യമനിൽ ബന്ദിയാക്കപ്പെട്ട മലയാളി വ്യവസായിക്ക്​ മോചനം

ദുബൈ: അഞ്ചുമാസമായി യമനിൽ ബന്ദിയാക്കപ്പെട്ട മലയാളി വ്യവസായിക്ക്​ മോചനം. ബിസിനസ്​ ചർച്ചകൾക്കായി യമനിലേക്ക്​ പോയ തിരുവനന്തപുരം സ്വദേശി സുരേഷ്​കുമാർ കൃഷ്​ണപിള്ള (59) ജൂലൈ മുതൽ കലാപമേഖലയായ സനാഇലെ ഹൂത്തി വിമതരുടെ തടവറയിൽ കുടുങ്ങിക്കിടക്കുകയായിരുന്നു​.

ബൽഗാമിൽ ആരംഭിക്കുന്ന ത​​െൻറ സ്വപ്​ന പദ്ധതിക്ക്​ നാട്ടിലെ ബാങ്കുകൾ ലോൺ നിഷേധിച്ചതിനെ തുടർന്ന്​ നിക്ഷേപകരെ കണ്ടെത്താനായി ഏദനിലേക്ക്​ പോയ സുരേഷ്​ ചർച്ച വിജയകരമായിരുന്നുവെന്ന്​ സുഹൃത്തുക്കളെ വിളിച്ചറിയിച്ചിരുന്നു. തൊട്ടു പിന്നാലെയാണ്​ ബന്ധം വിച്ഛേദിക്കപ്പെട്ടത്​.

തുടർന്ന്​ മകൻ ജിതിനും പിള്ളയുടെ ബിസിനസ്​ പങ്കാളി ശിവദാസൻ വളപ്പിലും കേന്ദ്രവിദേശകാര്യ മന്ത്രാലയത്തി​​െൻറ സഹായം തേടി. യമൻ അംബാസഡർ അശോക്​ കുമാർ, സെക്കൻറ്​ സെക്രട്ടറി അനിൽ കുമാർ, എംബസി ഇൻചാർജ്​ ബദർ അലി എന്നിവർ ചേർന്ന്​ നടത്തിയ നിരന്തര ശ്രമങ്ങൾക്കൊടുവിലാണ്​ മോചനം സാധ്യമായത്​.
ഏദനിൽ നിന്ന്​ മുംബൈയിലേക്ക്​ പുറപ്പെട്ട സുരേഷ്​കുമാർ ഇന്ന്​ കുടുംബത്തോടൊപ്പം ചേരും.