മാരുതി ഇ-വിറ്റാര ഓൾ-വീൽ ഡ്രൈവ് ഉടനില്ല; പകരം ഇന്ത്യയിൽ അവതരിപ്പിക്കുന്നത് ഫ്രണ്ട്-വീൽ ഡ്രൈവ്

ന്യൂഡൽഹി: മാരുതി സുസുക്കി മോട്ടോഴ്സിൽ നിന്നും ഉടൻ പുറത്തിറങ്ങാൻ പോകുന്ന ഇലക്ട്രിക് എസ്.യു.വിയാണ് ഇ-വിറ്റാര. ഇ.വിയുടെ വിപണി പ്രവേശനം ഏറെ ആകാഷയോടെയാണ് വാഹനപ്രേമികൾ നോക്കി കാണുന്നത്. ഓൾ-വീൽ ഡ്രൈവിൽ ഇന്ത്യൻ വിപണിയിലെത്തുമെന്ന് പറഞ്ഞ വാഹനത്തിന്റെ ഫ്രണ്ട്-വീൽ വകഭേദമാകും രാജ്യത്ത് ആദ്യം പുറത്തിറക്കുന്നത്. ടൊയോട്ട (ബ്ലൂ), ഐസിൻ, ഡെൻസോ എന്നീ കമ്പനികൾ സംയുക്തമായി വികസിപ്പിച്ചെടുത്ത 'ബ്ലൂ നെക്സസ്' ഇ-ആക്‌സിലിന്റെ മോട്ടോർ, ഇൻവെർട്ടർ, ട്രാൻസ്ആക്സിൽ എന്നിവയെ ഈ ഫ്രണ്ട്-വീൽ കോംപാക്ട് പാക്കേജിൽ ഉൾപ്പെടുത്തിയിട്ടുണ്ട്. ടെസ്‌ല, ബി.എം.ഡബ്ല്യു, ഹ്യുണ്ടായ് തുടങ്ങിയ വാഹന കമ്പനികളും ഇതേ മോഡൽ ഇ-ആക്സിൽ മാതൃകയിൽ വാഹനങ്ങൾ നിർമ്മിക്കുന്നുണ്ട്.

നിലവിൽ ഇന്ത്യയിൽ നിർമ്മിക്കുന്ന ഫ്രണ്ട്-വീൽ ഡ്രൈവ് മോട്ടോറിന്റെ പവർ ഔട്പുട്ട് 106kW (144 എച്ച്.പി) നും 128kW (174 എച്ച്.പി) നും ഇടയിലായിരിക്കും. ബോണറ്റിൽ ഒതുങ്ങാൻ സഹായിക്കുന്ന തരത്തിലുള്ള ഇ-ആക്‌സിലിന് നീളം കുറവാണ്. അതിനാൽ പിൻവശത്ത് ലഗേജ് സൂക്ഷിക്കാൻ കൂടുതൽ സ്ഥലം ലഭിക്കും. ഓൾ-വീൽ ഡ്രൈവിലേക്ക് മാറുമ്പോൾ പിൻവശത്തെ ഇ-ആക്‌സിലിന്റെ പരമാവധി പവർ 80kW (108 എച്ച്.പി) ആയിരിക്കും. ഈ മോഡൽ ഇന്ത്യയിൽ അവതരിപ്പിക്കാൻ സാധ്യതയില്ല. മാരുതിയും ടോയോട്ടയും ഒരുമിച്ച് പ്രവർത്തിക്കുന്നതിനാൽ ടൊയോട്ടയുടെ എസ്.യു.വിയിലാകും ഓൾ-വീൽ ഡ്രൈവ് മോഡൽ ആദ്യം ലഭിക്കുക എന്നാണ് അഭ്യൂഹം.

ആഗോളതലത്തിൽ തന്നെ ഏറെ ജനശ്രദ്ധ നേടിയ ഇലക്ട്രിക് വാഹനമാണ് ഇ-വിറ്റാര. ഭാരത് മൊബിലിറ്റി ഷോയുടെ ഭാഗമായി നടന്ന ഓട്ടോ എക്‌സ്‌പോയിൽ മോഡലിന്റെ അനാച്ഛാദന ചടങ്ങ് നടന്നത്. ഇ-വിറ്റാര 49kWh, 61kWh എന്നിങ്ങനെ രണ്ട് ബാറ്ററി ഓപ്ഷനുകൾ അവതരിപ്പിക്കുന്നു. ഒറ്റ ചാർജിൽ ഏകദേശം 500 കിലോമീറ്റർ ഡ്രൈവിങ് റേഞ്ചാണ് കമ്പനി വാഗ്ദാനം ​ചെയ്യുന്നത്.

ലെവൽ 2 ADAS (അഡ്വാൻസ്ഡ് ഡ്രൈവർ അസ്സിസ്റ്റൻസ് സിസ്റ്റം), പനോരാമിക് സൺറൂഫ്, വ്യത്യസ്‍ത ഡ്രൈവിങ് മോഡുകൾ, ഹിൽ ആൻഡ് ഹോൾഡ് കണ്ട്രോൾ, വെന്റിലേറ്റഡ് സീറ്റുകൾ തുടങ്ങിയ ഫീച്ചറുകളെല്ലാം ഇ-വിറ്റാരയിൽ നിന്നും പ്രതീക്ഷിക്കുന്നുണ്ട്. സ്റ്റാൻഡേർഡ് ആയി മാരുതിയുടെ എല്ലാ വാഹനങ്ങളിലും ആറ് എയർബാഗുകൾ നൽകുന്നതിനാലും എൻ.സി.എ.പി ക്രാഷ്ടെസ്റ്റുകളിൽ മികച്ച പ്രകടനം നടത്തുന്നതിനാലും സുരക്ഷയിൽ പേടിക്കേണ്ടതില്ല.