റോഡില്‍ മദ്യപിച്ച ഡോക്ടറുടെ പരാക്രമം; ബൈക്ക്​ യാത്രികൻ മരിച്ചു

ബംഗളുരു: മദ്യ ലഹരിയില്‍ ഡോക്ടര്‍ ഓടിച്ച വാഹനമിടിച്ച് ബൈക്ക് യാത്രികന്‍ തല്‍ക്ഷണം മരിച്ചു. ശങ്കര്‍ എന്ന ഡോക്ടറാണ് കഴിഞ്ഞ ദിവസം സൗത് ബംഗളുരുവിലെ തിരക്കേറിയ റോഡില്‍ രണ്ടു കി.മി പരിധിയില്‍ വെച്ച് ആറു വാഹനങ്ങളെയും ഒരു ബൈക്കു യാത്രികനെയും ഇടിച്ചിട്ടത്. പിന്നീട് ഒരു വീടിന്‍െറ മതിലും തകര്‍ത്താണ് കാര്‍ നിന്നത്.

എന്നാല്‍ കാറില്‍ വെച്ച് തനിക്ക് അപസ്മാര ബാധയുണ്ടായെന്നാണ് ഡോക്ടര്‍ പറയുന്നത്. അതേസമയം അറസ്റ്റിലായ ഇയാള്‍ മദ്യ പരിശോധനക്ക് വിധേയനാകാന്‍ വിസമ്മതിച്ചെന്നും രക്ത പരിശോധനാ ഫലം തങ്ങള്‍ക്ക് ലഭിച്ചിട്ടില്ലെന്നും  പൊലീസ് പറയുന്നു. കാറില്‍ ഡോക്ടറുടെ മകളും ഒപ്പമുണ്ടായിരുന്നു. പൊലീസിന് കൈമാറുന്നതിന് മുമ്പ് നാട്ടുകാര്‍ കൈകാര്യം ചെയ്ത ഇയാളെ ആശുപത്രിയില്‍ പ്രവേശിപ്പിച്ചു. ഇദ്ദേഹം ഓടിച്ച ബെന്‍സ് കാറില്‍ മറ്റ് വാഹനങ്ങളില്‍ ഇടിച്ചതിന്‍െറ നിരവധി കേടുപാടുകളുണ്ട്.