വിമാനമുടക്കം തുടർക്കഥ; ദുബൈ-കോഴിക്കോട്​ വിമാനം റദ്ദാക്കി

അബൂദബി/ദുബൈ: എയർഇന്ത്യ എക്സ്​പ്രസിൻറെ വിമാനം റദ്ദാക്കലും വൈകലും യാത്രക്കാരെ വലയ്​ക്കുന്നത്​ തുടരുന്നു. അബൂദബിയിൽനിന്ന്​ തിരുവനന്തപുരത്തേക്ക്​ പോകേണ്ട വിമാനം വെള്ളിയാഴ്ച വൈകിയതിന്​ പിന്നാലെ ശനിയാഴ്ച രാവിലെ ഒമ്പത് മണിക്ക്​ ദുബൈയിൽ നിന്ന്​ കോഴി​ക്കോടേക്ക്​ പോകേണ്ട ഐ.എക്സ്​ 346 വിമാനം റദ്ദാക്കി. വെള്ളിയാഴ്ച രാത്രി ബുക്കിങ്​ കൺഫർമേഷൻ ലഭിച്ചതിനെ തുടർന്ന്​ രാവിലെ വിമാനത്താവളത്തിലെത്തിയ യാത്രക്കാരിൽ പലരും റദ്ദാക്കിയ വിവരം അറിഞ്ഞത്​ കൗണ്ടറിൽവെച്ചാണ്​. എയർഇന്ത്യ എക്സ്​പ്രസ്​ അധികൃതരോട്​ വിവരം അന്വേഷിച്ചപ്പോൾ മെസേജ്​ അയച്ചിരു​ന്നുവെന്ന മറുപടിയാണ്​ ലഭിച്ചതെന്ന്​ വിമാനത്താവളത്തിൽ എത്തിയ ശേഷം മടങ്ങേണ്ടിവന്ന തിരൂർ സ്വദേശിയായ യാത്രക്കാരൻ ‘ഗൾഫ്​ മാധ്യമ’ത്തോട്​ പറഞ്ഞു.

മാതാവിൻറെ മരണത്തെ തുടർന്ന്​ നാട്ടിലേക്ക്​ പോകാനെത്തിയ യാത്രക്കാരനും പിതാവിൻറെ അസുഖത്തെ തുടർന്ന്​ പോകാൻ ടിക്കറ്റെടുത്തയാളും ഈ വിമാനം റദ്ദാക്കിയതോടെ ദുരിതത്തിലായി. ഇവർ പിന്നീട്​ മറ്റു വിമാനങ്ങളിൽ വൈകി യാത്ര ചെയ്യേണ്ടിവന്നുവെന്നും സഹ യാത്രക്കാർ പറഞ്ഞു. ബുക്കിങ്​ കൺഫർമേഷൻ മെയിൽ വഴി അറിയിച്ച അധികൃതർ റദ്ദാക്കിയ വിവരം മെയിലിൽ അറിയിച്ചില്ലെന്ന്​ യാത്രക്കാർ പരാതിപ്പെട്ടു.

അതിനിടെ വെള്ളിയാഴ്ച വൈകുന്നേരം അബൂദബിയിൽ നിന്ന്​ തിരുവനന്തപുരത്തേക്ക്​ പുറപ്പെടേണ്ട എയർഇന്ത്യ എക്സ്​പ്രസിൻറെ ഐ.എക്സ്​ 524 നമ്പർ​ വിമാനം പറന്നത്​ എട്ട് മണിക്കൂറിന്​ ശേഷം പുലർച്ചെ 1.10ന്​. ഈ വിമാനത്തിൽ വൈകുന്നേരം 6.45ഓടെ യാത്രക്കാരെ പ്രവേശിപ്പിച്ചിരുന്നു. എന്നാൽ ടേക്ക് ഓഫിന് തയാറെടുക്കുമ്പോൾ വിമാനത്തിന് സാങ്കേതിക തകരാറുണ്ടെന്ന് കാപ്റ്റൻ അറിയിക്കുകയായിരുന്നു.

റൺവേക്ക് അടുത്ത് നിർത്തിയിട്ട വിമാനത്തിൽ കടുത്തചൂടിൽ എ.സിയില്ലാതെ മണിക്കൂറുകൾ ഇരിക്കേണ്ടി വന്നതോടെ യാത്രക്കാർ പ്രയാസത്തിലായി. ഇവരെ മൂന്നര മണിക്കൂറിന്​ ശേഷം രാത്രി 10.15ഓടെയാണ്​ വിമാനത്തിൽ നിന്ന്​ ഇറക്കി ഭക്ഷണമടക്കം നൽകിയത്​. എ.സിയില്ലാത്തതിനാൽ വിമാനത്തിൽ കുടുങ്ങിയ സ്ത്രീകളും കുട്ടികളും ഏറെ പ്രയാസത്തിലായെന്ന്​ യാത്രക്കാർ പരാതിപ്പെട്ടിരുന്നു. പിന്നീട്​ 1.10നാണ് മറ്റൊരു​ വിമാനത്തിൽ യാത്രക്കാരെ അബൂദബിയിൽ നിന്ന്​ തിരുവനന്തപുരത്തേക്ക്​ ​ എത്തിച്ചത്​. രാവിലെ ഏഴു മണിയോടെ വിമാനം തിരുവനന്തപുരത്ത്​ എത്തിയെന്ന്​ യാത്രക്കാർ ‘ഗൾഫ്​ മാധ്യമ’ത്തെ അറിയിച്ചു.

ദിവസങ്ങൾക്ക്​ മുമ്പ്​ ദുബൈയിൽ നിന്ന്​ കോഴിക്കോടേക്ക്​ പുറപ്പെടേണ്ട വിമാനവും സമാനമായ രീതിയിൽ വൈകിയിരുന്നു. മണിക്കൂറുകൾ വിയർത്തൊലിച്ച് യാത്രക്കാർ വിമാനത്തിനകത്ത് തുടരേണ്ട അവസ്ഥയുമുണ്ടായി. രാവിലെ ഒമ്പതിന് പുറപ്പെടേണ്ട എയർ ഇന്ത്യ എക്സ്പ്രസ് വിമാനം പിന്നീട്​ പിറ്റേന്ന്​ രാവിലെയാണ്​ പുറപ്പെട്ടത്​. പ്രവാസികൾക്ക്​ ചുരുങ്ങിയ ചിലവിൽ യാത്രാ സൗകര്യം ഒരുക്കുമ്പോഴും റദ്ദാക്കലും വൈകലും എയർഇന്ത്യ എക്സ്​പ്രസിൻറെ ഖ്യാതിക്ക്​ മങ്ങലേൽപിക്കുകയാണെന്ന്​ യാത്രക്കാർ പറയുന്നു. അധികൃതർ അടിയന്തിര നടപടികൾ സ്വീകരിച്ച്​ കാര്യക്ഷമമായ സേവനം ഉറപ്പുവരുത്തണമെന്ന് ഇവർ ആവശ്യപ്പെടുന്നു.