യു.എ.ഇയിൽ ചൂട്​ കനക്കും; മഴയും പ്രതീക്ഷിക്കാം

ദുബൈ: രാജ്യത്തെ മിക്ക സ്ഥലങ്ങളിലും തിങ്കളഴാ്​ച കനത്ത ചൂടും ഈർപ്പവും പ്രതീക്ഷിക്കാമെന്ന്​ കാലാവസ്ഥ പ്രവചനം. തീരദേശ മേഖലകളിൽ 43ഡിഗ്രിയും അൽഐനിലെയും തെക്കൻ അബൂദബിയിലെയും ഉൾപ്രദേശങ്ങളിൽ 49ഡിഗ്രി വരെയും ചൂടാണ്​​ പ്രതീക്ഷിക്കപ്പെടുന്നത്​. അതേസമയം കഴിഞ്ഞ ദിവസങ്ങളിലേതിന്​ സമാനമായി ചില പ്രദേശങ്ങളിൽ ശക്​തമായ മഴയും പ്രവചിക്കപ്പെടുന്നുണ്ട്​. അൽഐൻ, അൽ ദഫ്​റ തുടങ്ങിയ പ്രദേശങ്ങളിലാണ്​ കഴിഞ്ഞ ദിവസങ്ങളിൽ ശക്​തമായ മഴ ലഭിച്ചത്​. തിങ്കളാഴ്ചയും ചൊവ്വാഴ്ചയും അൽഐനിൽ മഴ പ്രവചിക്കുന്നുണ്ട്​. ഞായറാഴ്ച ഷാർജയുടെ മധ്യ മേഖലയിലും മറ്റു ചില സ്ഥലങ്ങളിലും മഴ രേഖപ്പെടുത്തിയിരുന്നു.

ഡ്രൈവർമാർ മഴ സമയങ്ങളിൽ മാറിവരുന്ന വേഗപരിധി ശ്രദ്ധിക്കണമെന്നും വാദികളിൽ ഇറങ്ങരുതെന്നും ഫസ്റ്റ്​ എയ്​ഡ്​ കിറ്റുകൾ കരുതണമെന്നും അബൂദബി മീഡിയ ഓഫീസ്​ കഴിഞ്ഞ ദിവസം ആവശ്യപ്പെട്ടിരുന്നു. ഈ വർഷം വേനൽ മഴ ലഭിക്കുന്നുണ്ടെങ്കിലും കഴിഞ്ഞ വർഷത്തെ അപേക്ഷിച്ച്​ മൂന്നിലൊന്ന്​ മാത്രമാണ്​ ലഭിച്ചതെന്നാണ്​ വിലയിരുത്തപ്പെടുന്നനത്​. കഴിഞ്ഞ വർഷം വർഷങ്ങൾക്ക്​ ശേഷം ഏറ്റവും കൂടുതൽ മഴ ലഭിച്ച വർഷമാണ്​ രാജ്യത്ത്​ കടന്നുപോയത്​.

ആഗസ്റ്റ്​ 10 വരെയുള്ള രണ്ടാഴ്ച രാജ്യത്ത്​ ഏറ്റവും കഠിനമായ ചൂട്​ അനുഭവപ്പെടുമെന്ന്​ കാലാവസ്ഥ നിരീക്ഷണ കേന്ദ്രം മുന്നറിയിപ്പു നൽകിയിട്ടുണ്ട്​. ഈ വർഷം കനത്ത ചൂടിന്‍റെ അവസാന ഘട്ടമാണിത്​. ആഗസ്റ്റ്​ 10ന്​ ശേഷം ചൂടിന്‍റെ കാഠിന്യം പതിയെ കുറഞ്ഞ്​ വരുമെന്നാണ്​ പ്രതീക്ഷിക്കുന്നതെങ്കിലും സെപ്​റ്റംബർ അവസാനം വരെയെങ്കിലും കനത്ത ചൂട്​ തന്നെയായിരിക്കും.