11 വർഷത്തിന്​ ശേഷം ആദ്യമായി സുപ്രീംകോടതിയിൽ മുസ്​ലിം ജഡ്​ജിമാരില്ല

ന്യൂഡൽഹി: 11 വർഷത്തിന്​ ശേഷം ആദ്യമായി​ സുപ്രീം കോടതിയിൽ ഒരു മുസ്​ലിം ജഡ്​ജി പോലുമില്ലാത്ത അവസ്​ഥയെന്ന്​ മുൻ സുപ്രീം കോടതി ചീഫ്​ ജസ്​റ്റിസ്​ കെ.ജി ബാലകൃഷ്​ണൻ . കഴിഞ്ഞ 30 വർഷത്തിനിടെ ഇത്​ രണ്ടാം തവണയാണ്​ സുപ്രീം കോടതിയിൽ ഒരു മുസ്​ലിം ജഡ്​ജി പോലുമില്ലാത്ത സ്​തിഥിയെന്നും​ അദ്ദേഹം പറഞ്ഞു. സുപ്രീം കോടതി ജഡ്​ജിമാരായി സ്​ഥാനക്കയറ്റം ലഭിച്ച ജസ്​റ്റിസ്​ എം.വൈ ഇക്​ബാൽ, ജസ്​റ്റിസ്​ ഫകീർ മുഹമ്മദ്​ ഇബ്രാഹിം ഖലീഫുള്ള എന്നിവർ യഥാക്രമം ഡിസംബറിലും ഏപ്രിലിലും റിട്ടയർ ചെയ്​തതോട്​ കൂടിയാണ്​ മുസ്​ലിം പ്രാതിനിധ്യമില്ലാതെ അവസ്​ഥയുണ്ടായത്​. 

ഇത്​ മുസ്​ലിംകളുടെ അവകാശങ്ങൾ നിഷേധിക്കുന്നു എന്ന വിഷയമല്ല. പകരം പരമോന്നത കോടതിയിൽ എല്ലാ മത ജാതി വിഭാഗങ്ങൾക്കും പ്രാതിനിധ്യം ലഭിക്കുന്നില്ലെന്ന വിഷയമാണെന്നും അദ്ദേഹം ചൂണ്ടിക്കാട്ടി. എല്ലാ മേഖലകളുടെയും മത സാമുദായിക വിഭാഗങ്ങളുടേയും പ്രാതിനിധ്യം ഉറപ്പാക്കാൻ വിവിധ രാജ്യങ്ങളിൽ പ്രത്യേക വകുപ്പുകൾ തന്നെയുണ്ടെന്നും അദ്ദേഹം വ്യക്തമാക്കി. ഇന്ത്യൻ എക്​സ്​പ്രസിന്​ നൽകിയ അഭിമുഖത്തിലായിരുന്നു മുൻ ചീഫ്​ ജസ്​റ്റിസ്​ ഇങ്ങനെ അഭിപ്രായപ്പെട്ടത്​. സുപ്രീം കോടതിയിലെ 196 വിരമിച്ച ജഡ്​ജിമാരിലും ഇപ്പോഴുള്ള 28 ജഡ്​ജിമാരിലും സുപ്രീം കോടതി ചീഫ്​ ജസ്​റ്റിസുമാരിലും 7.5 ശതമാനമാണ്​ മുസ്​ലിം പ്രാതിനിധ്യം. എം.ഹിദായത്തുല്ല, എം ഹമീദുല്ല ബേഗ്​,എ.എം അഹമ്മദി, അൽത്തമസ്​ കബീർ എന്നിവരാണ്​ സുപ്രീം കോടതിയിലെ ചീഫ്​ ജസ്​റ്റിസ്​ പദവിയിലെത്തിയ മുസ്​ലിംകൾ.

സുപ്രീം കോടതിയിലെ ആദ്യ മുസ്​ലിം വനിത ജഡ്ജി ജസ്​റ്റിസ്​ ഫാത്തിമ ബീവിയായിരുന്നു. 1989 ഒക്​ടോബർ ആറ്​ ​മുതൽ 1992 ഏപ്രിൽ 29 വരെയായിരുന്നു ഫാത്തിമ ബീവി സർവീസിലുണ്ടായിരുന്നത്​. 2005 സെപ്​റ്റംബർ 9 നായിരുന്നു അൽത്തമസ്​ കബീർ ചുമതലയേറ്റത്​​. നിലവിൽ രണ്ട്​ ഹൈകോടതി മുസ്​ലിം ചീഫ്​ ജസ്​റ്റിസുമാരാണ്​ ഇന്ത്യയിലുള്ളത്​. ബിഹാറിലെ ഇഖ്​ബാൽ അഹമദ്​ അൻസാരിയും ഹിമാചൽ പ്രദേശിലെ സി.ജെ മൻസൂറും. ഇതിൽ ഇഖ്​ബാൽ അഹമദ്​ അൻസാരി ഒക്​ടോബറിലും സി.ജെ മൻസൂർ എപ്രിൽ 2017 ലും വിരമിക്കും. സുപ്രീം കോടതി ജഡ്​ജിമാരുടെ നിയമനത്തെ ചൊല്ലി കേ​ന്ദ്രസർക്കാറും കോടതിയും തമ്മിൽ നിലനിൽക്കുന്ന അഭിപ്രായ ഭിന്നത കാരണം നിയമനം ഉടനെ ഉണ്ടാവില്ലെന്നാണ്​ സൂചന.