കഠ്​വ പെൺകുട്ടിയുടെ പേരും ചിത്രവും പ്രസിദ്ധീകരിച്ച മാധ്യമങ്ങൾക്ക്​ 10 ലക്ഷം പിഴ

ന്യൂഡൽഹി: ജമ്മുവിലെ കഠ്​വയിൽ കൂട്ട ബലാത്സംഗത്തിന് ഇരയായി  ക്രൂരമായി  കൊല്ലപ്പെട്ട എട്ടുവയസ്സുകാരി പെൺകുട്ടിയെ തിരിച്ചറിയുന്ന രീതിയിൽ പേരും ചിത്രവും പ്രസിദ്ധീകരിച്ച മാധ്യമങ്ങൾക്ക്​ ഡൽഹി ഹൈകോടതി10 ലക്ഷം രൂപ വീതം പിഴയിട്ടു. ഡൽഹി​ ഹൈകോടതി ആക്​ടിങ്​ ചീഫ്​ ജസ്​റ്റിസ്​ ഗീത പി. മീത്തൽ, ജസ്​റ്റിസ്​ സി. ഹരി ശങ്കർ എന്നിവരടങ്ങുന്ന ബെഞ്ചാണ്​ 12 മാധ്യമ സ്​ഥാപനങ്ങൾക്ക്​  പിഴ ശിക്ഷ വിധിച്ചത്. പണം ജമ്മു^കശ്​മീരിലെ ബലാത്സംഗത്തിന്​ ഇരകളായവരെ പുനരധിവസിപ്പിക്കുന്നതിനുള്ള  ഫണ്ടിലേക്ക്​ നൽകണമെന്നും കോടതി വ്യക്​തമാക്കി. 

പീഡനക്കേസിലെ ഇരയെ തിരിച്ചറിയുന്ന രീതിയിൽ പേരോ ചിത്രമോ നൽകുന്നത് ആറു മാസം വരെ തടവു ശിക്ഷ ലഭിക്കാവുന്ന കുറ്റമാണെന്നും മാധ്യമങ്ങളെ കോടതി ഓർമിപ്പിച്ചു. മാധ്യമങ്ങളിൽ ഇരയുടെ  പേരും ചിത്രവും  കണ്ട കോടതി സ്വമേധയ കേസ്​ എടുക്കുകയായിരുന്നു. നേരത്തേ, ഇരയെ തിരിച്ചറിയുന്ന രീതിയിൽ വാർത്ത നൽകിയ മാധ്യമസ്ഥാപനങ്ങൾക്ക്  കോടതി നോട്ടീസ് അയച്ചിരുന്നു. ​ഇതേത്തുടർന്ന്​, മാധ്യമങ്ങൾ മാപ്പപേക്ഷിച്ചെങ്കിലും കോടതി അംഗീകരിച്ചില്ല.

ടൈംസ്​ ഒാഫ്​ ഇന്ത്യ, ദ ഹിന്ദു, സ്​റ്റേറ്റ്​സ്​മാൻ, ദ പയനിയർ, നവഭാരത്​ ടൈംസ്​, എൻ.ഡി.ടി.വി,  ഫസ്​റ്റ്​പോസ്​റ്റ്​്​, ദ വീക്ക്​, റിപ്പബ്ലിക്​ ടി.വി, ഡെക്കാൻ ക്രോണിക്കിൾ, ഇന്ത്യ ടി.വി, ഇന്ത്യൻ എക്​സ്​പ്രസ്​ എന്നീ മാധ്യമ സ്​ഥാപനങ്ങൾക്കാണ്​ പിഴ. കേസി​​​െൻറ തുടർനടപടികൾക്കായി വാദം കേൾക്കൽ ഏപ്രിൽ 25​േലക്ക്​ മാറ്റി.