ഷാർജ എക്സലൻസ്​ അവാർഡ്​ വേദിയിൽ ‘ഗൾഫ്​ മാധ്യമ’ത്തിന്​ ആദരം

ഷാർജ: ഷാർജ കിരീടാവകാശിയും ഉപഭരണാധികാരിയുമായ ശൈഖ്​ സുൽത്താൻ ബിൻ മുഹമ്മദ്​ ബിൻ സുൽത്താൻ അൽ ഖാസിമിയുടെ നേതൃത്വത്തിൽ സംഘടിപ്പിക്കപ്പെടുന്ന ഷാർജ എക്സലൻസ്​ അവാർഡ്​ 2024 വേദിയിൽ ‘ഗൾഫ്​ മാധ്യമ’ത്തിന്​ ആദരം. ഷർജ എക്സ്​പോ സെന്‍റററിൽ നടന്ന ചടങ്ങിൽ ഷാർജ ഉപഭരണാധികാരി ശൈഖ്​ അബ്​ദുല്ല ബിൻ സാലിം അൽ ഖാസിമിയിൽ നിന്ന്​ ‘ഗൾഫ്​ മാധ്യമ’ത്തിനുവേണ്ടി സെയിൽസ്​ ആൻഡ്​ ബിസിനസ്​ സൊലൂഷൻസ്​ സീനിയർ മാനേജർ എസ്​.കെ അബ്​ദുല്ല ഉപഹാരം ഏറ്റുവാങ്ങി. ഷാർജ ചേംബർ ഓഫ്​ കൊമേഴ്​സ്​ ആൻഡ്​ ഇൻഡസ്​ട്രിയാണ്​ ചടങ്ങ്​ ഒരുക്കിയത്​. പരിപാടിയിൽ ആദരിക്കപ്പെട്ട ഏക അന്തരാഷ്ട്ര മാധ്യമ സ്ഥാപനമാണ്​ ‘ഗൾഫ്​ മാധ്യമം’.

ചടങ്ങിൽ വിവിധ വിഭാഗങ്ങളിലായി ഷാർജ എക്സലൻസ്​ അവാർഡ്​ നേടിയവരെയും ആദരിച്ചു. പ്രാദേശിക ബിസിനസുകൾ, ഗൾഫ് മേഖലയിലെ സംഘടനകൾ, സമ്പദ്‌വ്യവസ്ഥക്ക്​ വലിയ സംഭാവനകൾ നൽകിയ വ്യക്തികൾ എന്നിവർക്കാണ്​ അവാർഡ്​ ലഭിച്ചത്​. ഈ വർഷം 17 ബിസിനസുകളും സംരംഭകരും മികച്ച നേട്ടം കൈവരിച്ചതിനുള്ള അവാർഡ്​ നേടി. ഷാർജ ഗൾഫ് എക്സലൻസ് അവാർഡ്​ വിഭാഗത്തിൽ സൗദി ഇലക്ട്രിസിറ്റി കമ്പനി, അജിലിറ്റി ഗ്ലോബൽ, ഖത്തർ ഇസ്​ലാമിക് ബാങ്ക് തുടങ്ങിയ പ്രമുഖ കമ്പനികൾ വിജയികളായി.

ആദ്യ അന്താരാഷ്ട്ര ഇന്ത്യൻ ദിനപത്രമായ ‘ഗൾഫ്​ മാധ്യമം’ ഷാർജ ചേംബർ ഓഫ്​ കൊമേഴ്​സിന്‍റെ വിവിധ സംരംഭങ്ങളിൽ മാധ്യമ പങ്കാളിയെന്ന നിലയിൽ പ്രവർത്തിച്ചുവരുന്നുണ്ട്​. യു.എ.ഇ സുപ്രീംകൗൺസിൽ അംഗവും ഷാർജ ഭരണാധികാരിയുമായ ശൈഖ്​ സുൽത്താൻ ബിൻ മുഹമ്മദ് അൽ ഖാസിമിയുടെ മുഖ്യരക്ഷാധികാരത്തിൽ സംഘടിപ്പിക്കുന്ന മിഡിലീസ്റ്റിലെ ഏറ്റവും വലിയ ഇന്ത്യൻ അന്താരാഷ്ട്ര മേളയായ ‘കമോൺ കേരള’യും ഷാർജ ചേംബർ ഓഫ്​ കൊമേഴ്​സ്​ ആൻഡ്​ ഇൻഡസ്​ട്രിയുമായി സഹകരിച്ചാണ്​ സംഘടിപ്പിക്കുന്നത്​. അവാർഡ്​ദാന ചടങ്ങിൽ ഷാർജ ചേംബർ ചെയർമാൻ അബ്​ദുല്ല സുൽത്താൻ അൽ ഉവൈസ്​ അടക്കം ​പ്രമുഖർ സന്നിഹിതരായിരുന്നു.