കത്തികാട്ടി കവർച്ച: ആഫ്രിക്കൻ സംഘത്തിന്​ തടവ്​ ശിക്ഷ

ദുബൈ: കമ്പനി ഓഫിസിൽ അതിക്രമിച്ചു കയറി ജീവനക്കാരെ കത്തികാട്ടി ഭീഷണിപ്പെടുത്തി വൻ തുക കവർന്ന ആഫ്രിക്കൻ സംഘത്തിന്​ മുന്നു വർഷം തടവും 20 ലക്ഷം ദിർഹം പിഴയും​ വിധിച്ച്​ ദുബൈ ക്രിമിനൽ കോടതി. 12 ആഫ്രിക്കൻ പൗരൻമാർക്കാണ്​ ശിക്ഷ ലഭിച്ചത്​. ശിക്ഷാ കാലാവധിക്ക്​ ശേഷം പ്രതികളെ നാടുകടത്താനും കോടതി ഉത്തരവിട്ടു. കഴിഞ്ഞ ഡിസംബറിൽ ദുബൈ ആസ്ഥാനമായ കമ്പനിയിലാണ്​​ കവർച്ച നടന്നത്​. കമ്പനി ഉടമസ്ഥനായ അറബ്​ വംശജനും മകനും ഓഫിസിലുണ്ടായിരുന്നു. ഈ സമയം മാസ്ക്​ ധരിച്ച്​ ആയുധങ്ങളുമായി എത്തിയ മോഷ്ടാക്കൾ പണം നൽകിയില്ലെങ്കിൽ ഉടമയുടെ മകനെ കൊല്ലുമെന്ന്​ ഭീഷണപ്പെടുത്തി. ഇതോടെ ഉടമസ്ഥൻ മകനെ പിടിച്ചു മാറ്റിയതിനൽ കുട്ടി ബാത്ത്​റൂമിന്​ സമീപം ഒളിച്ചു. പക്ഷെ, പ്രതികൾ കുട്ടിയെ കണ്ടെത്തുകയും ആക്രമിക്കുകയുമായിരുന്നു.

തുടർന്ന്​ കമ്പനി സേഫ്​ ലോക്കറിൻറെ താക്കോൽ കൈക്കലാക്കിയ പ്രതികൾ പണവും വിലപിടിപ്പുള്ള വസ്തുക്കളും കവർച്ച നടത്തി സ്ഥലംവിട്ടു. ഉടമയുടെ പരാതിയിൽ സംഭവസ്ഥലത്ത്​ എത്തിയ പൊലീസ് സി.ഐ.ഡി സംഘം ഓഫിസിലെ​ സി.സി ടിവി പരിശോധിച്ച്​ പ്രതികളെയും ഇവർ ഉപയോഗിച്ച വാഹനങ്ങളും തിരിച്ചറിഞ്ഞു. പിന്നാലെ ഒരു പ്രതി പിടിയിലായി. ഇയാളിൽ നിന്ന്​ ആയുധങ്ങളും 5,000 ദിർഹമും 1000 ഡോളറും പിടിച്ചെടുത്തു. ഇയാളെ ചോദ്യം ചെയ്തതിൽ നിന്നാണ്​ മറ്റ്​ പ്രതികളെ കുറിച്ച്​ വിവരങ്ങൾ ലഭിച്ചത്​. വൈകാതെ മുഴുവൻ പ്രതികളേയും പിടികൂടാൻ പൊലീസിന്​ സാധിച്ചു. 12 പ്രതികളും കുറ്റം സമ്മതിച്ചതായും പൊലീസ്​ കോടതിയെ അറിയിച്ചിരുന്നു. എന്നാൽ, ആരേയും കൊല്ലാൻ ഉദ്ദേശിച്ചിരുന്നില്ലെന്ന്​ പ്രതികൾ വ്യക്​തമാക്കി. എല്ലാ പ്രതികൾക്കുമെതിരെ പ്രോസിക്യൂഷൻ സമർപ്പിച്ച തെളിവുകൾ പര്യാപ്തമാണെന്ന്​ കണ്ടെത്തിയ കോടതി മുഴുവൻ പ്രതികൾക്കും ശിക്ഷ വിധിക്കുകയായിരുന്നു.