ഖുർആൻ പാർക്ക്​ സന്ദർശിക്കാം, സൗജന്യമായി

ദുബൈ: ഖവാനീജ്​ മേഖലയിൽ ദുബൈ നഗരസഭ നിർമിക്കുന്ന ഖുർആൻ പാർക്കിലേക്ക്​ സന്ദർശകർക്ക്​ പ്രവേശനം സൗജന്യമായിരിക്കുമെന്ന് ഡയറക്​ടർ ജനറൽ ദാവൂദ്​ അബ്​ദുറഹ്​മാൻ അൽ ഹാജിറി വ്യക്​തമാക്കി. നവീനമായ ഡിസൈനുകളും അന്താരാഷ്​ട്ര അംഗീകൃത നിലവാരത്തിലും ഒരുക്കുന്ന പാർക്കി​​​​​െൻറ സൗന്ദര്യവും സൗകര്യങ്ങളും എല്ലാ വിഭാഗം ആളുകൾക്കും അനുഭവിക്കാനും ആസ്വദിക്കാനും സൗകര്യമൊരുക്കുന്നതിനാണ്​ പ്രവേശനം സൗജന്യമാക്കിയത്​. മതിൽക്കെട്ടുകളില്ലാതെ ഏവർക്കും ആസ്വദിക്കാവുന്ന പാർക്കിൽ അതിശയങ്ങളുടെ ഗുഹ (Cave of Miracles) ഗ്ലാസ്​ ഹൗസ്​ എന്നിവ സന്ദർശിക്കുന്നതിനു മാത്രം പത്ത്​ ദിർഹം വീതം ടിക്കറ്റ്​ ഇൗടാക്കുകയുള്ളൂ. 

ഏവർക്കും സന്തോഷം സാധ്യമാക്കുക എന്ന യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമി​​​​​െൻറ നിർദേശത്തി​ലധിഷ്​ഠിതമായാണ്​ ഇൗ സൗകര്യങ്ങളെന്ന്​  അൽ ഹാജിറി പറഞ്ഞു. ഖുർആനിൽ പരാമർശിക്കപ്പെടുന്ന ഒൗഷധ സസ്യങ്ങൾ, ശാസ്​ത്രീയ സത്യങ്ങൾ എന്നിവയുടെ വിശദീകരണം, പ്രാധാന്യപൂർവമായ പരിസ്​ഥിതി സംരക്ഷണം എന്നിവ ഉയർത്തിപ്പിടിക്കുന്ന പാർക്ക്​ സ്വദേശികൾക്കും താമസക്കാർക്കും വിദേശികൾക്കും സഞ്ചാരികൾക്കും ഒരുപോലെ പ്രിയപ്പെട്ടതാവും.

ഇസ്​ലാമി​​​​​െൻറ സാംസ്​കാരിക^ശാസ്​ത്ര നേട്ടങ്ങൾ സംബന്ധിച്ച്​ ലോകത്തെ ബോധവത്​കരിക്കാനും സ്​നേഹം, സമാധാനം എന്നീ അടിസ്​ഥാന ഇസ്​ലാമിക ആദർശങ്ങൾ ഉദ്​ഘോഷിക്കാനുമുള്ള ഉത്തമമായ ഇടമായി ഖുർആൻ പാർക്ക്​ മാറും. ഖവാനീജ്​ മേഖലയിൽ 60 ഹെക്​ടർ സ്​ഥലത്തായി വ്യാപിച്ചു കിടക്കുന്ന പദ്ധതിയിൽ 12 ഗാർഡനുകൾക്ക്​ പുറമെ, ​ഇസ്​ലാമിക സൗന്ദര്യ രചനാരീതിയിൽ ആവിഷ്​കരിച്ച സൗരോർജ മരങ്ങൾ, ഖുർആനിൽ വിവരിക്കുന്ന അത്​ഭുതങ്ങൾ പരിചയപ്പെടുത്തുന്ന ഗുഹ, ചെടികളുടെ ഒൗഷധ ഗുണം പരിചയപ്പെടുത്തുന്ന കിയോസ്​കുകൾ എന്നിവയും ഉൾപ്പെടുന്നു.