പ്രളയം: പാകിസ്താന്​ 28 ലക്ഷം രൂപ സഹായം പ്രഖ്യാപിച്ച്​ ഇന്ത്യൻ വ്യവസായി

ദുബൈ: പ്രളയ ദുരിതമനുഭവിക്കുന്ന പാകിസ്താന്​ 30,000 പൗണ്ട്​ (28 ലക്ഷം ഇന്ത്യൻ രൂപ) സഹായം പ്രഖ്യാപിച്ച്​ ദുബൈ കേന്ദ്രീകരിച്ച്​ പ്രവർത്തിക്കുന്ന ഇന്ത്യൻ വ്യവസായിയും മനുഷ്യാവകാശ പ്രവർത്തകനുമായ ഡോ. സുരീന്ദർ പാൽ സിങ്​ ഒബ്​റോയ്​ (എസ്​.പി.എസ്​ ഒബ്​റോയ്​). പ്രളയബാധിതർക്ക് സഹായം നൽകണമെന്ന് പാകിസ്ഥാൻ പഞ്ചാബ് ഗവർണർ ചൗധരി മുഹമ്മദ് സർവാറിന്‍റെ അഭ്യർഥന മാനിച്ചാണ്​ സഹായം നൽകിയത്​.

വീട്​ നഷ്ടപ്പെട്ട കുടുംബങ്ങൾക്കായി ലക്ഷം റേഷൻ പാക്കുകൾ വാങ്ങുന്നതിനാണ്​ ലക്ഷ്യമിടുന്നതെന്നായിരുന്നു സർവാറി​ന്‍റെ അറിയിപ്പ്​. 1001 കുടുംബങ്ങൾക്ക്​ ഒരുമാസത്തെ കിറ്റ്​ നൽകുന്നതിനായാണ്​ ഒബ്​റോയ്​ 30,000 പൗണ്ട്​ നൽകിയത്​. ഈ സഹായം ഏറെ ​ഉപകാരപ്രദമാകുമെന്ന്​ സർവാർ പറഞ്ഞു.

നേരത്തെ, പഞ്ചാബ്​ തെരഞ്ഞെടുപ്പിൽ ആം ആദ്​മി പാർട്ടി മുഖ്യമന്ത്രി സ്ഥാനാർഥിയായി ഉയർത്തിക്കാണിക്കാൻ ശ്രമിച്ചത്​ എസ്​.പി.എസിനെയായിരുന്നു. എന്നാൽ, പഞ്ചാബ്​ സ്വദേശിയായ അദ്ദേഹം ഇതിൽ നിന്ന്​ പിൻമാറുകയായിരുന്നു. യു.എ.ഇയിൽ തടവിൽ കഴിയുന്ന ഇന്ത്യക്കാരെ മോചിപ്പിക്കാനും അദ്ദേഹത്തിന്‍റെ ഇടപെടലുണ്ടായിരുന്നു.