തളം പോളി അലുംനി പൂർത്തിയാക്കി.  മൃതദേഹം ഷാർജ വിമാനത്താവളം വഴി   എയർ അറേബ്യ വിമാനത്തിൽ നാട്ടിലെത്തിക്കും.
 കൃഷ്ണകുമാറിന്​ യാത്രാമൊഴി നൽകുവാൻ  അക്കാഫ് വളൻറിയർ ഗ്രൂപ്പ്​ നേതാക്കളും സുഹൃത്തുക്കളും  സോനാപൂരിലെ എംബാമിങ്​ സ​െൻററിൽ എത്തിച്ചേർന്നിരുന്നു.